Hoita kɨmaj lo Jeju Krist'n Luk ndang 11 - Maktub Ta Kumkajir

Ta nyandoo lo Jeju dɔ keltat kɨ Luwah

¹ Ndɔ mad Jeju ndɨ elta kɨ Luwah lot mad. Lon nya tan ye, kɨkɨɗa ku ngéndoogt loa el an: Bɨraɓe i ndooj kelta kɨ Luwah tit'n Jã ndoon ngéndoog lon ho.

² Jeju eld an: Lon i ndɨ elɨn ta kɨ Luwah a ne, anan: Bɔw kɨkunjɗang, kɨ kõɓe loi ɗe.

³ Adj nyasaj kɨ asɨ ndɔ kɨɗa kɨndɔgndɔg.

⁴ I nyàgo majalg loj kɨta jĩ kɨ dɔj kɨ nyàgo majalg lo dekɨɗen'n ɗa sej nya kɨgoot al, ot kaw sej kad nájɨn.

⁵ Jeju el ngéndoog lon an: Ĩla de mad kusɨt la aw kɨ namɨn, na aw roat danlot ela an: Nam i tɨnam bɨnat mɨta.

⁶ Kɨtɔ nam mad ɗe mbah romt, n'a m'oo nya kad m'ɗaan mbah al.

⁷ Na nama kɨkeme a tur an: Ot ndɔɔm ta; tabit i kɨkut woi, mĩ kɨ nganɨmg kɨ to ber woi, m'asɨ ɓai dõ kadi bɨna al.

⁸ M'ndɨ m'elsɨ: Ke a ɓai ada kɨta kɨ i nama al kaa ne, a ɓai dõ ada bɨna kɨgo geet'n hã ge, kɨta njɨba kɨ njɨba ngãi tɔi dɔ.

⁹ Mĩ tɔ m'elsɨ: I kɔn a adsɨn, i sahn, a i ngahn, i gan a tee adsɨn.

¹⁰ Kɨtɔ dekɨɗen hã ndɨ kɔ, ndɨ taa; de'n ndɨ sah ndɨ ngah; de'n ndɨ ga a tee adɨna tɔ.

¹¹ Bɔw kɨ ɗa kusɨt ĩla ngona kɔa bɨna a ne, ada mbal a? Ke kɔa kanj a ne, a ada li gan goot kanj a?

¹² Ke ĩla kɔa kaw kɨnja a ne, ada gɨna a?

¹³ Kɨtɔ 'nten, ĩgɨn hã ĩn deg kɨmajal, i gerɨn kad nyag kɨmaj maj ngansɨg ye la Bɔwsɨ kɨ kam dɔrãt dõ tã a ad Ndil Kɨkunjɗang ĩgɨn ndɨ kɔna al yo?

Jeju kɨ Beljebul

¹⁴ Jeju ndɨ ɔrr ndil kɨmajal kɨ ɔg de kelta kam det mad kɔ. Lon Ndilɨn non tee woi ye, de kɨ ngekelta set'n non elta, ad ya koosɨg biw.

¹⁵ Na kɨmadg kudt anan: I kɨtakul Beljebul ngar lo ndil kɨmajalg la ndɨ ɔrrɨn ndil kɨmajalg kɔ ye.

¹⁶ Kɨmadg ndɨ yan na gum, ndɨ sahn nyakɔj mad ko roat, kɨ ɓai ko kɨ dõ dɔrãt.

¹⁷ Na Jeju ger tagahd maj ad eld an: Kõɓe kɨɗen'n gang joo ndoor ron a ne, kõɓe'n non a tel gootɓe, na deg kɨ kam kujt kɨɗen gangɨn na joo ndoorɨn na a ne, a son tube kɔ.

¹⁸ Ĩla Sɨtan gang joo ndoor ron a ne, titbãi hã kõɓe loa a ɗan lo ɗant a? M'el titbe kɨta i ndɨ anan: I kɨtakul Beljebul la m'ndɨ m'ɔrrɨn ndilg kɨmajal kɔ ye.

¹⁹ Na ĩla m'ndɨ m'ɔrr ndilg kɨmajal kɔ kɨtakul Beljebul a ne, ngéndoog losɨ ndɨ ɔrrɨnd kɔ kɨtakul tɔg lo nõ a? Kɨtɔ 'nten la ngéndoog losɨ a ĩn ne ngégangta dɔsɨt ye.

