Lebitik 8 - Maktub Ta Kumkajir

Kur yib ngéjanyamosɨ

¹ Bɨraɓe el Moij an:

² Un Aarõ kɨ ngana kɨ kub kɨ yib kurrdɔt kɨ bɔw mang kadkari kutdɔ majal kɨ bal batg joo kɨ keh kɨ ɗoosɨ kɨ kuɓɨr bɨna kɨkanj berrkasɨ,

³ na i kun ngekawna tube kɨnat tabit kujkub ndɔdnat.

⁴ Moij tɔ ɗa tit'n Bɨraɓe ela'n, na ngékawna kawɨn na tabit kujkub ndɔdnat.

⁵ Kamla Moij el ngékawna an: Oon 'nten la i nya'n Bɨraɓe nda mbera kad i ɗan.

⁶ Moij ad Aarõ kɨ ngana ndɔt'n kɨ ront na ndogd man.

⁷ La kub ro Aarõt, dɔ ɓoa kɨ kɨla dɔɓo, na la kubji kɨ ngal roat, nda epod dɔat na dɔ roat kɨ kɨla dɔɓo lo epod'n la roat.

⁸ La kub kutdɔ gu roat na nda Urim kɨ Tumim kam kub kutdɔ gut.

⁹ Nda jɔg dɔat kamla nda bar nar ɔr nõat nõ jɔgt kɨjaɓat tit'n Bɨraɓe nda'n mbera Moij.

¹⁰ Goot gog Moij un yib kurrdɔt tud dɔ londɨt kɨjaɓat kɨ nyag tube kɨ kamt kad teldɨn kɨjaɓat't.

¹¹ Tud dɔ dɨngɨrt nja tanãimɨta, tud dɔ dɨngɨrt kɨ nya ɗakɨlag tube nat kɨ bai kɨ njaa kɨta teldɨn kɨjaɓat.

¹² Mbel yib kurrdɔt dɔ Aarõt wuran kɨta tela kɨjaɓat.

¹³ Moij ad ngan Aarõ ndɔt'n kɨ roat, la kub rodt, dɔɔ ɓod'd kɨ kubdɔɓo na nda jɔg dɔdt tit'n Bɨraɓe nda'n mbera Moij.

Kadkari kutdɔ majal kɨ kadkari kɨlahorr

¹⁴ Moij ad ɗen kɨ bɔw mang kadkari kutdɔ majal na Aarõ kɨ nganɨn ndan jid dɔ bɔw mang kadkari kutdɔ majalt.

¹⁵ Moij jakɔa, un mosa la ngon jin mosɨt ɔdɨn gaj dɨngɨr tube, arɨn dɨngɨr kamla ũ ndeg mosɨ girr dɨngɨrt telan kɨjaɓat kɨta kutdɔ majal.

¹⁶ Moij ɔi mboola kɨ ut dɔ tia kɨ wura kɨbo kɨ munjo duna kɨjoo nat kɨ mboold, la horro dɔ dɨngɨrt.

¹⁷ Na la bɔw mang'n non horro, ngɨraa kɨ dãã kɨ kiã tube, gid gongt tit'n Bɨraɓe nda'n mbera Moij.

¹⁸ Kamla Moij ɗe kɨ bal bat kadkari kɨlahorr ad Aarõ kɨ ngana ndan jid dɔ bal bat't.

¹⁹ Moij jakɔa na tud mosa dɔ dɨngɨrt gugɨn dɔ.

²⁰ Lon gangɨn dã bal bat dɨtɨmdɨtɨm ye, Moij la dɔa kɨ ndegag kɨ mboola horro.

²¹ Lon tugon tia kɨ njaa, Moij la bal bat horro dɔ dɨngɨrt kɨtaagbe. I kadkari kɨlahorrt, i sé kɨkootmbĩ kɨ nel Bɨraɓe, i kadkari'n horr õa tit'n Bɨraɓe ndan mbera Moij.

