Lebitik 25 - Maktub Ta Kumkajir

Ɓal taakò kɨ ronel

¹ Bɨraɓe elta kɨ Moij dɔ mbalbo Sinait an:

² El Israelag an: Lon a andɨn kam dɔningt'n m'ndɨ m'adsɨ ye, a i nyan dɔning ad ngah taakò kɨta Bɨraɓe.

³ A i duw nya kam ndɔɔt loi ɓal kɨbojidet, kam ɓalt kɨbojidet a i ja dɔj dĩndu loi, na i kaw kanda,

⁴ na ɓal kɨkõtanãimɨta a i ɓal taakò, i kaglo taakò kɨta dɔning, i ɓal taakò kɨta Bɨraɓe. A i duw nya kam ndɔɔt loi al, a i ja dɔj dĩndu loi al tɔ,

⁵ Kumnya'n so na ɓa kɨdɔn kam ndɔɔt loi, a i ja kɨta roi al, dĩndu'n i ja dɔjia al, a i ja kanda kɨta roi al tɔ. A i ɓal taakò kɨta dɔning.

⁶ Kand nya kɨ tee dɔningt kam ɓal taakòt, a i nyasa losɨ, ĩ kɨ ɓer loi kɨdɨngã kɨ kɨdẽ, kɨ ngeɗakɨla loi kɨ mbah'n hɔ londɨ roit,

⁷ nyakul loi kɨ dãg kɨ kam dɔningt loi. Kand nya'n non tube a ĩn nyasa.

Ta dɔ ɓal nya dõt

⁸ A i tɨda ɓal taakò tanãimɨta, ad i ɓal tanãimɨta nja tanãimɨta, na kaglo ɓal taakò kɨtanãimɨta tube a tee ɓal dɔsɔɔ gidaijikɨɗa kɨtɔsɨ.

⁹ Ndɔ kɨkɨlah lo nah kɨkõtanãimɨta ye, a i ad kunɨn towmand kɨtɔg ngãi, ndɔ badɔt a i la ad kunɨn towmand kam dɔningt losɨ kɨtaagbe.

¹⁰ A i ngomɨn go ɓal kɨkõdɔmi kad i kɨjaɓat rosɨt, a lan mber taa nya dõ kɨ ro ngéndɨ dɔningt tube. A i ɓal ronel, ad i kun towmand, dekɨɗen a tel kɨ kam nyakagɓet lon, dekɨɗen a tel kɨ ro noojɨngt gog,

¹¹ Ɓal kɨkõdɔmi a i ɓal ronel kɨtɔsɨ. A i duwɨn nya mad kam ndɔɔt al, a i jan nya mad'n and kɨdɔn kamt al ke kawɨn kand dĩndu'n i jan dɔjia al.

¹² Kɨtɔ i ɓal ronel, a oona tit nya kɨjaɓat. A i san kand nya kɨ kam ndɔɔt losɨ.

¹³ Kam ɓal ronelt'n non dekɨɗen kusɨt a tel kɨ kam nyakagɓet lon gog.

¹⁴ Ĩla i ɗaw nya loi mad kɔ ro madɓeit, ke i ndugo nya mad ro madɓeit, ot kad i goolɨn na.

¹⁵ A i ndugo nya ji madɓeit kɨgo kɔr ɓalg go ɓal ronelt, na a i ndugo jiat kɨgo kɔr ɓal teet nyat kɨnãi.

¹⁶ Ĩla ɓal i ngãi a ne, a la gata dɔt, ĩla ɓal i ngãi al a ne, gata a i ngãi al ho, kɨta a i ndugo sia kɨgo kɔr ɓal teet nyat kɨ nãi.

¹⁷ Ot kad de mad ɗagootal kɨ madɓen, na i ɓool Luwah loi kɨta mĩ, Bɨraɓe Luwah losɨ.

¹⁸ A i hɔn ɗan go mberkɨndagt lom, a i ngomɨn go tagkɨgang lom kad i ndɨn kɨ lapia kam dɔningt.

