Lebitik 18 - Maktub Ta Kumkajir

Mberkɨnda kɨ dang dang dɔ kayat

¹ Bɨraɓe el Moij an:

² El Israelag an: Mĩ Bɨraɓe Luwah losɨ.

³ A i ɗan tit'n deg kɨ dɔning Ejipt't, lot'n i ndɨnt kete nõ, ɗan ne al. A i ɗan tit'n deg kɨ dɔning Kanat. Lot'n m'ndɨ m'aw sesɨ tit, ɗan ne al tɔ. A i ndulon go nyabelɓeg lod al.

⁴ A i hɔn ɗago mberkɨndagt lom, a i ngomɨn go tag lom, a i telɨn rosɨ got, Mĩ Bɨraɓe Luwah losɨ.

⁵ A i ngomɨn go tagkɨgang kɨ mberkɨndag lom. De'n hɔ ɗago nyat 'nten a ne, a ndɨ kɨ dɔn dõ kɨtakuld. Mĩ Bɨraɓe.

⁶ Ot kad de mad kusɨt aw ro noojɨnt mad kad ɔrr nya girrat. Mĩ Bɨraɓe.

⁷ A ɔrr nya girr bɔwit al, ke nya kɨ girr kõit kɨta i kõi, a ɔrr nya girrat al.

⁸ A ɔrr nya girr nẽ bɔwit al. I ro bɔwi kɨ to kari.

⁹ A ɔrr nya girr kõnanit al, ke i ngonkooj bɔwi, ke ngonkooj kõi, ke ooja ɓe ke ooja dɔ ɓet.

¹⁰ A ɔrr nya girr ngonkait kɨdẽ al, ke i ngonkooj ngoni kɨ dɨngã, ke kɨdẽ kɨta i roi kɨ to kari.

¹¹ A ɔrr nya girr ngon kɨdẽt'n nẽ bɔwi ooja al kɨta bɔwi ooja, i kõnani.

¹² A ɔrr nya girr bẽnit al kɨtɔ i ngonkõ bɔwi.

¹³ A ɔrr nya girr kõit kɨdu al kɨta i ngonkõ kõi.

¹⁴ A ɔrr nya girr ngon bɔwit kɨdɨngã al, ad a i aw ro nẽat al kɨta i nẽ ngonkõi.

¹⁵ A ɔrr nya girr mumit kɨdẽt al kɨta i nẽ ngoni. A ɔrr nya girrat al.

¹⁶ A ɔrr nya girr nẽ ngonkõit al kɨta i ro ngonkõi kɨ to kari.

¹⁷ A ɔrr nya girr dekɨdẽt kamla ɔrr nya girr ngonat kɨde al. A i taa ngonkooj ngona kɨdɨngã al ke ngonkooj ngona kɨdẽ kad i ɔrr nya girrat. Ĩn noojg kɨ nderbe, I kaya kɨ ɗa.

¹⁸ A i taa ngonkõ nẽi al, na ɓeta i nda ni kudt ĩla i ɔrr nya girrat lon nẽi ndɨn kɨ dɔn dõ ɓaitɔ.

¹⁹ Ot kaw ro dekɨdẽt kad i ɔrr nya girrat lon mosɨ ndɨ ãin roat

²⁰ Ot ɓi kɨ nẽ madɓei kad i yerr roi sia.

²¹ Ot la ngoni kadkari kɨlahorrt ad yo Molok, ot yerr kɨ tɔ Luwah loi. Mĩ la mĩ Bɨraɓe loi ye.

²² Ot ɓi kɨ dekɨdɨngã tit'n a ɓin ne kɨ dekɨdẽ ye be. I nyaɗa kɨyerr,

²³ Ot ɓi kɨ dã kad i yerr kɨ roi sia, kɨta dekɨɗen a aw ro dãt kad ɗa sia majal ye, i nyaɗa kɨ rosɔl kɨbobe.

²⁴ Ot kad i yerrɨn kɨ rosɨ kɨta nyag kɨ titbe. Kɨtɔ nyag'n non la girrdeg'n non telɨn ne kɨyerr ad m'tuɓadɨn kɔ nõsɨt ye,

²⁵ dɔning tel kɨyerr ad m'ndɨ m'gangta dɔ ɗagootalt loa na dɔning ndɨ tom ngendɨt kɔ.

²⁶ Na a i ngomɨn go tagkɨgang lom kɨ mberkɨndag lom, a i ɗan nya mad kɨyerr al, ke ngon ngeɓe ke mbah'n hɔlondɨ kusɨt.

²⁷ Kɨtɔ deg kɨ ngendɨ dɔningt'n ɗan kete nõsɨt ɗan nyag kɨyerr'n non tube, adɨn dɔning tel kɨyerr.

²⁸ Oon go rosɨ maj kad i yerrɨn kɨ dɔning'n ɗan al, na ɓeta tomsɨ kɔ tit'n tomɨn girrdeg'n ndɨnt kete nõsɨt ye be.

²⁹ Dekɨɗen'n ɗa kɨkɨɗa ku nyagt'n non, ĩgɨn ɗan nyag kɨ titbe a tɔlɨnd kɔ tube ku degt lod.

³⁰ Kɨtɔ 'nten i ngomɨn go mberkɨndag lom kad i ɗan nya mad kɨɗa ku nyagt kɨyerr'n non al ĩgɨn ngendɨt kete nõsɨt ɗan. A i yerrɨn kɨ rosɨ sed al bat. Mĩ la mĩ Bɨraɓe Luwah losɨ ye.