Hoita kɨmaj lo Jeju Krist'n Luk ndang 12 - Maktub Ta Kumkajir

Jeju ndoo deg kad oon go rod maj dɔ ngéndokumdegt

¹ Kam ndɔgt'n non, lon koosɨdeg kawɨn na kɨ nat mbã ɗa ɓan na ye, Jeju mba girr kel ngéndoog lon an: Nyakɨdasa bang la ten: Oon go rosɨ dɔ berrkasɨt lo Parisɨg ad i ndo'n ndonkum deg.

² Kɨtɔ nya mad kɨ kut dɔ kɨ a unɨn nyadɔt al goto. Ke nya mad kiyadɔ kɨ de a ger al goto.

³ Kɨtɔ nya kɨɗen'n elɨn kam tilt ye, a oon dɔ kam kunjt, nyag'n i elɨn kɨ mbi degt gɨlelot, a lan mbera dɔ kujgt dõ.

Maj kad de ɓool Luwah

⁴ Ĩn namg, m'ndɨ m'elsɨ ot ɓoolɨn ĩgɨn ndɨ tɔlɨn dãro de, na gog got asɨn ɗa nya mad kɨ tɔi al.

⁵ Na m'a m'ɔjsɨ ĩn hã sumba kad i ɓoolɨna; i ɓoolɨn Luwah'n a tɔl de, kamla aw kɨ tɔg kad laa kam Jahanamat, ã m'elsɨ ĩla i ɓoolɨna ye.

⁶ A ɗawɨn tĩtĩg mi kɨ gursɨ joo ale? Na kɨkɨɗa kudt kaa kam Luwah a oi dɔa al.

⁷ Na mbã kɨ bisɨ dɔsɨ tube dan kɔrrd. Ot ɓoolɨn, i tɔin tĩtĩg ngãibe.

Maj kad ngéndoog lo Jeju tɔn tad nõ degt man ne naj

⁸ M'ndɨ m'elsɨ tɔ, dekɨɗen'n ndɨ elta lom nõ degt a ne, Ngon de tɔ a elta loa nõ malaikagt lo Luwah,

⁹ na de'n maj ta gerɨm nõ degt a ne, Ngon de tɔ a maj ta gera nõ malaikagt lo Luwah ho.

¹⁰ Dekɨɗen kɨ a elta kɨ ndoor Ngon de tɔ a ne, Luwah a nyàgo majalg loa; na ĩn ndɨ elta kɨmal dɔ Ndil kɨkunjɗangt a ne, a nyan go majalg loa kɔ al bat.

¹¹ Na lon awɨn sesɨ kad gangɨn ta dɔsɨt kam kuj kawnat lo Juipg kɨ nõ ngékõɓegt, kɨ ngétɔgg a ne, ot soolɨn dɔ tat ke titbãi a kɔrrɨn ne ta dɔsɨt, ke dɔ tat kɨ a kelɨn.

¹² Kɨtɔ dɔ kaglot'n non la Ndil Kɨkunjɗang a ndoosɨ ta'n sumba kad elɨn.

¹³ De mad un ndin kɨ dõ de'n koosɨgt elɨn Jeju an: Ngendoo deg el ngonkom ad kegɨm nyandubat.

¹⁴ Na Jeju el an: Dekɨdɨngã, nõ ndam ngegangtat losɨ ke ngekegnya kusɨt a?

¹⁵ Kamla eld an: I ngomɨn rosɨ maj dɔ kumndà; kɨta ke neni nyamajg lo de ton mbuj kaa ne, a ndɨ kɨ dɔn dõ kɨta nyag'n ton jiat al.

¹⁶ El terrta mad an: Dɔning lo de mad kɨ ngenya taa tee kɨ kand nya ngãi,

¹⁷ la ɔj ta kamɨnt an: Ka m'ɗa ɗi? Kɨtɔ m'oo lon m'a m'kaw nyandɔɔ lom kɨ tit al.

¹⁸ El an: Nya'n m'a m'ɗa la ten; m'a m'boti damg lom, na m'a m'ɗa kɨɗangg kɨbotɔi; nõbe la m'a m'ũ nyako lom kɨ nyamajg lom tube tit ye.

¹⁹ Kamla m'a m'el rom m'an: Ĩ rom, i ndɨ kɨ nya majg ngãi kɨ nda kɨta ɓalg ngãibe, i taakò, i sa, ãi, i su.

²⁰ Na Luwah ela an: Ĩ ɓood de, ndɔ la 'nten a sahn roi roit gog. Nyag'n i mbõ kɨnat ye, i kɨta nõ a?