¹⁹ Dɔning a tee kɨ kandɨn, a i sa ndenɨn, na a i ndɨnt kɨ lapia,

²⁰ na ĩla i elɨn anan: Ɗi j'a kɨ sa kam ɓalt kɨkõtanãimɨta ĩla kɨ duw nyako al, kɨ ja nyako al tɔ a?

²¹ M'a m'adsɨ majkurr lom kam ɓalt kɨkõkɨbojidet na dɔning a tee kɨ kand kɨ asɨ ɓal mɨta.

²² Ɓal kɨkõjijoo a i duwɨn nyako, na a san kɔkɨ nyako kɨkete mbã ɓal kɨkõjikɨɗa, mbã i jan nyako kɨkij, a i san kɔka ɓaitɔ.

Ta dɔ badɔ nyakagɓet

²³ A i ɗawɨn dɔning kɔ mbãkɨnõt al, kɨta dɔning i lom, kɨta ĩn mbahg kɨ ngéhɔlondɨ kam dɔningt lom.

²⁴ Kam dɔningt kɨtaagbe'n a i taan nyakagɓet, a i nyan ɗob kad badɔ dɔning.

²⁵ Ĩla ngonkõi so ndot ad ɗaw gaj nyakagɓe lon kɔ ngonkõa kɨ nderbe a ɗe badɔ nya'n ngonkõn ndugo kɔ nõ.

²⁶ Ĩla de'n non, de loa kɨ kad badɔ goto na ĩ kɨɓe kɨdɔn ngah nya a ne, a ban dɔ.

²⁷ Ad tɨda ɓalg'n ɗawɨn nya lon kɔ, a tel ad nar ɓal kɨnãi nõ de'n ndugo sia na a tel kɨ kam nyakagɓet lon gog,

²⁸ Na ĩla ngah nya kɨ asɨ taan dɔning lon gog al a ne, nya'n ɗaw kɔ nõ a to ji ngendugoat mbã ɓal ronel. Kam ɓal ronelt nõ ngeɗawa a tel ta nyakagɓe lon gog na ngendugo sia a tee kamt kɔ.

²⁹ Ĩla de mad ɗaw kuj ndɨn kam ɓebot'n aw kɨ ndogbɔrr gugdɔ, a asɨ badɔ kuj'n ɗan kam ɓalt kɨkɨɗa kan tɔga asɨ a badɔa.

³⁰ Nãi la badɔa kam ɓalt 'nten al a ne, kuj kɨ kam ɓebot'n aw kɨ ndogbɔrr gug dɔ nõ, a i lo ngendugoa kɨnõt kɨ ngakaa tu, a taan jiat kam ɓal ronelt al ta.

³¹ Na kujg kɨ kam ngan ɓegt'n awɨn kɨ ndog bɔrr al ye, a tɨdand nat kɨ ndɔɔg kɨ dɔningt'n non, de a ɓa dɔ kujg'n ɗan na a taan gog kam ɓal ronelt,

³² Na ɓebogt lo Lebiag kɨ kujg lod kɨ kam ɓebogt, Lebiag asɨn kad ban dɔ kɨ kaglo kɨɗen.

³³ De'n ndugo kuj kɨ Lebia mad a tee kam kujt kɔ kam ɓal ronelt kɨ kam ɓebot'n kuj'n non i tit, kɨta kujg kɨ kam ɓebogt lo Lebiag ĩn nyakagɓe lod ku Israelagt,

³⁴ na Lebiag a ndugon dɔning lokulnyag kɨ gug dɔ ɓebog lod al kɨta i nyakagɓe lod mbãkɨnõt.

Ta dɔ badɔ degt

³⁵ Ĩla ndɔ so dɔ ngonkõit na nya goto jiat a ne, a i ɗa sia, a ndɨ roit ke i mbah ke ngetoi kɨ njan dõ,

³⁶ Ot ta man nya mad ke nya ngah dɔt jiat, i ɓool Luwah loi, na ngonkõi a ndɨ nat sei.

