Hoita kɨmaj lo Jeju Krist'n Luk ndang 17 - Maktub Ta Kumkajir

Terrta dɔ ɗa majalt

¹ Jeju el ngéndoog lon an: Nyag kɨkad deg son kam majalt a nalɨn ɗe al, na beto lo de'n ɗe kɨ nyag'n non.

² I sooat kad lan mbal kusɨ nya kɨbobe kɔat, lana ne ɓul bahbot tɔi kad ɗa nya mad kɨ a ad kɨkɨɗa ku ngan kɨdugt'n ɗan son kam majalt.

³ Oon go rosɨ maj. Ĩla ngonkõi ɗa majal a ne, i ndánga, na ĩla tɔrr ndɨn a ne, i nyàgo majal loa kɔ.

⁴ Ĩla ɗa sei majal nja tanãimɨta kam ndɔ kɨkɨɗat, na nja tanãimɨta tɔ tel kɨroit an: M'tɔrrndim a ne, kari na a i nyàgo majalg loa kɔ.

Ta dɔ kadkamt

⁵ Ngombangkɨlag elɨn Bɨraɓe anan: I laj kadkam dɔ madt.

⁶ Bɨraɓe el an: Ĩla awɨn kɨ kadkam kɨ asɨ kɨ kum mutard a ne, a elɨn kag ɓɔl'n ɗan anan: ɔrr kɨ ngɨraig be, i ɗa kam bahbot a ne, ĩ tɔ a tel ron go tat losɨ.

Kari na kɨ ɓer tel ron go tat lo ngeen

⁷ Nõ kusɨt la hã ɓer loa a ndɔɔ, ke a ul batg, na lon tel kɔr ɗe ɓe a ne, a ela an: I ɗe tajigla i ndɨ ta tabɨlt a?

⁸ A ela titbe al, na a ela kɨ ɗago nyasa adɨn, kamla kɨ la kub kɨmaj ront, na kɨ dɔ ɓon, kɨ oo go lo ndɨn ta tabɨlt ad maj, kamla a ada nyasa kɨ man kãi. Goot kamla, a sanya lon ho, a ãi man ho ye.

⁹ A ɗa mersi ɓer'n non kɨta ɗa nya'n ela nõ a?

¹⁰ Titbe tɔ la ĩn, lon i ɗan nyag tube'n ndasɨn mbera a ne, maj kad elɨn anan: Jĩ ɓerg kɨmaj loj goto kɨta kɨ ɗa nya kɨ sumba kad kɨ ɗa koon.

Ngébanjg kɨlah yootɨn, na kɨkɨɗa kudt tel ɗa mersi Luwah

¹¹ Lon Jeju ndɨ aw kɨ ɓebo Jerusalemt ɓaitɔ ye, a nda kam dɔning Samari kɨ dɔning Galile gang.

¹² Ndɨ and ngon ɓet mad, ngébanjg kɨlah ndɔdɨna. Ngébanjg'n non duba ɗan sãi:

¹³ Unɨn ndid kɨ dõ kon ne anan: Jeju Ngendoo deg, oo kumtondo loj.

¹⁴ Jeju ood na eld an: Awɨn i dan rosɨ ngéjamosɨ kadkarig. Lon ndɨ awɨn ɓaitɔ ye arɨn ad banj lod goto.

¹⁵ Kɨ kɨɗa kudt, lon oo kad ni kɨ yoot ye, tel ndub tɔ Luwah kɨ ndɨn kɨbobe.

¹⁶ So kɨ nja Jejut kɨ takumɨn ningt tɔ ɗaa mersi. De'n non i de kɨ Samarit.

¹⁷ Jeju un tan an: Ngébanjg kɨlah arɨn ale? Kɨ jikɨɗag ye ĩn ɗa a?

¹⁸ Ĩgɨn non tɔ asɨn tel kad ɗe ndubɨn Luwah al, na mbah'n ndɨn tã a?

¹⁹ Kamla ela an: Ĩ ɓai dõ, aw, kadkam loi aji.

Ɗe kõɓe lo Luwah

²⁰ Parisɨg ndɨjen Jeju ke kõɓe lo Luwah a ɗe ndɔ kɨɗat a? Jeju turd an: Kõɓe lo Luwah ndɨ ɗe kɨ lo koot kɨ kum al.

²¹ Deg a anan oo. I nẽbe, ke i nube al, kɨta kõɓe lo Luwah i kusɨt.

²² El ngéndoog lon an: Ndɔ madg a ɗen nõ lon a i ndigɨn koo ndɔ kɨkɨɗa kam ndɔgt lo Ngon de, na a oon al.

²³ A elsɨn anan: Oona nube, oona nẽbe, ot kawɨn, ot ndulon god.

²⁴ Kɨtɔ tit'n telndii a tel yolong, na nyẽr kunja a unj kɔt ko dɔrãt mad mbã kɨ kɔt ko dɔrãt mad ye, titbe la Ngon de a ĩn kam ndɔt lon ho ye.

²⁵ Na kari na a dai yon kɨ kõ ngãibe kamtã, deg kɨ kaglot'n ɗan tɔ a mbetɨna.

²⁶ Tit'n nya ɗan nya kaglot lo Noe, titbe tɔ la a ɗan nya kaglot lo Ngon de ye.

²⁷ Deg ndɨ san nya, ndɨ ãin, ndɨ taan na, ndɨ adɨn ngandg ɗanɓe mbã ndɔt'n Noe and kam toot kɨbo, ad man mbɔkɨ ɗe tɔl deg tube.

²⁸ A i titbe tɔ tit'n ɗan nya kaglot lo Lot, deg ndɨ san nya, ndɨ ãin, ndɨ ndugon nya, ndɨ ɗawɨn nya, ndɨ duwɨn nya kam ndɔɔgt, ndɨ ɗan kujg,

²⁹ na ndɔt'n Lot tee ɓebo Sodomt kɔ ye, horr kɨ kõ giling giling kɨ supɨr tuson ko dõ dɔrãt tɔlɨn deg tube.

³⁰ Ndɔ'n Ngon de a tee hɔi a ne, nyag'n ɗan nya kaglot'n non ye, a ɗan nya ɓaitɔ.

³¹ Ndɔt'n non de'n ndɨ dɔ kujt, na nyag loa ton kam kujt a ne, ot ɗisɨ kand kam kujt lon kɨta kun nya mad. Titbe tɔ de'n i kam ndɔɔt a ne, ot kad tel kɨ ɓe.

³² I gan kamsɨ dɔ nẽ Lot't.

³³ Dekɨɗen'n sa kɨ n'aj ron a ne, a laa kɔ, na dekɨɗen'n la ron kɔ a ne, a ngaha gog.

³⁴ M'ndɨ m'elsɨ: Kam ndɔt'n non deg joo kɨ ton tɨrat kɨɗa, a unɨn de kɨɗa, na a nyan kɨmad.

³⁵ Dekɨdẽg joo ɗa urrɨn nya natlot kɨkɨɗa a ne, a unɨn kɨɗa, na a nyan kɨmad.

³⁶ Deg joo a ndɨn kam ndɔɔt kɨkɨɗa a ne, a unɨn kɨɗa, na a nyan kɨmad.

³⁷ Ngéndoog loa ndɨjena anan: Bɨraɓe nya 'nten a ɗa nya lo kɨɗat a? Jeju turd an: Lon nĩn tot a ne, nõbe la malg a kawɨn na kɨtit ho ye.