Kadkari nda ngejanyamosɨ kɔtkokɨɗa

²² Kamla ɗe kɨ bal bat kɨkõjoo, bal bat ndah de kɔtkokɨɗa, na Aarõ kɨ nganɨn ndan jid dɔ bal bat't.

²³ Moij jakɔ bal bat'n non, un mosa ɔd tẽ ɔsɨn girr mbi Aarõ kokõ kɨ dɔ kɨbo jia kokõ kɨ dɔ kɨbo njaa kokõ.

²⁴ Ad ngan Aarõ ndɔt'n kɨ ront, ɔd mosɨ tẽ ɔsɨn girr mbid kokõ kɨ da kɨbo jid kokõ, kɨ dɔ kɨbo njad kokõ na tud ndeg mosɨ dɔ dɨngɨrt gugɨn dɔ.

²⁵ Kamla un mboola kɨ ɓonga kɨ mboola kɨ ut dɔ tia tube kɨ wura kɨbo kɨ munjo duna kɨjoo nat kɨ mboold kɨ bɨnga kokõ.

²⁶ Na un kuɓɨr bɨna kɨkanj berrkasɨ kɨɗa kɨ woina kɨkanj berrkasɨ kɨ lɔi kɨ yib kɨɗa kɨ bɨna kɨ ɗa yib dɔt kɨɗa. Ɔi nyag'n non kam keh ngom bɨnat kɨ lɔi kɨkanj berrkasɨ, ndad nat kɨɗabe kɨ mboola kɨ bɨnga kokõ.

²⁷ La nyag'n non tube ji Aarõt kɨ ngana kad bind kadkari kɨ bii nõ Bɨraɓet.

²⁸ Kamla Moij taa jidt, ũ horro dɔ dɨngɨr dɔ kadkari kɨlahorrt. I kadkari ndah de kɔtkokɨɗa, i kadkari kɨlahorrt, i sé kɨkootmbĩ kɨ nel Bɨraɓe.

²⁹ Moij un gu bal bat ndah de kɔtkokɨɗa, bii nõ Bɨraɓet. I gaj lo Moij tit'n Bɨraɓe nda'n mbera Moij.

Ndɔ nda ngéjanyamosɨ kɔtkokɨɗa

³⁰ Kamla Moij ɔd yib kurrdɔt kɨ mosɨ kɨdɔ dɨngɨrt, tud dɔ Aarõt kɨ kubg loa kɨ dɔ ngan Aarõt kɨ kubg lod. Titbe la telɨn Aarõ kɨ kubg loa kɨjaɓat kɨ ngana kɨ kubg lod nat sia.

³¹ Moij el Aarõ kɨ ngana an: I ndirrɨn dã'n non tabit kujkub ndɔdnat, na i sana kɨ bɨna kɨ kam keht kɨ ndah kɔtkokɨɗa tit'n m'ndasɨn mbera m'an: Aarõ kɨ nganɨn la a san ye.

³² Na ndeg dã kɨ bɨna kɨnãi ye, a i ũn horro ad õ kɔ.

³³ Kam ndɔt kɨtanãimɨta a i teen tɨga tabit kujkub ndɔdnat al, mbã ndɔ ndasɨ kɔtkokɨɗa asɨ kamtã, kɨta ndɔ kɨtanãimɨta i ndɔ ndasɨ kɔtkokɨɗa.

³⁴ Nya'n i ɗan ɓone i nya'n Bɨraɓe nda mbera kad ɗan kɨta kutɨn dɔ majal losɨ.

³⁵ A i ndɨn tabit kujkub ndɔdnat ndɔ ho kada ho, mbã ndɔ tanãimɨta, a i ngomɨn go mberkɨnda lo Bɨraɓe kɨtakad i oin al. Titbe la ndamɨn ne mbera ye.

³⁶ Aarõ kɨ nganɨn ɗan nyag tube'n Bɨraɓe nda mbera Moij.