Lebitik 17 - Maktub Ta Kumkajir

Mberkɨnda kɨ ɔj dɔ tɔl dãg

¹ Bɨraɓe el Moij an:

² El Aarõ kɨ ngana kɨ Israelag tube an: Oon, nya'n Bɨraɓe nda mbera laten:

³ Ĩla de mad ku ngékɨɓet lo Israel jakɔ mang, ke bat, ke bĩã kam gongt ke gid gongt

⁴ na ɗen ta kujkub ndɔdnat kad laa kadkarit ad Bɨraɓe nõ londɨt lo Bɨraɓe al a ne, ta mosɨ a i dɔ det'n non kɨta ũ mosɨ kɔ. A tɔlɨna kɔ ku degt loa.

⁵ A ɗan titbe kɨtakad Israelag jan kɔ kadkarig kam mut al, na kɨ ɗen ne ro ngejanyamosɨt tabit kujkub ndɔdnat kad jan kɔd kadkarit kɨ kad kamsɔllom nõ Bɨraɓet.

⁶ Ngejanyamosɨ a tud mosɨ dɔ dɨngɨrt lo Bɨraɓe kɨ tabit kujkub ndɔdnat, a la mboola horro kad i sé kɨkootmbĩ kɨ nel Bɨraɓe.

⁷ Titbe a lan kadkarig lod adɨn ndilg kɨyerr'n ndɨ ɗan sed kaya gog al ta. 'Nten la a i mberkɨnda kɨ tokɨnõt kɨtɔd kɨ ngakat kɨ ngaka.

⁸ A i eld tɔ an: Ĩla de mad ku ngékɨɓet lo Israel, ke ku mbahg'tn hɔn londɨ kudt la kadkari kɨlahorrt ke kadkari mad kɨɗang,

⁹ na ɗen tabit kujkub ndɔdnat kad laa kadkarit ad Bɨraɓe al a ne, a tɔlɨna kɔ ku degt loa.

Mberkɨnda kɨ ɔg dɔ sa mosɨ dã

¹⁰ Ĩla de mad kɨ ɓe lo Israel ke mbah mad kɨ hɔlondɨ kudt sa mosɨ dã a ne, m'a m'ɔsɨ ta de'n non, na m'a m'ɔrra kɔ ku degt loa.

¹¹ Kumkajir lo dãro i kam mosɨt, na m'adsɨ mosɨ 'nten dɔ dɨngɨrt kad i nyakutdɔ kɨta rosɨ kɨta kumkajir kɨ kamt.

¹² Kɨtɔ 'nten la m'elɨn Israelag m'an: Kɨ de mad kusɨt sa mosɨ al, ke mbah mad'n hɔlondɨ kusɨt kaa ne, a sa al ho.

¹³ Ĩla de mad ku Israelagt ke ku mbahg'tn hɔn londɨ kudt aw ndõ hɔ dã, ke yel'n deg a san, a ũ mosa kɔ ningt ɔi bu kɨdɔt,

¹⁴ kɨta nyandah kɨɗen kumkajir loa i mosa. Kɨtɔ 'nten m'el Israelag m'an: A i san mosɨ dã mad al, kɨta kumkajir lo nyandah kɨɗen i mosa, dekɨɗen'n saa a ne, a tɔlɨna kɔ.

¹⁵ Dekɨɗen'n sa dã kɨkoi, ke dã kɨ dã mad hɔa, ke i ngon ngeɓe ke mbah'n hɔlondɨ kusɨt, a tugo kub lon, a ndog man, a i kɨyerr mbã lokɨsɔle kamla a i kɨkar ye.

¹⁶ Ĩla tugo kub lon al, ndog man al tɔ a ne, a to ɗagootal lon dɔnt.