Hoita kɨmaj lo Jeju Krist'n Luk ndang 1 - Maktub Ta Kumkajir

Luk ndang maktub ad namɨn Teopil

¹ Deg ngãibe ndangɨn hoi nyag'n ɗan nya danjt kɨgo tɔgdt.

² Deg'n non ndangɨn tag lo ngémanajg, kɨ ngékelta lo Luwah loyaɓood kɨlat lo Jeju, ad i tag'n elɨn dɔ nyagt'n oon kɨ kumd.

³ Mĩ tɔ m'nder girr nyag'n non loyaɓoodt mbã dɔboit. Kɨtɔ 'nten m'oo maj kad m'ndang ta dɔdt kɨgoagoa m'adi ĩ Teopil ngemaj kɨ tɔi.

⁴ M'ndɨ m'ɗa titbe kɨtakad i gerɨn rota dɔ nyagt tube'n deg'n non ndooin.

Malaika elta kete dɔ kooj Jãt kɨ ngeɗa deg baptem

⁵ Kaglot'n Herod ĩn ngar kam dɔning Judet ye, ngejanyamosɨkadkari mad ndɨ nõ tɔa i Jakari, i kɨkɨɗa ku ɓut ngéjanyamosɨkadkarigt kɨ bɨra bɔwd i Abia. Nẽa i kɨkɨɗa ku ngan kɨdẽgt kɨ girrkooj Aarõ, tɔa i Elijabet.

⁶ Ĩn tujoo ĩn deg kɨdenesew nõ Luwaht, telɨn rod go mberkɨndagt lo Bɨraɓe kɨ tag loa kɨ tee, kɨkanj ta dɔdt.

⁷ Na oojɨn ngon al, kɨta Elijabet i kuj, ĩn tujoo ĩn deg kɨ telɨn bɨga bugum.

⁸ Ndɔ mad Jakari ndɨ ta kɨla jamosɨkadkarit nõ Luwaht, kɨta i kaglo lo ngékɨɓe lo Abia kad ɗan kɨla'n non.

⁹ Kɨgo nyabelɓet lo ngéjanyamosɨkadkari, yan yuk, na yuk'n non so dɔ Jakarit kad and lot kɨjaɓat lo Bɨraɓe kad la horr mbikamt kɨ kootmbĩ.

¹⁰ Deg koosɨg tube ɗan tɨga, ɗa elɨn ta kɨ Luwah dɔ kàd la horr mbikamt kɨ kootmbĩ.

¹¹ Malaika lo Bɨraɓe mad tee hɔi kɨro Jakarit, ɗa kad dɨngɨr la horr mbikam kɨ kootmbĩ ko kõt.

¹² Lon Jakari ooa ye, kama gang man ngalang ad ɓool ɗaa tɔ.

¹³ Malaika ela an: Jakari. Ot ɓool kɨta Luwah oo dɔ kɔ loi, ɓet nẽi Elijabet a ooj ngon adi, na a i ndah tɔa Jã.

¹⁴ A i ɗa ronel dɔat kɨ kamnda; deg ngãibe tɔ a ɗan ronel dɔ koojat.

¹⁵ A i de kɨbo nõ Bɨraɓet, a ãi kasɨnduu, ke kasɨ mad kɨ ngang al bat, a i kɨ Ndil Kɨkunjɗang ndɔ koojat mbã tɔgɨn.

¹⁶ A tel kɨ deg ngãibe ku Israelagt kɨ ro Bɨraɓe Luwaht lod,

¹⁷ a ɗa kɨlaɓer lon nõ Luwaht kɨ ndil Eli. Kɨ tɔg kɨ tit lo Eli, ngoni a tel ngarkam bɔwg kɨ ro ngandgt, a ad ngételro gotat al telɨn kɨ kam ɗob terrt lo deg kɨdenesew, a ɗago deg lo Bɨraɓe kad ɗan go rod kɨtaa.

¹⁸ Jakari el Malaika an: Kɨ ɗi m'a m'gerɨn kad ta 'nten i rota a? Kɨtɔ mĩ bɨga, nẽm tɔ tel bɨga bugum.

¹⁹ Malaika tura an: Mĩ Gabriel m'ɗa nõ Luwaht. Kɨtɔ ɗa kɨlaɓer loa. Luwah lam kad m'eli ta ho, kɨ m'ɔrri hoita kɨmaj 'nten.

²⁰ Oo maj ɓet a i tel mbo, a asɨ kelta al mbã ndɔt'n nyag 'nten a ɗan nya kamtã; kɨta i taa ta lom al. A tɔlɨn kɔntag dɔ kàdat.

²¹ Deg ndɨ ngoon Jakari, ta yad kɨta nãia kɨ nãi kɔkɨ kam lot kɨjaɓat.

