Lebitik 5 - Maktub Ta Kumkajir

Kadkari kɨta ta kɨ dɔ det

¹ Ĩla de mad nda yo kad'n man naj dɔ nyat mad'n oo ke ger na eltaa al a ne, ta majal loa i dɔat.

² Lon de mad ɔd nya kɨyerr kanj ger go, ad i nin dã kɨyerr, ke i nin dã kɨmut ke kɨɓe, ke nin nyakɔrrkɔd ber, ĩ kɨɓe kɨdɔn a tel kɨyerr, na ta i dɔat.

³ Lon ɔd nya mad kɨyerr ko ro det kanj ger go kamla ger a ne, ta i dɔat.

⁴ Lon de mad elta kanangbe, ndan yo kɨmajal ke kɨmaj, na ger al, kamla ger a ne, ta i dɔat.

⁵ Ĩla de mad aw kɨ ta dɔnt kɨta kɨkɨɗa ku nyagt 'nten a ne, a tɔ tan dɔ majalt lon,

⁶ na a ɗe kɨ kadkari kɨtɔ majal lon, ad i kõ dã kam nyakulgt kɨdu, ke bat ke bĩã, kadkari kutdɔ majal, na ngejanyamosɨ a laa kadkarit kɨta kutɨn dɔ majal loa.

Kadkari lo ngéndog

⁷ Ĩla tɔga asɨ ngah bat ke bĩã al a ne, a ɗe kɨ derngɔt joo ke ngan derkul joo kɨtɔ majal lon, kɨkɨɗa a i kadkari kɨtɔ majal, kɨkɨɗa a i kadkari kɨlahorrt.

⁸ A hɔd, ɗe sed ro ngejanyamosɨt, ĩ tɔ a la der kadkari kɨta kutdɔ majal dasa, a hɔ kɔa teet, na a ɔrr dɔa kɔ al.

⁹ A tud mosɨ kadkari kutdɔ majal kad dɨngɨrt, na ndeg mosɨ a mbel girr dɨngɨrt. I kadkari kutdɔ majal.

¹⁰ A la der kɨmad kadkari kɨ lahort kɨgo mberkɨndat. Titbe la ngejanyamosɨ a ɗan kɨta kutɨn dɔ majal'n de'n non ɗa, na a nyan go majal loa kɔ.

¹¹ Ĩla tɔga asɨ ngah derngɔt joo ke ngan derkul joo al a ne, a ɗe kɨ kadkari lon kɨtɔ majal kɨ ɗa, ad i kɨlo nduj mɨta kadkari kutdɔ majal, a ũ yib dɔt al, a ũ nõkag kɨkootmbĩ tit al tɔ kɨta i kadkari kutdɔ majal.

¹² A ɗen ro ngejanyamosɨt na ngejanyamosɨ a ɔi gaj nyagakamdɔt kɨ jin laa horro dɔ dɨngɨrt dɔ kadkarig kɨlahorrt nõ Bɨraɓet. I kadkari kutdɔ majal.

¹³ Tɨbe la ngejanyamosɨ a ɗan kɨtɔ kutɨn dɔ majal lo de'n ɗa kɨkɨɗa ku nyagt'n non, na a nyan go majal loa kɔ. Ndeg nduj kɨnãi a i lo ngejanyamosɨ tit kadkari nduj.

Kadkari nyàgo kɔ kɨta tɔidɔta

¹⁴ Bɨraɓe el Moij an:

¹⁵ Ĩla de mad ɗagootal, ɗa majal kɨ kamndig al, dɔ kɨkɨɗat ku nyagt kɨnda kɔtkokɨɗa kɨta Bɨraɓe a ne, a ɗe kɨ kadkari tɔidɔta ad Bɨraɓe, ad i bal bat kɨkanj nya mad ɗaan una ku ɓut't kɨgo gat nar arjãt ad i nar kɨ kam lot kɨjaɓat. I kadkari tɔidɔta.

¹⁶ A tel ba nya kɨndah kɔtkokɨɗa'n ɗan gootal, a la gaj kɨɗa ku kɨmit dɔt na a ad ngejanyamosɨ. Ngejanyamosɨ a laa kɨta kutɨn dɔ majal loa nat kɨ bal bat kadkari tɔidɔta na a nyan go majal loa kɔ.

¹⁷ Ĩla de mad ɗa majal kɨkanj ger go ad tɔi dɔ kɨkɨɗa ku mberkɨndagt lo Bɨraɓe, nya kɨ sumba ɗa al, ta i dɔat na a to ɗagootal lon dɔnt.

¹⁸ A ad ngejanyamosɨ bal bat kɨkanj nya mad ɗaan una ku ɓut't kɨ oa asɨ ta gat kadkari tɔidɔta. Ngejanyamosɨ a laa kɨta kutɨn dɔ majal loa'n ɗa kɨkanj ger go na a nyan go majal loa kɔ.

¹⁹ I kadkari tɔidɔta. De'n non kete aw kɨ ta dɔnt nõ Bɨraɓet.

Ta dɔ tel kɨ nya kad gog

²⁰ Bɨraɓe el Moij an:

²¹ Ĩla de mad ɗa majal ndoorɨn Bɨraɓe ad el madɓen takɨbal dɔ nyat'n ada kad ngom ke ɓoog nya, ke ta nya mad kɨlo ngetɔgt ji madɓent,

²² ke ɓà nya mad kɨnãi na nda yo kɨngom dɔt, ke ɗa nya kɨkɨɗa ku nyagt'n deg ndɨ ɗan.

²³ Ĩla ɗa majal titbe ad ta i dɔat a ne, a tel kɨ nya'n ɓoog ke nya'n taa kɨlo ngetɔgt, ke nya'n ada kad ngom, ke nya'n nãi na baa,

²⁴ ke nya kɨɗen'n nda yo kɨngom dɔt. A tel ad tube na a la gaj kɨɗa ku kɨmi dɔt ad de'n nya'n non i loa ndɔt'n non lon ɗen kɨ kadkari tɔidɔta lon.

²⁵ A ɗe kɨ kadkari tɔidɔta lon ad ngejanyamosɨ nõ Bɨraɓet, ad i bal bat kɨkanj nya mad ɗaa ku ɓut't kɨ ooa ad asɨ ta gat kadkari tɔidɔta.

²⁶ Ngejanyamosɨ a laa kɨta kutɨn dɔ majal loa nõ Bɨraɓet na a nyan go majal loa kɔ, ke majal kɨ ɗi'n ɗa ad ta ĩn dɔat.