²¹ Titbe tɔ la de'n mbõ nyamajg kɨ nat kɨta ron a ne, i ngenya ro Luwaht al.

Maj kad de ɓa kul Luwah

²² Kamla Jeju el ngéndoog lon an: Kɨtɔ 'nten m'ndɨ m'elsɨn: Ot soolɨn kɨta rosɨ dɔ nyat'n a san, ke kɨta dãrosɨ dɔ nyat'n a lan rosɨt tɔ.

²³ Kɨtɔ ro de tɔi nyasa, dãro tɔ tɔi kubg.

²⁴ I nɔlɨn kagãg kɔri kɔri, duwɨn nyako al ho, jan nyako al ho, lo ndah nyako lod goto ho, dam lod goto tɔ, na Luwah la ndɨ uld ye. I tɔin yelg nja bãi a?

²⁵ Nõ kusɨt asɨ la kil ji kɨɗa dɔ ndɔgt kad ngalɨn kɨta sool lon a?

²⁶ Kɨtɔ 'nten ĩla i asɨ ɗa nya kɨ du kɨtitbe al a ne, kɨtɔɗi i ndɨ soolɨn ne dɔ ndeg nyagt a?

²⁷ I nɔlɨn Hutkamg kɔri kɔri, titbãi ɗa tɔgɨn ne, ɓewɨn kɨla kub al, joo'n kub al tɔ; na m'ndɨ m'elsɨ, ke Salomõ kam nyamajgt loa tube kaa la kub kɨmaj tit kɨkɨɗa kudt al.

²⁸ Luwah la ndɨ pare ro mũ kɨ kam mut titbe ye. Mũ'n non ɗa kari ɓone, na loti a lana kam horrt. Yela, ĩn deg tã Luwah a oo gosɨ kɨ kub ale? Kadkam losɨ i tẽbe.

²⁹ Na ĩn, ot sahn nya'n a i san ke nya'n a kãin, ot kadɨn kamsɨ dasɨ ta paa.

³⁰ Kɨtɔ nyag'n non deg kɨ dɔningt ndɨ sahn; na Bɔwsɨ ger i ndɨ gen nyag'n non ho.

³¹ Na i sahn kõɓe loa, na nyag'n non tube tɔ a adsɨn kɨ dɔt.

Nyandoo lo Jeju dɔ nyamajgt kɨ kam dɔrãt dõ

³² Ĩn ɓut kɨ tẽbe ot ɓoolɨn kɨta nel Bɔwsɨ dum kɨ n'adsɨ kõɓe.

³³ I ndugon nyag losɨ kɔ adɨn nara ngéndog kadkarit. Urɨn ngong narg kɨtɔsɨ kɨ a tel kɔkɨ al bat. I mbõn nyamajg kɨ kam dɔrãt dõ, a tujɨn al, ɓoogg a teen kadt al, kɨɗukɨs a tujɨnd nu al tɔ.

³⁴ Kɨtɔ lon nyamajg losɨ ĩn tit a ne, lon non la kamsɨ a i dɔt ye.

Maj kad ɓerg lo Bɨraɓe ndɨn dɔgt

³⁵ I ndɨn kɨ ɓosɨ kɨ dɔ kɨta ɗa kɨla, na adɨn lambag losɨ ndɨn kɨ horr kɨ ndɔgbe.

³⁶ Kɨ ĩn tit ɓerkɨlag kɨ ndɨ ngoon tel bɨraɓe lod lo mburr namt keɗengẽ kad 'nten ta ɗob adɨna lon gan tabit.

³⁷ Ngéronel la ĩn ɓerg'n non, ĩgɨn hã Bɨraɓe lod tel ɗe a ne, a ngahd ndɨn dɔgt. Rota la m'ndɨ m'elsɨ ye, ĩ kɨɓe kɨ dɔn a dɔ ɓon, na a ndad ta nyasat, a aw rodt, na a oo god kɨ nyasa.

³⁸ Ke ɗe danlot ke kɨ kàd kɨ tɔi, ĩla ngah ɓerg lon ndɨn dɔgt a ne, ɓerg'n non a ĩn ngéronel.

³⁹ Na kɨ i gerɨn nya 'nten maj; ĩla ngeɓe ger dɔkàd lon ngeɓoog a ɗet a ne, ni a ndɨ dɔgt, na a nya ad mbutɨn kuj loa al.

⁴⁰ Ĩn tɔ i ɗan go rosɨ, kɨta Ngon de a ɗe dɔ kaglot'n a i ndan kamsɨ dɔt al.