²² Lon tee tɨga ye, asɨ kad elta al. Deg gerɨn ta kad Jakari oo nyakookamndilt kam kuj ndub Luwaht. Ĩ tɔ mbɔjd kɨ jin, na ndɨ tan mbo.

²³ Lon ndɔ ɗa kɨla ndub Luwah loa asɨ woi ye, Jakari aw ɓe lon.

²⁴ Go ndɔgt 'nten ye, nẽa Elijabet ndan ngon, na tee tɨga kam kujt lon al asɨ nah mi, an:

²⁵ 'Nten la i maj'n Bɨraɓe ɗa sem ye, dɔ ndɔt'n oo kumtondo lom kad m'ɔrrɨn rosɔl dɔmt dan degt.

Malaika Gabriel elta Mari kete dɔ kooj Jejut

²⁶ Kam naht kɨbojidet go naht'n Elijabet ndan ngon ye, Luwah la Malaika Gabriel ɓet mad kɨ dɔning Galilet, tɔa i Najaret.

²⁷ Laa kɨ ro ngon kɨ mandɨt kɨ ger ngaw al, ĩn de mad kɨ girrkooj Dabidt kɨ tɔa i Jojep, hɔ dɔa. Tɔ ngon kɨmand'n non i Mari.

²⁸ Malaika and goat, an: Lapia. Ĩ ngemajkurr, Bɨraɓe i nat sei.

²⁹ Ta lo malaika ad kam Mari gang ngalang; ɔj ta kamɨnt, ke girr lapia loa i ɗi a?

³⁰ Malaika ela an: Ot ɓool, Mari, i ngah maj nõ Luwaht.

³¹ Oo maj a i ndan ngon, a ooj kɨdɨngã, a i ndah tɔa Jeju.

³² Ĩla i kɨbo ye, a kunɨna ngon Ngetɔitɔi, Bɨraɓe Luwah tɔ a ada pong kõɓe lo bɔwa Dabid.

³³ A õɓe dɔ ngé kɨ ɓet lo Jakob mbãkɨnõt, kõɓe loa dɔboia goto.

³⁴ Mari el Malaika an: Mĩ'n m'ger ngaw al ye, titbãi nya 'nten a ɗa nya?

³⁵ Malaika tura an: Ndil Kɨkunjɗang a ɗe dɔit, tɔg Luwah Ngetɔitɔi a uti kɨ Ndilɨn. Kɨtɔ 'nten ngon kɨkunjɗang'n a ooja, a kunɨna ngon Luwah.

³⁶ Oo tɔ, nooji Elijabet ndan ngon dɔ bɨgant, ĩn deg a kunɨna kuj ye, ndan ngon asɨ nah kɨbojidet.

³⁷ Kɨtɔ nya mad kɨ dum Luwah goto.

³⁸ Mari el an: Oo mĩ ber kɨdẽ lo Bɨraɓe, kɨ ɗa sem kɨgo tat loi. Malaika ɓai, na nyàa.

Mari aw oo Elijabet

³⁹ Kam ndɔt'n non Mari ɓai kanangbe aw dɔning mbalbot, ɓet mad kɨ dɔning Judet,

⁴⁰ and kuju lo Jakari, ɗa lapia Elijabet.

⁴¹ Lon Elijabet oo dɔ lapia lo Mari ye, ngon kɨ kamat ɓa ruru. Elijabet ɗoosɨ kɨ Ndil Kɨkunjɗang.

⁴² Ko kɨ ndɨn kɨbobe an: Ĩla ĩ ngemajkurr ku dekɨdẽgt ye, ngon kooji tɔ a i ngemajkurr.

⁴³ Titbãi m'ngan maj titbe mbã kõ Bɨraɓe lom ɗen romt a?

⁴⁴ Kɨtɔ oo. Lon lapia loi so mbimt ye, tentenbe ngon kɨ kammt roa nela, ad ɓa ruru.

⁴⁵ Ĩ ngeronel tɔ, ĩn ad kami: Nyag'n elɨn kokɨro Bɨraɓet, a ɗan nya.

Pa lo Mari

⁴⁶ Mari el an: Rom ndɨ ɔsɨgon Bɨraɓe.

⁴⁷ M'ɗa ronel kam ndilɨmt dɔ Luwaht kɨ ngekajɨm.

⁴⁸ Kɨtɔ oo kumtondo lo ɓer lon kɨdẽ. Oo, nẽbe kɨ nõt ngakaa deg tube a kunmɨn ngeronel.

⁴⁹ Kɨtɔ Luwah kɨ Ngetɔg tube ɗa sem nyag kɨbobo, tɔa i kɨkunjɗang.

