Lebitik 3 - Maktub Ta Kumkajir

Kadkari kɨ kad kamsɔllom

¹ Lon de mad a la kadkari kɨ kad kamsɔllom, ĩla ad dã kɨbo, kɨdɨngã ke kɨdẽ a ne, a ad dã kɨkanj nya mad ɗaa nõ Bɨraɓet.

² A nda jin dɔ dã kadkarit, na a jakɔa nõ tabit kujkub ndɔdnat. Ngan Aarõ ngejanyamosɨ a tudɨn mosa dɔ dɨngɨrt gugɨn ne dɔ tube.

³ Kokam kadkarit kɨ kad kamsɔllom 'nten a ad kadkari kɨlahorrt nõ Bɨraɓet, ad i mboola kɨ ut dɔ tia kɨ mboola kɨ tiat tube,

⁴ kɨ munjo duna kɨjoo kɨ mboola kɨdɔt kɨ kɨkadat kɨ wura kɨbo'n a ɔrr nat kɨ munjo duna.

⁵ Nyag'n non ngan Aarõ a lan horro dɔ dɨngɨrt dɔ kadkari kɨlahorrt'n to dɔ kirt dɔ horrt. I kadkari kɨlahorrt, i sé kɨkootmbĩ kɨ nel Bɨraɓe.

⁶ Ĩla ad Bɨraɓe kadkari kɨ kad kamsɔllom dã kɨdu, kɨdɨngã ke kɨdẽ, a ad dã kɨkanj nya mad ɗaa.

⁷ Ĩla kadkari loa i ngon bat a ne, a laa nõ Bɨraɓet,

⁸ a nda jin dɔ kadkarit lon, a ja kɔa nõ kujkub ndɔdnat na ngan Aarõ a tudɨn mosa dɔ dɨngɨrt gugɨn ne dɔ tube.

⁹ Kokam kadkarit kɨ kad kamsɔllom 'nten a ad kadkari kɨlahorrt nõ Bɨraɓet, ad i mboola kɨ ɓonga kɨtaagbe'n ɔrr kad kɨnga gidat kɨ mboola kɨ ut dɔ tia kɨ mboola kɨ tiat tube,

¹⁰ kɨ munjo duna kɨjoo kɨ mboola kɨdɔt kɨ kɨkadat kɨ wura kɨbo'n ɔrr nat kɨ munjo duna.

¹¹ Nyag'n non ngejanyamosɨ a la horro dɔ dɨngɨrt. I nyasa kɨlahorro nõ Bɨraɓet.

¹² Ĩla kadkari loa i bĩã a ne, a laa nõ Bɨraɓet,

¹³ A nda jin dɔat, a jakɔa nõ kujkub ndɔdnat, na ngan Aarõ a tudɨn mosa dɔ dɨngɨrt gugɨn ne dɔ tube.

¹⁴ Kokam kadkarit'n non a ad kadkari kɨlahorr nõ Bɨraɓet, ad i mboola kɨ ut dɔ tia kɨ mboola kɨ tiat tube.

¹⁵ Munjo duna kɨjoo kɨ mboola kɨ dɔt kɨ kɨkadat kɨ wura kɨbo'n ɔrr nat kɨ munjo duna.

¹⁶ Ngejanyamosɨ a la horro dɔ dɨngɨrt. I nyasa kɨlahorro, i sé kɨkootmbĩ kɨ nel Bɨraɓe, mboola tube i lo Bɨraɓe.

¹⁷ 'Nten i mberkɨnda kɨ tokɨnõt kɨ ngakat kɨ ngaka kam lot kɨɗen'n a i ndɨnt. A i san mbool dã ke mosa al.