Hoita kɨmaj lo Jeju Krist'n Luk ndang 19 - Maktub Ta Kumkajir

Ta lo Jeju kɨ Jaka

¹ Jeju and kam ɓebo Jerikot tɔit kɨ njan dõ.

² De mad ndɨ nõ, tɔa i Jaka; i bɨradɔ ngétirrdɔnyag, i ngenya tɔ.

³ De'n non a sah kɨ n'oo Jeju, ke i nõ a? Na asɨ al kɨta i de kɨ gɔj, na deg koosɨg ĩn nõ.

⁴ Taa ne, ãi kete, al dõ kag mbaiɓoodt mad kad kɨ n'oo Jeju, a tɔi kɨ ɗob'n non.

⁵ Lon Jeju tee lot'n non ye, oo lo kɨ dõ ela an: Jaka i ɗa kanangbe i ɗisɨ. Kari na m'a m'ndɨ ɓe loi ɓone.

⁶ Jaka ɗa kɨ dõt, hɔ Jeju kɨ ront.

⁷ Deg tube'n oon nya 'nten ye, nyurɨn ta anan: Aw hɔ lo ro det kɨ ngeɗamajal.

⁸ Na Jaka ɗa nõ Bɨraɓet el an: Bɨraɓe oo m'a mad gaj nyamajg lom ngéndog; ĩla m'taa nya ɗi lo de mad kɨ lo goolt a ne, m'a m'tel m'ada kɨɗang dɔt nja sɔɔ.

⁹ Jeju ela an: Ɓone kaj and kam kujt'n ɗan, kɨta de'n ɗan i ngon Abraham ho.

¹⁰ Kɨtɔ Ngon de ɗe kɨ'n sah nya kɨ nãi kɨ n'aja tɔ.

Terrta dɔ nar lɔrt

¹¹ Kamla lon deg ndɨ oon dɔ nyag 'nten ɓaitɔ ye, Jeju eld terrta mad dɔt, kɨta ĩn nderbe kɨ ɓebo Jerusalem, na deg oon anan kõɓe lo Luwah a tee hɔi tentenbe.

¹² Kɨtɔ 'nten el an: De mad kɨ ngon ngeɓe aw mbah dɔ ɓet mad kɨ sãi kad kɨ ndana ngart, na kɨ n'tel.

¹³ Kun ɓerg lon kɨlah kɨ ront ad'd nar lɔr kɨɗa kɨɗa, na eld an: I ɗan ne gat mbã m'tel.

¹⁴ Na deg lo ngon ngeɓe'n non ndigɨna al, ad lan kɨla goat anan: Kɨ ndig kad õɓe dɔjt al.

¹⁵ Na lon ndana ngart woi ye, tel ɗe gog, el kad kunɨn ɓerg'n non ĩgɨn ad'd nar, ad kɨ n'oo nya kɨ ngahn dɔt lo ɗa gat't.

¹⁶ Kɨdasa ɗe nõat el an: Bɨraɓe nar lɔr loi tee nar lɔr kɨlah dɔt.

¹⁷ Ngea ela an: Mersi, ĩ ɓer kɨmaj; kɨta i ngeɗanya kɨro dɔ nyat kɨ tẽbe, m'a m'adi õɓe dɔ ɓet kɨlah.

¹⁸ Kɨ ngekõjoo ɗe ela an: Nar lɔr loi tee nar lɔr mi dɔt.

¹⁹ Ngea ela an: Ĩ tɔ õɓe dɔ ɓet mi.

²⁰ Kɨmad ɗe an: Bɨraɓe, oo gursɨ lɔr loi, m'ndom kɨ ta kub, m'yaro yuk.

²¹ M'ɓool kɨta ĩ de kɨ ngang ngãi i ndɨ un nya kɨ i nda al, i ndɨ i ja nya kɨ i dub al.

²² Ngea tura an: Kɨ ta kɨ tait la m'a m'gangɨn ta dɔit ye, ĩ ɓer kɨmajal. I ger mĩ kɨ ngang ngãi, m'a m'un nya kɨ m'nda al, m'am ja nya kɨ m'duw al.

²³ Kɨtɔɗi awɨn kɨ nar lom dam nart al a? Kɨtɔkad lon m'tel m'ɗe a ne, m'taa kɨ mana dɔt al a?

²⁴ Kamla ngea el deg'n ɗan lot'n non, an: I taan nar lɔr'n non jiat, adɨn de'n ndɨ kɨ nar kɨlah.

²⁵ Deg'n non elɨna anan: Bɨraɓe de'n non ndɨ kɨ nar lɔr kɨlah ale?

