Lebitik 9 - Maktub Ta Kumkajir

Ngejanyamosɨ lan girr kɨla

¹ Ndɔ kɨkõjijoo Moij kun Aarõ kɨ ngana nat kɨ kɨbog lo Israel,

² el Aarõ an: A i hɔ bɔw mang kɨɗa kɨta kadkari kutdɔ majal kɨbal bat kɨɗa kɨta kadkari kɨlahorr, tujoo a ĩn kɨkanj nya mad ɗad, na i tɔld nõ Bɨraɓet.

³ El Israelag an: I hɔn bal bĩã kɨɗa kɨta kadkari kutdɔ majal, kɨ ngon mang kɨɗa kɨ ngon bat kɨɗa kɨ ɓald i kɨɗa, tujoo kɨkanj nya mad ɗad, kɨta kadkari kɨlahorrt,

⁴ na bɔw mang kɨɗa kɨ bal bat kɨɗa kɨta kadkari kɨ kad kamsɔllom. I land nõ Bɨraɓet nat kɨ kadkari nduj kɨlɔi kɨ yib kɨta ɓone Bɨraɓe a tee hɔi kɨ rosɨt.

⁵ Ɗen kɨ nyag'n Moij ndad mbera kɨnõ kujkub ndɔdnat, na ngékawna tube ndɔt'n nderbe, ɗàn nõ Bɨraɓet.

⁶ Moij el an: Oon nya'n Bɨraɓe ndasɨ mbera kad i ɗan kɨtakad kunj Bɨraɓe kɨɗangeɗeng tee rosɨt.

⁷ Kamla Moij el Aarõ an: I ndɔt nderbe kɨ dɨngɨrt, i la kadkari kutdɔ majal loi, kɨ kadkari loi kɨlahorrt, na i la kadkari kɨtɔ majal loi kɨ kɨlo deg. I la kadkari, lo deg kɨta kutdɔ majal lod tit'n Bɨraɓe ndan mbera.

⁸ Titbe Aarõ ndɔt nderbe kɨ dɨngɨrt, jakɔ ngon mang kadkari kutdɔ majal lon.

⁹ Ngan Aarõ unɨn mosɨ adɨna, na la ngon jin kam mosɨt ɔdɨn dɔ gaj dɨngɨr, na mbel ndeg mosɨ girr dɨngɨrt.

¹⁰ La mbool dã kadkari kutdɔ majal kɨ munjo duna kɨjoo kɨ wura kɨbo horro dɔ dɨngɨrt tit'n Bɨraɓe ndan mbera Moij.

¹¹ Na la horr dãã kɨ ngɨraa gid gongt.

¹² Aarõ jakɔ kadkari kɨlahorr, ad ngana unɨn mosɨ adɨna ad Aarõ tud mosɨ dɔ dɨngɨrt gugɨn dɔ dɨngɨr.

¹³ Adɨna dã kadkari kɨlahorr kɨ gangɨn dɨtɨmdɨtɨm nat kɨ dɔa kad la horro dɔ dɨngɨrt.

¹⁴ Moij tugo tia kɨ njaa, na ũd horro dɔ dɨngɨrt nat kɨ kadkari kɨ lahort.

¹⁵ Kamla la kadkari lo deg. Un bal bĩã kadkari kutdɔ majal lo deg, jakɔa na laa kɨta kutdɔ majal lod tit'n ɗan kɨ kɨdasa.

¹⁶ La kadkari kɨlahorrt kɨgo mberkɨndat.

¹⁷ Goot gog la kadkari nduj. Ɔi ɗoosɨ jin, na ũ horro dɔ dɨngɨrt tit kadkari kɨlahorrt kɨsĩ.

¹⁸ Jakɔ bɔw mang kɨ bal batg'n adɨn kɨta kadkarit kad kamsɔllom, na ngan Aarõ adɨna mosɨ kad tud dɔ dɨngɨrt gugɨn dɔ.

¹⁹ Adɨna mbool bɔw mang kɨ bal bat, ɓonga kɨ mboola kɨ ut dɔ tia kɨ munjo duna kɨjoo kɨ wura kɨbo.

²⁰ Ndan mboola dɔ guat ad Aarõ la mboola horro dɔ dɨngɨrt.

²¹ Aarõ bii gua kɨ bɨnga kɨkõt nõ Bɨraɓet tit'n Moij ndan mbera.

²² Kamla Aarõ ɔi jin kɨ dõ dɔ degt njangɨn dɔd. Lon la kadkari kutdɔ majal kɨ kadkari kɨlahorr kɨ kadkari kɨ kad kamsɔllom woi ye, ɗisɨ dɔ dɨngɨrt kɨber.

²³ Moij kɨ Aarõ andɨn kam kujkub ndɔdnat. Goot gog teen kɨtɨga, na njangɨn dɔ deg na kunj Bɨraɓe kɨɗangeɗeng tee dɔ degt tube.

²⁴ Horr tee ko nõ Bɨraɓet, õ kadkari kɨlahorr nat kɨ mboola dɔ dɨngɨrt. Deg tube oon ad unɨn ndid kon ne kɨ ronel na son ber kɨ takumd.