Lebitik 21 - Maktub Ta Kumkajir

Mberkɨndag kɨta ngejanyamosɨ

¹ Bɨraɓe el Moij an: El ngan Aarõ ngéjanyamosɨ an: Ot kad ngejanyamosɨ yerr kɨ ron kɨtakul nin deg lon

² na noojag kɨ nderbe tã. Ad i kõa, ke bɔwa, ke ngona kɨdɨngã, ke kɨdẽ, ke ngonkõa,

³ ke kõnana kɨ taa ngaw al, ĩn ndɨ roat kɨta taa ngaw al.

⁴ A yerr kɨ ron kɨta de kɨɗang al kɨta i ngekɔrrnõ deg lon. A yerr kɨ ron al.

⁵ Ngéjanyamosɨ a ngɨsen dɔd al, a jan ta mbaitad tomtom al, a jan ndɨja rodt al tɔ.

⁶ A ĩn kɨjaɓat kɨta Luwah lod, a yerrɨn kɨ tɔ Luwah lod al, kɨta ĩla ĩn ngela kadkarig kɨ lahort kad Bɨraɓe, nyasa lo Luwah lod. A ĩn kɨjaɓat.

⁷ A taan kaya dekɨdẽ nẽdt al, ke dekɨdẽ kɨyerrɨn sia, ke dekɨdẽ kɨ ngawa tuɓaa kɔ, kɨta ngejanyamosɨ i kɨjaɓat kɨta Luwah loa.

⁸ A i oo ngejanyamosɨ tit de kɨjaɓat kɨta ĩla ad nyasa Luwah loi, a i kɨjaɓat kɨtatɔi kɨta mĩ kɨ kunjɗang, mĩ Bɨraɓe ngendasɨ tadang.

⁹ Ĩla ngon ngejanyamosɨ kɨdẽ nuj ron kɨ kaya kɨ ɗa a ne, bɔwa tɔ nuj, na a lan ngon kɨdẽ horro.

Mberkɨnda kɨta bɨra ngejanyamosɨ kadkari

¹⁰ Bɨra ngejanyamosɨ ku ngankõngt'n wurɨna kɨ yib kurdɔt, in ndahna kɔtkokɨɗa kad la kub kɨjaɓat a ul bisɨdɔn al, a til kub lon al tɔ.

¹¹ A aw dɔ nint mad al, ke nin bɔwa ke kõa, na ɓeta tel kɨyerr.

¹² Kaglo kɨla loa a tee kam lot kɨjaɓat kɨtɨga al, a yerr kɨ lo kɨjaɓat lo Luwah lon al kɨta yib kurdɔt lo Luwah loa i jɔg kɔsɨgon dɔat. Mĩ Bɨraɓe.

¹³ A taa dekɨdẽ kɨmand kɨ ger dekɨdɨngã kete al.

¹⁴ A taa dekɨdẽ kɨ ngengawkoi al, ke kɨ tuɓa kɔ, ke kɨ tuj, ke kaya dekɨdẽ, na a taa dekɨdẽ kɨmand kɨ ger ngaw kete al ku degt lon,

¹⁵ kɨtakad nuj kohn ku degt lon al kɨta mĩ Bɨraɓe la m'ndaa kɔtkokɨɗa ye.

Nyag kɨ a ɔg de ɗa kɨla janyamosɨ

¹⁶ Bɨraɓe el Moij an:

¹⁷ El Aarõ an: Dekɨɗen ku ngakait'n nya mad ɗaa a aw la kadkari nyasa ad Luwah lon al, ngakat kɨ ngaka.

¹⁸ Dekɨɗen nya mad ɗaa, a ndɔt nderbe al, ad i mundo ke de kɨ moot, ke kɨ takuma tuj, ke ngon roa mad majal.

¹⁹ Ke de'n njaa ke jia teet.

²⁰ Ke de'n gida gokɨ, ke de kɨgɔj, ke kɔrkuma ɓa, ke ngɔkɨ saa ke ngorwoi, ke kɔrrndoma tɔ.

²¹ Dekɨɗen kɨ girrkooj Aarõ ngejanyamosɨ'n nya mad ɗaa a ndɔt nderbe kɨta la kadkari kɨlahorrt kad Bɨraɓe al kɨtɔ gida gɔkɨ. A ndɔt nderbe kɨta la nyasa lo Luwah lon al.

²² A asɨ sanya lo Luwah, ad i nyag kɨjaɓat kɨtɔitɔi kɨ nyag kɨjaɓat,

²³ na a aw nderbe kad kubganglot al, a aw kad dɨngɨrt al tɔ kɨta nya mad ɗaa. A yerr kɨ log lom kɨjaɓat al kɨta mĩ Bɨraɓe la mĩ ngendad tadang.

²⁴ Titbe la Moij elɨn Aarõ kɨ ngana kɨ Israelag tube ye.