²⁶ Ngeɓerg el an: M'ndɨ m'elsɨ dekɨɗen kɨ ndɨ kɨ nya a ne, a adɨna dɔt, na de kɨ nya loa goto a ne, mbã nyan ndɨn a taan jiat kɔ.

²⁷ Na madngétamg'n non, ĩn ndigɨn kad m'õɓe dɔdt al ye, i ɗen sed i tɔlɨnd nẽbe nõmt.

Deg ɗan ronel dɔ kand Jeju ɓebɔ Jerusalemt

²⁸ Jeju elta 'nten kamla a ndia nõ degt kad kɨ n'aw ɓebo Jerusalemt.

²⁹ Lon tee nderbe kɨ ɓet kɨ Betpaje, kɨ ɓe Betani kad mbalbot kɨ a kunɨna Mbalbo kag olibgt ye, Jeju la ngéndoog lon joo,

³⁰ an: Awɨn kam ngon ɓet'n ɗa nõsɨt nõ. Lon a andɨn kam ɓet a ne, a i ngahn ngon korro kɨ dɔ, ĩn de ɓai dɔat nja kɨɗa al ɓaitɔ. I tutɨn na i ɗen sia.

³¹ Na ĩla de mad ndɨjesɨ an: Kɨtɔɗi i ɗa i tutɨn na ne a ne; a i elɨna titbe: Bɨraɓe gea.

³² Ngéndoog'n Jeju lad ye awɨn, ngahn korro tit'n elɨn nõ.

³³ Ɗa tutɨn korro ɓaitɔ la ngéag elɨnd anan: I kɨtɔɗi i ɗa i tutɨn ne ngon korro a?

³⁴ Turɨn anan Bɨraɓe gea.

³⁵ Ɔrrɨn ngon korro ɗen ne ro Jejut, ũn kubg lod dɔat, adɨn Jeju ndɨdɔt.

³⁶ Lon ndɨ aw ye, deg najɨn kubg dɔ ɗobt.

³⁷ Lon ɗe nderbe kɨ ɓebo Jerusalem, ad i lon ɗob ɗisɨt kɨ ber dɔ mbalbo ɓirgt ye, koosɨ ngéndoog loa tube, mbã girr ɗa ronel a ndubɨn Luwah kɨ ndid kɨbo kɨta kɨlag kɨ yaya'n Jeju ɗa ad oon nõ,

³⁸ anan: Ngemajkurr la i Ngar kɨ ngeɗe kam tɔ Bɨraɓet ye. Lapia kɨ kam dɔrãt dõ, kɔsɨgon kɨ dɔ Luwaht kam lot kɨ tɔi tɔi kɨ dõ.

³⁹ Parisɨ madg ku degt elɨn Jeju anan: Ngendoo deg i ndáng ngéndoog loi.

⁴⁰ Jeju tur an: M'elsɨ ke ĩgɨn non nyan tad kaa ne mbalg a kon.

Ta õ kam Jeju ad nõ kɨta tuj kɨ a tee dɔ ɓebo Jerusalemt

⁴¹ Lon Jeju ɗe tee nderbe kɨ ɓebo Jerusalem ye, la kumɨn dɔ ɓet, kamla ɔrr kɨ nõt an:

⁴² Maj kad gerɨn nyag'n sumba kad ngendɨt ɗan kad lapia ton tit. Na tajigla ĩn kɨyarɔ kumsɨt.

⁴³ Kɨtɔ ndɔg a ɓa son sei lon madngétaig a urrɨn ɓe gugɨn ne dɔi, a utɨn kɨ kamt a ngomɨn dɔi kɨbɔg lo kɨ ɗen,

⁴⁴ a ɔsɨ lain, dɔningt kɨ deg kɨ kamit be, a nyan mbal mad dɔ mbalt mad kamit al. A ɗan titbe kɨta i ger dɔ nah'n Luwah ɗe geni tit al.

Jeju aw kam kuj ndub Luwaht

⁴⁵ Jeju and kam kuj ndub Luwaht, mbagɨr tuɓa ĩgɨn ndɨ ɗawɨn nya, kɨ ĩgɨn ndɨ ndugon nya tit.

⁴⁶ El an: Ndangɨn kam Maktubt anan: Kuj lom i kuj ndub Luwah. Na i telɨna bulo to ɓogg kɨ ngékumɗob.

⁴⁷ Ndɨ ndoo deg kam kuj ndub Luwaht kɨndɔbagbe. Na ngéjanyamosɨkadkari kɨ kɨbog, kɨ ngéndang Maktubg lo Juipg sahn kɨ'n tɔlɨna kɔ,

⁴⁸ na ngahn ɗob ɗa al kɨta deg tube ndɨ ngoona keɗengẽ kad n'oon dɔ ta loa.