Lebitik 7 - Maktub Ta Kumkajir

Ɗob la kadkari tɔidɔta

¹ 'Nten i mberkɨnda dɔ kadkari tɔidɔtat. I nyan kɨjaɓat kɨtɔitɔi.

² A jan kɔ kadkari tɔidɔta kam lot'n a jan kɔ dã kadkari kɨlahorr tit. A tudɨn mosa dɔ dɨngɨrt gugɨn ne dɔ tube.

³ A lan mboola tube kɨ ɓonga kɨ mboola kɨ ut dɔ tia,

⁴ kɨ munjo duna kɨjoo kɨ mboola kɨ dɔt kɨ kɨkadat kɨ wura kɨbo'n ɔrr nat kɨ munjo duna.

⁵ Ngejanyamosɨ a la nyag'n non horro dɔ dɨngɨrt, i kadkari kɨlahorr nõ Bɨraɓet. I kadkari tɔidɔta.

⁶ Dekɨdɨngã kɨɗen ku ngejanyamosɨgt a sa. A sa kam lot mad kɨjaɓat, i nya kɨjaɓat kɨtɔitɔi.

⁷ Kadkari tɔidɔta i tit kɨ kadkari kutdɔ majal, mberkɨnda i kɨɗabe kɨta kadkarig kɨjoo'n non. Dãã a i lo ngejanyamosɨ'n a laa kɨta kutdɔ majal nõ.

Gaj lo ngejanyamosɨ kadkari

⁸ Ngira dã kɨ la kadkari kɨlahorrt a i lo ngejanyamosɨ'n la kadkari kɨ to de'n non.

⁹ Kadkari nduj kɨɗen kɨ tɨnga kam purrt, ke kɨ la gajot, ke kɨ tɨnga dɔ horrt a i lo ngejanyamosɨ in la kadkari'n non.

¹⁰ Kadkari nduj kɨɗen kɨ lɔi kɨ yib ke kɨkanj yib a i lo ngan Aarõ tube, ĩn tube a ngahn asɨna.

Ɗob la kadkari kɨ kad kamsɔllom

¹¹ 'Nten la i mberkɨnda dɔ kadkarigt kɨ kad kamsɔllom'n de a la ad Bɨraɓe.

¹² Ĩla kadkari loa 'nten i kadkari ɗa mersi a ne, a ad kadkari nat kɨ kadkari oiyo, ad i oina kɨ lɔi kɨ yib kɨkanj berrkasɨ, ke bɨna kɨkanj berrkasɨ kɨ ɗa yib dɔt, ke nduj kɨtoletlet kɨ lɔi kɨ yib la dɔ horrt.

¹³ Nat kɨ kadkarig kɨ kad kamsɔllom lon'n ad tit kadkari ɗa mersi, a ad bɨna kɨ ɗa kɨ berrkasɨ.

¹⁴ Kam kadkarit kɨɗen a un bɨna kɨɗa kadkari kɨ la kad Bɨraɓe. A i lo ngejanyamosɨ'n tud mosɨ kadkarig kɨ kad kamsɔllom.

¹⁵ Dã kadkari ɗa oiyo ĩn i kadkari kɨ kad kamsɔllom, a san ndɔt'n lan ne kadkari'n non. A nyan mbã loti dɔt al.

¹⁶ Ĩla kadkari lo de i kadkari tɔlkon kunkɔ ke kadkari kamndig a ne, a sa ndɔt'n non na ndega kɨnãi a sa loti.

¹⁷ Ndeg dã kadkari kɨnãi mbã ndɔ kɨkõmɨta, a lan horro.

¹⁸ Ĩla de mad sa dã kadkari lon kɨ kad kamsɔllom ndɔt kɨkõmɨta a ne, Bɨraɓe a taa kadkari loa al, a tɨda maj loa dɔat al. I nya kɨyerr, de'n sa a ne, a to ɗagootal lon dɔnt.

