Hoita kɨmaj lo Jeju Krist'n Luk ndang 14 - Maktub Ta Kumkajir

Jeju yoot de'n yoman toa

¹ Jeju and kuju lo kɨkɨɗa ku kɨbogt lo Parisɨg kɨ ndɔ taakò mad kɨta sanya, na Parisɨg ndɨ oona maj.

² De mad ndɨ nõat ĩn yoman toa.

³ Jeju un ta el ngendoo mberkɨnda kɨ Parisɨg an: I goɗobat kad yootɨn de ndɔ taakòt e?

⁴ Na ndɨn tad mbo. Kamla Jeju un de'n non yoota, na ada aw.

⁵ Eld an: Nõ kusɨt ĩla ngona ke mang loa so ɗe a ne, a ɔrra tentenbe ndɔ taakòt al a?

⁶ Na asɨ turɨn ta dɔ tat'n non al.

Ta dɔ sɔl dɔt kɨ ɗa mburr ngaw kɨta ngéndog

⁷ Jeju oo deg ndɨ kɔtɨn lo ndig kɨmaj tɔi ye, el deg ĩgɨn kunɨnd lo mburr ngawt terrta 'nten.

⁸ Lon de mad ndei kɨ aw lo mburr ngawt a ne, ot ndɨ lo ndit kɨmajtɔi. Maj a ne, kunɨn de mad kɨ i kɨ bo tɔii.

⁹ Kamla ĩn kunsɨ ĩ kɨ de mad nõ ho, ɗe eli an: Ad lo de'n ɗan; kamla i mba girr hɔ lo ndɨ kɨgog gid degt tube kɨ rosɔl ye.

¹⁰ Kɨtɔ 'nten lon de mad kuni kad i sanya sia a ne, aw i ndɨ lo ndit kɨgog gid degt tube; kɨtakad lon de'n kuni a ɗe a ne, a eli an: Nam i ɗe kɨ kete so. Kamla a i ngah kɔsɨgon nõ degt'n ndɨn sei ta nyasat tube ye.

¹¹ Kɨtɔ dekɨɗen'n ndɨ sɔl dɔn a ne, a sɔlɨn dɔa, na de'n ndɨ sɔl dɔn a ne, a tɔin na kɨ dõ ho.

¹² Jeju el de'n kuna kad sanya sia an: Lon i ɗa mburr ngaw kada ke ndɔɔ a ne, ot kun namig, ke ngankõi, ke noojg, ke madɓeg ngénya; na ɓeta ĩn tɔ tel kuniɨn kɨ kɨ lod ad adin loat.

¹³ Na lon i ɗa mburr ngaw a ne, i kun ngéndog, kɨ mootg kɨ tõg kɨ mundog.

¹⁴ Kamla maj a uri, kɨta deg'n non oon nya ka adin loat al. Na Luwah a telɨn adi ndɔ'n deg kɨdenesew a ɓain lo koit.

Terrta dɔ degt'n mbet kawɨn mburr namt

¹⁵ De mad ku ĩgɨtɨn ndɨn ta nyasat sia lon oo dɔ ta 'nten ye el Jeju an: Ngeronel la i de'n a sanya kõɓet lo Luwah ye.

¹⁶ Jeju ela an: De mad ɗa mburr nam kɨbo, kun deg ngãibe.

¹⁷ Lon dɔkàd mburr nam asɨ woi ye, la ɓer lon, el ĩgɨn kund kad ɗen kɨta ɗago nyag tube woi.

¹⁸ Na deg'n non tube ndan tad nat kɨɗabe mbã girr kɔita. Kɨdasa el an: M'ndugo ndɔ, kari na m'a m'aw kɨ m'oo, m'kɔi kɨ i ndɨ sem dɔt.

¹⁹ Kɨmad el an: m'ndugo mangg joo joo mi, m'a m'aw kɨ m'nãd m'oo, m'kɔi kɨ i ndɨ sem dɔt.

²⁰ Kɨmad tɔ el an: M'taa dekɨdẽ tajigla m'asɨ kaw al.

²¹ Ɓer tee ɗe ɔr hoi nyag 'nten tube Bɨraɓe lon. Ad wong tɔl ngeɓe sɔkɨr, el ɓer lon an: Aw kɨdõt kɨ natlogt kɨgo ɗobg kɨ kam ɓet, ɔi ngéndog kɨ mootg, kɨ mundog, kɨ tõg. I ɗe sed nẽbe.

²² Ɓer el an: Bɨraɓe nya'n el ye, ɗan woi, na ndeg lo to kari ɓaitɔ.

²³ Ngeɓer ela an: Aw kɨ goɗobg kɨ kam kɨngag gawg ĩgɨn i ngahd a ne, i ɗadɨ ad andɨn, kɨtakad kam kuj lom ɗoosɨ.

²⁴ Kɨtɔ m'ndɨ m'elsɨ, ku degt'n non ĩgɨn m'kund ye, kɨɗa kɨ a ɔd mburnam lom tant goto.

Maj kad ngéndoog lo Jeju mbetɨn nyag kɨ duniat

²⁵ Deg koosɨg ngãi awɨn kɨ Jeju la mbel kɨgog eld an:

²⁶ Ĩla de mad ɗe romt na ɔsɨ ta bɔwɨn kɨ kon, kɨ nẽn, kɨ ngankõng kɨdɨngãg kɨ kɨdẽg, mbã kɨ ron tɔ al a ne, asɨ kĩ ngendoo lom al.

²⁷ Ke dekɨɗen'n un kagdosɨ lon kɨ kɔsɨdɔn, na ndulo gom al a ne, asɨ kĩ ngendoo lom al.

²⁸ De'n ndig ɗa kuj kɨ ngal kɨ dõ a ne, a ndɨ ber kete, a tɨda kɔr nar ɗaa oo kamtã, ke ndɨ kɨ nya kɨ asɨ tɔl kona al a?

²⁹ Titbe al a ne, a la girra na a asɨ ɗa tɨga al, ad deg tube'n oon ye, a gon dɔat,

³⁰ anan de'n ɗan mba girr ɗa kuj kɨgal kɨ dõ, na asɨ ɗa tɨga al.

³¹ Jeju elta mad ɓaitɔ an: Ke ngar mad kɨɗa ĩn aw kɨ'n ngahn na kɨta ɗɔɔ kɨ ngar mad a ne, a ndɨ ber kete kad ɔj ta kɨ deg lon oo kamtã, ke ĩ kɨ deg dub kɨlah a asɨ ngahn na kɨta ɗɔɔ kɨ ngar namɨn'n a ɗe ɗɔɔ dɔnt kɨ ngéɗɔɔg dub dɔjoo a?

³² Ĩla asɨ al a ne, lon ngar'n non i sãi nu ɓaitɔ ye, a la ngombangkɨlag kad ndɨjena nya'n asɨ kad'n ɗa kad lapia ton mbɨnadt.

³³ Titbe tɔ la dekɨɗen kusɨt ĩn a nya nyangahg lon tube al a ne, asɨ tel ngendoo lom al.

³⁴ Kat i nya kɨmaj, na ĩla mɨrã kat ɔrr a ne, ɗi a tel kɨ mɨrã gog a?

³⁵ Kara gotot, ke kɨta dɔning, ke kɨta ɓirɓit, na a una kɔ. De'n ndɨ kɨ mbin kɨta koo dɔ a ne, kɨ oo dɔ.