Lebitik 22 - Maktub Ta Kumkajir

Ngejanyamosɨ ĩn kɨjaɓat

¹ Bɨraɓe el Moij an:

² Elta kɨ Aarõ kɨ ngana kad oon go rod maj dɔ nyagt kɨjaɓat'n Israelag ndan kɔtkokɨɗa admɨn kɨtakad yerrɨn kɨ tɔm kɨ kunjɗang al, Mĩ Bɨraɓe.

³ Eld an: Dekɨɗen ku ngan kasɨgt kɨ girrkooj losɨ'n ndɔt nderbe kɨ ro nyagt kɨjaɓat'n Israelag ndan kɔtkokɨɗa adɨn Bɨraɓe, na de'n non i kɨ kar al a ne, a tɔlɨna kɔ nomt. Mĩ Bɨraɓe.

⁴ Dekɨɗen kɨ girrkooj Aarõt'n banj i roat, ke roa ãi ɓi a sanyag kɨjaɓat al mbã kad arɨn na kamtã. Titbe tɔ de'n ɔd nya mad, tel kɨyerr kɨta nin, ke ɔd de kɨdɨngã'n man roa tee,

⁵ ke ĩn ɔd nyakɔrrkɔdber kɨ asɨ tela kɨyerrt, ke ɔd de mad kɨ asɨ tela kɨyerrt, ke nya kɨyerr kɨ ɗi kɨ ro det'n non,

⁶ de'n ɔd nyag kɨ titbe nõ a i kɨyerr mbã lokɨsɔle. A sanyag kɨjaɓat al, na a ndog man kamtã.

⁷ Lon kàd ud woi a ne, a i kɨkarnyang, kamla a sanyag kɨjaɓat ye, kɨta i nyasa loa.

⁸ A sa dã kɨ koi, ke dã'n dã mad hɔa tɔrra huthut al, na ɓeta tel kɨyerr kɨtakula. Mĩ Bɨraɓe.

⁹ Ad ngomɨn go mberkɨndag lom, na ɓeta ta majal i dɔdt ad oin, kɨta yerrɨn kɨ nyag kɨjaɓat, Mĩ Bɨraɓe ngendad tadang,

¹⁰ Mbah a sa nyasa kɨjaɓat al. De'n ndɨ ro ngejanyamosɨt, ke ngeɗakɨla nar a san nya kɨjaɓat al,

¹¹ na ĩla ngejanyamosɨ ndugo de mad kɨ nar lon, de'n non a sa nyasa loa tit de'n oojɨna kam kujt loa. A sa nyasa loa tɔ ho.

¹² Ĩla ngon ngejanyamosɨ kɨdẽ taa de kɨɗang a ne, a sa kadkarig kɨjaɓat al,

¹³ na ngon ngejanyamosɨ kɨdẽ'n i ngengawkoi, ke ngawa tuɓaa kɔ, na i kɨkanj ngon, tel ndɨ ro bɔwɨnt tit kɨ kaglo ɓa mandat be ye, a sanya lo bɔwɨn na mbah mad a sa al bat.

¹⁴ Ĩla de mad sa nyasa kɨjaɓat kɨkanj ger go a ne, a ba ngejanyamosɨ nyasa kɨjaɓat nõ, na a la gaj kɨɗa ku kɨmit dɔt.

¹⁵ Ngejanyamosɨ a yerrɨn kɨ nyag kɨjaɓat lo Israelag'n adɨn Bɨraɓe al.

¹⁶ Ĩla san nyag lod kɨjaɓat a ne, a ɔin majal kɨdɔdt, a ton ɗagootal lod kɨta mĩ Bɨraɓe ngendad tadang.

Mberkɨnda dɔ nyakult kɨ la kadkari kad Luwah

¹⁷ Bɨraɓe el Moij an:

¹⁸ El Aarõ kɨ ngana kɨ Israelag tube an: Dekɨɗen kɨɓe lo Israel ke mbah kɨɗen kɨ ndɨ kam dɔning Israelt'n ad Bɨraɓe kadkari lon kɨlahorrt ke kadkari tɔlkon kunkɔ kɨ yokɨnda, ke kadkari kamndig a ne,

¹⁹ sumba kad adɨn nyakul kɨ bɔw kɨkanj nya mad ɗaa, mang ke bat ke bĩã,

²⁰ Ot lan dã kɨ nya mad ɗaa kɨta Bɨraɓe a taa al.

²¹ Lon de mad a la kadkari kɨ kad kamsɔllom ad Bɨraɓe, ke dã kɨbo ke kɨdu, kad tɔlkon kunkɔ kɨ yokɨnda, ke kadkari kamndig kɨtakad i nya kɨ taa ne, kari na a i kɨkasɨnatap, a i kɨkanj nya mad ɗaa.

²² Ot lan dã mad kɨ kuma tɔɔ, ke ngah dò, ke ɓi ãi roat, ke ngorwoi, ke got dò i roat, A i lan dã kɨ titbe kadkari kɨlahorrt dɔ dɨngɨrt adɨn Bɨraɓe al.

²³ Asɨ la kadkari kamndig bɔw mang ke bat'n ngon roa mad ngal tɔi kɨmad, ke gɔj tɔi kɨmad, na a i nya kɨtɔ kadkari tɔlkon kunkɔ kɨ yokɨnda al.

²⁴ A i lan kadkari adɨn Bɨraɓe dã kɨ kɔrr ndõma tɔ, ke nda mbukɨmbukɨ, ke kɨ ja ke kɨ gang kɔ al.

²⁵ A i taan dãg kɨ titbe ji mbaht mad kad i nyasa lo Luwah losɨ al, kɨta nya mad ɗad ad ngahn dò, a i nya kɨ ta kɨtatɔsɨ al.

²⁶ Bɨraɓe el Moij an:

²⁷ Ngon mang ke ngon bat ke ngon bĩã, lon kõa ooja a ne, a ɗa girr kõnt ndɔ tanãimɨta, na dɔ ndɔt kɨkõjijoo asɨ ta la kadkari kɨlahorrt kad Bɨraɓe.

²⁸ Kõ mang ke kõ bat, a i jan kɔa nat kɨ ngona kam ndɔt kɨ kɨɗaɓe al.

²⁹ Lon a i lan kadkari kɨ kad kamsɔllom adɨn Bɨraɓe a ne, i ɗan kɨgoɗobat kad nela.

³⁰ Kadkari a i kɨ sa ndɔt'n non, ot nyan nya mad mbã loti dɔt. Mĩ Bɨraɓe.

³¹ A i ngomɨn go mberkɨndag lom kad i hɔn ɗagoot. Mĩ Bɨraɓe.

³² Ot kidɨn tɔ kɨkunjɗang, na ɔgɨn kad mĩ Luwah kɨ jeje ku Israelgt. Mĩ Bɨraɓe ngendasɨ tadang

³³ ĩn hã, tee sesɨ kam dɔning Ejipt't kɨtɨga kad mĩ Luwah losɨ. Mĩ la mĩ Bɨraɓe ye.