¹⁹ Dã'n ɔd nya mad kɨyerr a ne, a san al. A lan horro. Dekɨɗen kɨkar nyang asɨ sa dã,

²⁰ na de kɨyerr'n sa dã kadkari kɨ kad kamsɔllom lo Bɨraɓe a ne, a nujɨn de'n non kɔ ku degt loa.

²¹ Ĩla de mad ɔd nya mad kɨyerr, ke nya kɨyerr kɨ ro det, ke dã kɨyerr, ke nya kɨyerr kɨ ɗi, na sa dã kadkari kɨ kad kamsɔllom lo Bɨraɓe a ne, de'n non a nujɨna kɔ ku degt loa.

Mberkɨndag kɨta ngan Israelg

²² Bɨraɓe el Moij an:

²³ El Israelag an: A i san mbool dã mad al, ke mang, ke bat, ke bĩã.

²⁴ A i san mbool dã mad kɨkoi ke ĩn dã kɨ mut hɔa al. A i ɗan ne kɨla kɨɗen na a i san al bat.

²⁵ Kɨtɔ dekɨɗen'n sa mbool dã kadkari kɨlahorrt kad Bɨraɓe a ne, a nujɨna kɔ ku degt loa.

²⁶ Lokɨɗen'n a i ndɨnt a ne, a i san mosɨ al, ke i mosɨ yel ke dã.

²⁷ Dekɨɗen'n sa mosɨ ke i mosɨ dã kɨ ɗi a ne, a nujɨn de'n non kɔ ku degt loa.

²⁸ Bɨraɓe el Moij an:

²⁹ El Israelag an: De'n ɗe kɨ kadkari kɨ kad kamsɔllom ad Bɨraɓe a ne, a ad gaj kadkari kɨ kad kamsɔllom lon,

³⁰ a ɗen kɨ jin ad Bɨraɓe. I kadkari kɨ lahort. A ɗe kɨ mbool dã kɨ gua, i kadkari kɨ bii nõ Bɨraɓet.

³¹ Ngejanyamosɨ a la mboola horro dɔ dɨngɨrt, na gua a i lo Aarõ kɨ ngana.

³² A adɨn ngejanyamosɨ bing dã kɨ kokõt kam kadkarigt losɨ kɨ kad kamsɔllom.

³³ Ku ngan Aarõt de'n la kadkari mosɨ dã kɨ mboola kadkari kɨ kad kamsɔllom a ne, ĩ la a ngah bing dã kɨkokõt gajt lon ye.

³⁴ Kɨtɔ m'taa gu dã kɨ bɨnga ji Israelagt ko kam kadkarigt lod kɨ kad kam sɔlom mad Aarõ ngejanyamosɨ kɨ ngana. I gaj lod ko ro Israelagt mbãkɨnõt.

³⁵ Ĩn non i gaj lo Aarõ kɨ ngana ko kam kadkarigt kɨlahorr nõ Bɨraɓet'n adɨnd ndɔt'n ndahnd ne kad ɗan kɨlaɓer janyamosɨ kɨta Bɨraɓe.

³⁶ Bɨraɓe ndamber Israelag kad kɨ adɨnd ndɔt'n wurɨnd ne yib. I mberkɨnda kɨ tokɨnõ kɨ ngakat kɨ ngaka.

³⁷ 'Nten la i mber kɨ ndah dɔ kadkari kɨlahorrt, kɨ kadkari nduj, kɨ kadkari kutdɔ majal, kɨ kadkari tɔidɔta kɨ kadkari ndah de kɔtkokɨɗa kɨ kadkari kɨ kad kamsɔllom.

³⁸ Bɨraɓe ndamber Moij dɔ mbalbo Sinait lon nda'n mber Israelag kad ɗen kɨ kadkarig lod adɨn Bɨraɓe kam dɨlalot kɨ Sinai.