³⁷ Ot kad tɨna nar jiit kɨ mana dɔt, ot kad tɨna nyasa jiit kɨ mana dɔt.

³⁸ Mĩ Bɨraɓe Luwah losɨ nge tee sesɨ kam dɔning Ejipt't kɨtɨga, m'adsɨ dɔning Kana kɨtakad mĩ Luwah losɨ.

³⁹ Ĩla ndo so dɔ ngonkõit kɨ ndɨ nderbe sei, na ɗe ɗaw ron roit a ne, ot kada ɗa kɨla tit ɓer be.

⁴⁰ A ɗa kɨla ɓe loi tit ngeɗakɨla nar ke tit ngetɔi kɨ njan dõ be. A ɗa kɨla sei mbã ɓal ronel.

⁴¹ Kamla a tee be loi kɔ nat kɨ nganɨn, na a tel kɨ ro noojɨngt, a tel kɨ kam nyakagɓet lo bɔwɨng.

⁴² Kɨtɔ ĩn ɓerg lom'n m'tee sed kɔ dɔning Ejipt't. A ɗawɨnd kɔ tit ɓerg be al bat.

⁴³ A i ɗa ngetɔg dɔat al, na a i ɓool Luwah loi.

⁴⁴ Ta kɨdɔ ɓergt losɨ kɨdɨngã kɨ kɨdẽ, a i ndugond ro girrdegt'n ndɨn gugɨn dɔsɨ.

⁴⁵ A i ndugon ngan mbahg'n hɔn londɨ ɓe losɨ kɨ ngandg'n oojɨnd kam dɔningt losɨ, a ĩn nyakagɓe losɨ.

⁴⁶ A i nyand kad ĩn nyanduba lo ngansɨg kɨgosɨt tit nyakagɓe be. A i ngomɨnd tit ɓerg mbãkɨnõt. Na ta lo ngankõsɨ Israelag, ot kad de mad ɗa ngetɔg dɔ ngonkõnt.

⁴⁷ Ĩla mbah mad, ke de mad kɨ ngetɔi kɨ njan dõ tel ngemaj, na ngonkõi ndɨ kadat nderbe so ndot, na ɗaw ron kɔ kɨ mbah'n non'n ndɨ roit, ke de mad kɨ ɓe lo mbah'n non,

⁴⁸ i goɗobat kad ban dɔ Israela'n non'n ɗaw ron kɔ. Ngonkõa mad a badɔa,

⁴⁹ ke ngonkõ bɔwa ke kõa ke ngonkoojd, ke nooja kɨjeje asɨ badɔa, ke ĩ kɨɓe kɨdɔn ngah nya a ne, a badɔ ron.

⁵⁰ A tɨda kɔra nat kɨ ngendugoa, a mba girra dɔ ɓalt'n ɗawɨn ron ro det nõ mbã ɓal ronel, na gat ndugoa a i kɨgo kɔr ɓalgt kɨ nãi. A tɨda kɔra kɨgo narbaji ngeɗakɨlat.

⁵¹ Ĩla ɓal nãi ngãi ɓaitɔ a ne, a tel ada nar gog kɨgo kɔr nar badɔt'n ndugoan,

⁵² ĩla ɓalg nãi ngãi al mbã ɓal ronel a ne, a tɨda na a ba kɨgo kɔr nar badɔt.

⁵³ A ndɨ ɓe lo ngeen tit ngeɗakɨla nar kɨ ɓal kɨ ɓal, na ĩ tɔ a ɗaa kɨlo ngetɔgt takumit al.

⁵⁴ Ĩla ngah lo badɔn kɨgo ɗobg 'nten al a ne, a tee kɔ ɓal ronelt nat kɨ nganɨn.

Bɨraɓe i Luwah

⁵⁵ Kɨtɔ kɨ romt la Israelag ĩn ɓerg ye, ĩn ɓerg lom'n m'tee sed kam dɔning Ejipt't kɨtɨga. Mĩ Bɨraɓe Luwah losɨ.