²⁰ Na ĩla m'ndɨ m'ɔrr ndil kɨmajal kɔ kɨtakul tɔg Luwah a ne, rota kõɓe lo Luwah tee rosɨt woi ta.

²¹ Lon de kɨngang aw kɨ nyakatg ront ɗa ngomɨn ɓe lon a ne, nyag loa ton kari lapia.

²² A ɓool nya mad al, na lon de mad kɨ tɔga i ngãi ɗe kɨ ngangɨn, ɓa so sia, tetaɗɔɔ a ne, a taa nyag loa tube'n ndɨ ɓa kuld, na keg nyag loa.

²³ De'n i sem al a ne, i ngendoorɨm; de'n ndɨ kaw nyag kɨ nat sem al a ne, ndɨ tɨnda nyag tĩkɔ.

Ta lo ndil kɨmajal'n tel kɨ kam det gog

²⁴ Lon ndil kɨyerr tee kam det ye, a lago log kɨ man gotot, a sah lo taakò, na ngah al, kamla el an: M'a m'tel kɨ ɓe lom'n hã m'teet.

²⁵ Lon ɗe teet ye, ngaha i kɨ tisa kɨ ɗago woi.

²⁶ Goot a ne, tee aw ɔi ndilg kɨɗang tanãimɨta ĩgɨn tɔina kɨmajal, andɨn kam det'n non gan gart. Dɔboi de'n non tel majal tɔi kɨdasa.

²⁷ Lon Jeju ndɨ eltag 'nten ɓaitɔ ye, dekɨdẽ mad un ndɨn kɨ dõ dan koosɨgt el an: Ngeronel la i dekɨdẽ kɨ ngekooj kɨ ngekadi mba.

²⁸ Na Jeju el an: Ngéronel kɨ tɔi la ĩn deg kɨ ngékoo dɔ ta lo Luwah, na ngomɨn goa tɔ ho ye.

Deg sahn nyakɔj mad ro Jejut

²⁹ Lon koosɨdeg ndɨ kawɨn na kɨ ro Jejut ye, mba girr kelta an: Deg kɨ kaglot 'nten ĩn deg kɨmajal, ndɨ sahn nyakɔj mad a adɨnd nyakɔj mad al, na nyakɔj lo Jonas ngekelta kɨ ta Luwaht tã.

³⁰ Kɨtɔ tit'n Jonas telɨn nyakɔj kɨta deg kɨ Ninibt ye, titbe tɔ la Ngon de a telɨn nyakɔj kɨta deg kɨ kaglot 'nten.

³¹ Ngar kɨdẽ kɨ dɔɔ a ɓai ɗa dõ ndɔ gangtat nat kɨ deg kɨ kaglot 'nten a hɔd kɨ ta kɨta bãi ko dɔboi dɔningt ɗe kad kɨ n'oo dɔ terr lo Salomõ, na oon nya mad kɨbo tɔi Salomõ i ne.

³² Deg kɨ ɓebo Ninibt a ɓai ɗan dõ ndɔ gangtat nat kɨ deg kɨ kaglot 'nten, a hɔnd kɨ ta kɨta tɔrrɨn ndid lon Jonas la'n mber ta lo Luwah dandt na, oon. Nya mad kɨbo tɔi Jonas i ne.

Lamba lo dãro de

³³ De kɨ ndah horr lambat kamla yaa holɓet goto, ke la girr ngotɔrr nyat, na a ndaa dɔ kag ndah lambat tã kad deg'n andɨn kam kujt oon kunja.

³⁴ Lamba lo dãroi i kumi. Lon kumi janjoi a ne, dãroi kɨtaagbe a i kɨ kunj; na lon kumi majal a ne, dãroi kɨtaagbe a i kɨ til ho.

³⁵ Kɨtɔ 'nten, oo go roi maj, na ɓet a ne, kunj kɨ kamit i til.

³⁶ Kɨtɔ 'nten ĩla dãroi kɨtaagbe a i kɨ kunj, na til goto lo madt a ne, a i kɨ kunj kɨtaagbe, tit'n lamba ndɨ unjɨn dɔit kɨ nyẽrɨn ye be.

