Lebitik 2 - Maktub Ta Kumkajir

Kadkari nduj

¹ Lon de mad ɗe kɨ kadkari kand nya kɨ dɔningt kɨ'n ad Bɨraɓe a ne, kadkari loa a i nduj kɨtoletlet, a ũ yib dɔt, a ũ nõkag kɨ kootmbĩ dɔt,

² a awɨn ro ngan Aarõt ngejanyamosɨ. Ngejanyamosɨ a ɔi nduj kɨtoletlet'n yib i dɔt nõ ɗoosɨ jin nat kɨ nõkag kɨ kootmbĩ tube, na a ũ horro tit gaj nyagakamdɔt dɔ dɨngɨrt. I kadkari kɨlahorrt, i sé kɨkootmbĩ kɨ nel Bɨraɓe.

³ Ndeg kadkari nduj kɨnãi a i lo Aarõ kɨ nganag, a i nya kɨjaɓat kɨmaj tɔi ku kadkarigt kɨlahorr nõ Bɨraɓet.

⁴ Ĩla i ad kadkari nduj kɨ tɨnga kam purrt a ne, a i woina kɨ ɗa kɨ nduj kɨtoletlet kɨ lɔi kɨ yib kɨkanj berrkasɨ, ke bɨna kɨkanj berrkasɨ kɨ ɗa yib dɔt.

⁵ Ĩla kadkari loi i kadkari nduj kɨ tɨnga dɔ horrt a ne, a i nduj kɨtoletlet kɨ lɔi kɨ yib kɨkanj berrkasɨ.

⁶ A i teeta nusɨnusɨ na ũ yib dɔt, i kadkari nduj.

⁷ Ĩla kadkari loi i kadkari nduj kɨ la kam gajot a ne, a i kɨ ɗa kɨ nduj kɨtoletlet kɨ lɔi kɨ yib.

⁸ A i ɗe kɨ kadkari nduj kɨ ɗa kɨ nyag 'nten ad Bɨraɓe, a ad ngejanyamosɨ, ĩ tɔ a ndah dɔ dɨngɨrt.

⁹ Ngejanyamosɨ a ɔi gaj nyagakamdɔt kam kadkari ndujt, a ũ horro dɔ dɨngɨrt. I kadkari kɨ lahort, i sé kɨkootmbĩ kɨ nel Bɨraɓe.

¹⁰ Ndeg kadkari nduj kɨnãi a i lo Aarõ kɨ ngana, a i nya kɨjaɓat kɨmajtɔi ku kadkarigt kɨlahorr nõ Bɨraɓet.

¹¹ Kadkari nduj kɨɗen'n a adɨn Bɨraɓe a i kɨ ɗa kɨ berrkasɨ al, kɨta a i lan horr nya mad kɨ ɗa kɨ berrkasɨ ke tej ku kadkarigt kɨlahorr nõ Bɨraɓet al.

Kadkari nyako kɨdasa

¹² A asɨn lad tit kadkari kand kɨdasa na a i land kadkari sé kɨkootmbĩ dɔ dɨngɨrt al.

¹³ Kadkari nduj kɨɗen a i la kat tit. Ot kad kat nal kadkari ndujg loi, kat i nyakɔj kunkɔ lo Luwah loi, kadkarig loi tube a i la kat tit.

¹⁴ Ĩla i ad Bɨraɓe kadkari nduj kam kand nyakot kɨdasa a ne, a ad kadkari nduj kam kand nyakot loi kɨdasa, a i dɔ nyako kɨkij kɨ tɨnga dɔ horrt kɨ kɨkɔsɨ mbukɨmbukɨ.

¹⁵ A i mbel yib dɔt, a ũ nõkag kɨ kootmbĩ dɔt, i kadkari nduj.

¹⁶ Ngejanyamosɨ a la horr gaj nyagakamdɔt kam nyakot kɨkɔsɨ mbukɨmbukɨ kɨ yib nat kɨ nõkag kɨ kootmbĩ tube. I kadkari kɨlahorr nõ Bɨraɓet.