Lebitik 27 - Maktub Ta Kumkajir

Ta dɔ yokɨndat

¹ Bɨraɓe el Moij an:

² El Israelag an: Ĩla de mad un kɔn kɨ yokɨnda dɔ det ad Bɨraɓe a ne, a ad kɨgo gatt'n ĩ a ɔj.

³ Gat'n i a ɔj kɨta de kɨdɨngã kɨ ɗa ɓal dɔjoo mbã ɓal dɔkɨbojidet a ne, a i nar arjã dɔmi kɨgo nart kɨ kam lot kɨjaɓat.

⁴ Ĩla i dekɨdẽ a ne, gata'n a i ɔj a i nar arjã dɔmɨta.

⁵ Kɨtɔ ngon kɨdɨngã kɨ ɗa ɓal mi mbã ɓal dɔjoo a ne, a i ɔj nar arjã dɔjoo na kɨta ngon kɨdẽ taa ne, a i nar kɨlah.

⁶ Kɨtɔ ngon kɨdɨngã'n ɗa nah kɨɗa mbã ɓal mi a ne, a i ɔj nar arjã mi na kɨta ngon kɨdẽ, taa ne, a i nar arjã mɨta.

⁷ Kɨtɔ dekɨdɨngã kɨ ɗa ɓal dɔkɨbojidet ke tɔi a ne, a i ɔj nar arjã kɨlah gidaimi, na kɨta dekɨdẽ taa ne, a i nar arjã kɨlah.

⁸ Ĩla de'n un kɔn kɨ yokɨnda nõ i ngendo na asɨ ba gat'n i ɔj al a ne, a aw sia nõ ngejanyamosɨt na ngejanyamosɨ a ɔj gata kɨgo tɔgt lo ngekunkɔ kɨ yokɨnda.

⁹ Ĩla i ta lo dã'n deg adɨn kadkarit Bɨraɓe a ne, dã kɨɗen'n de a ad a i kɨjaɓat kɨta Bɨraɓe.

¹⁰ De a mbel gida al, a hɔ kɨmaj ɔrrɨn got kɨmajal al, a hɔ kɨmajal ɔrrɨn got kɨmaj al tɔ. Ĩla unɨn dã mad i mbelɨn kɨ kɨmad a ne, ĩn tujoo a ĩn nya kɨjaɓat kɨta Bɨraɓe.

¹¹ Ĩla i dã kɨyerr'n de asɨ la kadkarit kad Bɨraɓe al a ne, de'n non a ɗe kɨ dã'n non ro ngejanyamosɨt,

¹² na ngejanyamosɨ a ɔj gata kɨgo majat ke kɨgo majat al, gat'n ngejanya mosɨ ɔj la a i gata ye.

¹³ Ĩla de'n non ndɨg kɨ n'badɔ dã'n non a ne, a la gaj kɨɗa ku kɨmit dɔ narat.

¹⁴ Ĩla de mad nda kuj lon tadang ad Bɨraɓe a ne, ngejanyamosɨ a ɔj gata kɨgo maj kujt'n non ke kɨgo majat al, gat'n ngejanyamosɨ ɔj nõ la a i gata ye.

¹⁵ Na ĩla de'n gang kuj lon tadang nõ ndig badɔa gog a ne, a la nar gaj kɨɗa ku kɨmit do narat na kuj a i loa gog.

¹⁶ Ĩla de mad gang nusɨ ndɔɔ nyanduba lon tadang ad Bɨraɓe a ne, a i ɔj gata kɨgo kum nyakot'n deg a dubɨnt, a i nar arjã dɔmi kɨta homer nyako ɔrj kɨɗa.

¹⁷ Ĩla gang nusɨ ndɔɔ lon tadang ad Bɨraɓe kam ɓal ronelt a ne, gat'n i ɔj a to lo tont,

¹⁸ na ĩla i go ɓal ronelt la gangɨn nusɨ ndɔɔ lon tadang ad Bɨraɓe a ne, ngejanyamosɨ a ɔj gata kɨgo ndeg ɓalt kɨnãi mbã ɓal ronelt, na a i ɔrr nusɨ nar'n i ɔj nõ ada.