Ta lo ɓer kɨ ngeɗanya kɨro kɨ ɓer kɨ ngeɗa nya kɨro al

⁴¹ Pierr el an: Bɨraɓe terrta 'nten ye, jĩ la i ndɨ elj yo? Ke deg tube a?

⁴² Bɨraɓe el an: Nõ i ngɔrɔkɨla kɨro kɨ ngekumtɔg a? I ɓer'n ngea ndaa dɔ ngangt kɨ ɓe lon, kad kɨ ad'd nyasa dɔkàdat.

⁴³ Na lon ngea ɗe ngaha ndɨ ɗa titbe ye, ɓer'n non i ɓer kɨ ngeronel.

⁴⁴ Rota la m'ndɨ m'elsɨ ye, a ndaa dɔ nyagt lon tube.

⁴⁵ Na ĩla ɓer'n non el kamɨnt an: Ngeem a tel ɗe Kanag al, na mba girr tɨnda namɨng kɨdɨngãg kɨ kɨdẽg, sanya ho, ãi ho ad kasɨ ɗaa tɔ a ne,

⁴⁶ ngeɓer'n non a ɗe dɔkàdt'n nda kamɨn dɔt al, kɨ dɔkàd'n ger al tɔ, a gangta dɔat, a laa lot lo ngékadkamd Luwah al.

⁴⁷ Ɓer'n ger nya kɨ ngeen ndig kad ɗa, na ɗa nya'n non al, ɗago ndigt lo ngeen al tɔ a ne, a ndana ngãi.

⁴⁸ Na ɓer'n ger nya kɨ ngeen ndig al, na ɗa nyag kɨmajal asɨ ta nda ngãi a ne, ndana ngãi. Na de'n adɨna nya ngãi a ndɨjena ngãi tɔ, na de'n lan jiat ngãi tɔ a ne, a ndɨjena kɨ tɔi tɔ ho.

Jeju ɗe nda lapia dan degt al, na ndoorna tã

⁴⁹ M'ɗe kɨta la horr dɔ degt kɨ dɔningt; na m'ndig jeje kad horr'n non kɨ õ woi.

⁵⁰ Na baptem mad to nõ kari na kɨ m'ɗa baptem'n non. Kam ndɨ ɔsɨm ngãibe mbã kad m'tɨga'n.

⁵¹ Ot koo Kana: m'ɗe kɨtakad lapia to dan degt kɨ dɔningt ne. M'ɗe kɨ gang na tã.

⁵² Kɨtɔ labekɨnõt, deg mi kam kujt kɨkɨɗat a ĩn kɨ gang na, kɨmita a ndoorɨn kɨjoo, kɨjoo a ndoorɨn kɨmita.

⁵³ A gangɨn na, bɔw a ndoor ngonɨn kɨdɨngã, ngon kɨdɨngã a ndoor bɔwɨn; kõ ngon a ndoor ngonɨn kɨdẽ, ngon kɨdẽ a ndoor kon; mum kɨdẽ a ndoor mumɨn; ĩ tɔ a ndoor mumɨn.

Jeju ndáng deg'n gerɨn go kaglo'n non al

⁵⁴ Jeju el koosɨdeg an: Lon kilndii mad bãi ko lo kudkàdt a ne, tentenbe i ndɨ anan: Ndii ndɨ ɗe; ɗaa titbe tɔ.

⁵⁵ Lon oon nel ndii la kɨ dɔɔ a ne, i ndɨ anan: Lo a tɨnga ngãi; ɗaan titbe tɔ.

⁵⁶ Ĩn ngéndokumdeg i gerɨn kɔj takum dɔning kɨ dɔrã; na titbãi i gerɨn ne kɔj kaglo 'nten al a?

Maj kad de sah ɗob tee ji mad kɔlɨnt lon i ne ɗobo ɓaitɔ

⁵⁷ Kɨtɔɗi ĩn kɨɓeg kɨdɔsɨ i gangɨn ta nya ĩn i goɗobat al a?

⁵⁸ Lon i ndɨ awɨn kɨmadkɔli kɨro ngegangtat ɓaitɔ a ne, i ɗa tootbe kad i la nooj nat sia dɔ ɗobt, na ɓet a ɔrri aw sei ro ngegangtat, ngegangta tɔ a lai ji asɨgart, na asɨgar tɔ a taa lai dangait.

⁵⁹ Rota la m'ndɨ m'elsɨ ye, a i teet al bat, na a i ba ndɔ mbã kɨ dɔboi sile.