Jeju el deg kad oon go rod maj dɔ ngéndoo maktubgt kɨ Parisɨg

³⁷ Lon Jeju elta tɨga woi ye, Parisɨ mad kun Jeju ɓe lon kɨ sa sen nya. Jeju and kuju loa ndɨ ta nyasat.

³⁸ Parisɨ'n non oo Jeju tugo jin kete nõ sanyat al, ad ta yaa ngãibe.

³⁹ Bɨraɓe ela an: Ĩn Parisɨg i ndɨ ɗan gid kop kɨ tasa adɨn ar, na kamsɨ ɗoosɨ kɨ mbɨrã kɨ ndang.

⁴⁰ Ĩn ɓood deg, Luwah'n ɗa gid nya nõ la ɗa kama ho ye.

⁴¹ Na maj kad ɔin nyag kɨ kam kopt kɨ tasagt adɨn ngéndog kadkarit, na oon nyag tube a ĩn kɨ kar kɨtatɔsɨ.

⁴² Beto losɨ ĩ Parisɨg i ndɨ adɨn la dĩm mbikamg kɨ tɔd i mente, kɨ rue kɨ ndeg mbikamg tube, na i turɨn go takɨgang kɨ goɗobat kɨ tarɨn asɨ kad de tar Luwah al. Sumba kad i hɔn ɗa nyag 'nten kɨkanj kad i nyan go nyag ngen non kɔ.

⁴³ Beto losɨ ĩn Parisɨg kɨta i ndi sahn londɨg kɨdasa kam kuj kawnagt lo Juipg, i ndigɨn kad deg ɗasɨn lapia kam sukɨgt tɔ.

⁴⁴ Beto losɨ kɨta i titɨn kɨ dɔɓadg kɨ deg oon al. Deg ndian dɔdt, na gerɨn al.

⁴⁵ Kɨ kɨɗa ku ngéndoo mberkɨnda lo Moij el an: Ngendoo deg, dɔ tat'n el ten i taj'j ho.

⁴⁶ Na Jeju el an: Beto losɨ ĩn ngéndoo mberkɨnda lo Moij kɨta i ndɨ ndan nyag kɨ kɔi kɨ de asɨ kun kɨ dõ al, na ĩn kɨɓeg kɨ dɔsɨ ɔdɨn nyag kɨ kɔin non kɨ ngon jisɨ al.

⁴⁷ Beto losɨ kɨta i ndɨ ɗan dɔɓadg lo ngékelta kɨ ta Luwaht'n bɔwsɨg tɔlɨnd.

⁴⁸ Titbe la i ndɨ man ne naj dɔ nyat'n non, i ndigɨn kɨla ɗa bɔwsɨg. Bɔwsɨg tɔlɨn ngékelta kɨta Luwaht, na ĩn i ndɨ ɗan kuj dɔɓad'dt.

⁴⁹ Kɨtɔ 'nten terr lo Luwah el an: M'a m'la kɨ ngekelta kɨ ta Luwaht kɨ ngombangkɨlag rodt. A tɔlɨn kɨmadg kudt, a dan kum kɨmadg ndo.

⁵⁰ Kɨtɔkad Luwah ndɨjen ta mosɨ ngékelta kɨta Luwaht tube'n ũ ber lo lagɨr dɔningt nu mbã tajigla ro degt kɨ kaglot 'nten.

⁵¹ Ad i ta mosɨ Abel mbã kɨ mosɨ Jakari'n tɔlɨna mbɨna dɨngɨr kadkarit kɨjakɔ kɨ lo kɨjaɓat. Rota la m'ndɨ m'elsɨ ye. A ndɨjen ta mosɨ deg'n non ro degt kɨ dɔkaglot 'nten.

⁵² Beto losɨ ĩn ngéndoo mberkɨnda lo Moij, unɨn lakle nyager kɔ ĩn kɨɓeg kɨ dɔsɨ andɨn al, na ĩgɨn ndigɨn kand a ne ɔgɨnd.

⁵³ Lon Jeju tee nõbe ye, ngéndoo maktubg kɨ Parisɨg mban girr so kɔat kɨ ta ndɨjeg kɨ dang dang kɨ gum kɨya i kamt.

⁵⁴ Sahn kɨ'n hɔna kɨ ta mad'n ɓet a kel.