¹⁹ Ĩla de'n gang nusɨ ndɔɔ lon ta dang ad Bɨraɓe ndig badɔa a ne, a la nar gaj kɨɗa ku kɨmit do narat'n i ɔj na ndɔɔ a i loa.

²⁰ Na ĩla ndig badɔ nusɨ ndɔɔn non al, ke ndugoa kɔ kɨ de mad, a asɨ badɔa gog al ta.

²¹ Lon tee kam ɓal ronelt ye ngendɔɔ a tĩ nya ndɔɔn non na a i kɨjaɓat kɨta Bɨraɓe tit nya kɨndah kɔtkokɨɗa, a tel nyakagɓe lo ngejanyamosɨ.

²² Ĩla de mad gang ndɔɔ lon kɨ ndugo tadang ad Bɨraɓe, na ndɔɔn non i nyakagɓe loa'n õ nduba al a ne,

²³ ngejanyamosɨ a ɔj gata mbã ɓal ronel, na de'n non a ad nara Bɨraɓe ndɔt'n non, i nya kɨjaɓat kɨta Bɨraɓe.

²⁴ Kam ɓal ronelt ndɔɔ a tel kɨ ji ngendugoat gog, ad i ji det'n i nyakagɓe loa maɗi kɨgo kõndubat.

²⁵ Gatg tube'n a ɔj a ĩn kɨgo nar arjã kɨ kam lot kɨjaɓat. Sikel kɨɗa asɨ gera dɔjoo.

Nyag lo Bɨraɓe

²⁶ De mad a asɨ nda ngonderr nyakul lon kɔtkokɨɗa kɨta Bɨraɓe al, ke ngonderr mang ke bat, kɨta i lo Bɨraɓe kete,

²⁷ Ĩla i dã kɨyerr a ne, a ban dɔa kɨgo gatt'n i ɔj na a la nar gaj kɨɗa ku kɨmit dɔt, na ĩla ban dɔa al a ne, a ɗawɨna kɔ kɨgo gatt'n i ɔj.

²⁸ Nya kɨɗen'n de a ɔrr kam nyagt lon nda tadang kɨta Bɨraɓe, ke i de, ke dã, ke ndɔɔ kam nyakagɓet lon, asɨ ndugo kɔ ke badɔa gog al. Nya kɨɗen'n de nda tadang kɨta Bɨraɓe a ne, i kɨjaɓat kɨtɔitɔi kɨta Bɨraɓe,

²⁹ Dekɨɗen'n takɨgang i dɔat kad tɔlɨna kɔ, de asɨ badɔa goto, de'n non a tɔlɨna kɔ.

³⁰ Gaj kɨɗa ku kɨkɨlaht lo kand nya kɨ dɔningt, ke kand kagg tube i lo Bɨraɓe, i nya kɨjaɓat kɨta Bɨraɓe.

³¹ Ĩla de mad ndig badɔ nya lon kam gaj kɨɗa ku kɨkɨlaht a ne, a la gaj kɨɗa ku kɨmit dɔ narat,

³² Dã kɨbo ke dã kɨdu tube, dã kɨkõkɨlah kɨɗen'n tɔi girr kagtɔsɨt kɨ ji ngekulnyat'n kɨjaɓat kɨta Bɨraɓe,

³³ De a nɔl dã'n non kad ooa ke i dã kɨmaj, ke kɨ majal al, de a mbel gida al tɔ. Ĩla mbelɨna kɨ dã mad kɨɗang a ne, ĩn tujoo a ĩn kɨjaɓat kɨta Bɨraɓe. De a badɔd al.

³⁴ Ĩgɨn ten la ĩn mberkɨndag ĩn Bɨraɓe ad Moij kɨta Israelag dɔ mbalbo Sinalt ye.