⁵⁰ Oo kumtondo lo ngeɓoolag kɨ dɔ ngakaat kɨ ngakaa.

⁵¹ Ɔj deg tɔg jin, tɨnda ĩgɨn ndɨn kɨ tagahg kɨ go lo dɔsɨrt ngarkamdt tĩ kɔ.

⁵² Ɔrr ngékõɓeg kɔ dɔ pong kõɓegt lod, na tɔi de kɨ sɔlg kɨ dõ.

⁵³ Ad deg'n ɓo ɗad ndanɨn kɨ nyag kɨmaj, na ad ngénya awɨn jid kari.

⁵⁴ Ɗa kɨ ɓer lon Israel, kɨta gah dɔ kookumtondot lon,

⁵⁵ tit'n elɨn bɔwjg kɨdɔ Abrahamt kɨ ngakaa mbãkɨnõt.

⁵⁶ Mari ndɨ kɨ Elijabet asɨ nah mɨta kamla tel kɨ ɓe lon.

Kooj Jã ngeɗa deg baptem

⁵⁷ Lon ndɔ kooj ngon asɨ ye, Elijabet ooj ngon kɨdɨngã.

⁵⁸ Madɓeag kɨ noojag oon hoi maj kɨ Bɨraɓe ɗa sia, na ɗan sia ronel tɔ.

⁵⁹ Dɔ ndɔt kɨ kõ jijoo, ɗen kad kɨ njan gaj ngon kɨ kasɨ, ɗa kɨ'n ndahn tɔa Jakari go tɔ Bɔwat.

⁶⁰ Na kõa tur an: I be al; na a ndahn tɔa Jã.

⁶¹ Elɨna anan: De mad kɨ tɔa i titbe ku noojgt goto.

⁶² Mbɔjɨn bɔwa kɨ jid kad ad'd gerɨn tɔ'n ndig kad ndah.

⁶³ Jakari kɔ bar mad, ndang nya tit an: Tɔa i Jã. Taa ya deg tube.

⁶⁴ Tentenbe ta Jakari tee, ndõa tut, ad elta ndubɨn Luwah.

⁶⁵ Ɓool ɗa madɓeag tube, hoita nyag'n non tĩ kɨ log kɨ dɔning mbalbot tube kam dɔning Judet.

⁶⁶ Deg tube, ĩgɨn oon hoi nyag'n non ye, gaan dɔt anan: Ngon 'nten ye, a tel ɗi a? Kɨtɔ tɔg ji Bɨraɓe ĩ nat sia.

Pa lo Jakari dɔ nyagt kɨ a ɗen

⁶⁷ Bɔwa Jakari ɗoosɨ kɨ Ndil Kɨkunjɗang ad ndɔ ndil an:

⁶⁸ Ad kɨ ndubɨn Bɨraɓe Luwah lo Israelag kɨta ɗe gen deg lon, na badɔd.

⁶⁹ Ɓai kɨ Ngekaj kɨ ngetɔg kɨtatɔj ku degt kɨ girrkooj Dabidt.

⁷⁰ Luwah elta titbe kɨta deg lon kɨjaɓat ngékelta kɨ tant, maɗi nu an:

⁷¹ N'a n'aj'j ji madngétajgt kɨ ji degt tube'n ndɨ ɔsɨjɨn ta ho.

⁷² N'a n'oo kumtondo lo Bɔwjg, n'an ga kamɨn dɔ kunkɔt lon kɨkunjɗang.

⁷³ Un kɔn kɨ yokɨnda ad Bɔwj Abraham an:

⁷⁴ N'a n'aj'j ji madngétajgt kad kɨ ɗa kɨla kɨ ndubaan kɨkanj ɓool.

⁷⁵ Kam nyaɗat kɨgo lo Luwaht kɨ kɨdenesew nõat kɨ ndɔjg tube.

⁷⁶ Na ĩ, ngon a kunɨn ngekelta kɨ ta Ngetɔitɔit kɨta a aw kete nõ Bɨraɓet kad i ɗago ɗobg loa.

⁷⁷ Nya'n a i lambera ad girrdeg loa laten: Luwah ndɨ aj deg kɨta ndɨ nyàgo majalg lod kɔ.

⁷⁸ Kɨtɔ õ kam Luwah loj ad oo kumtondo loj. Kaj a ɗe rojt kokɨdõ tit kɨ kunj bijalo kɨ ɓa,

⁷⁹ a ɔsɨ dɔ degt ngéndɨ kam ɗob lapiat.

⁸⁰ Ngon tɔg, ngang kam ndilɨnt. Ndɨ kam dɨlambot mbã ndɔt'n tee hɔi ku Israelagt.