Lebitik 16 - Maktub Ta Kumkajir

Ndɔ la kadkari kutdɔ majal

¹ Bɨraɓe elta kɨ Moij go koi ngan Aarõt kɨjoo'n ɗen nderbe ro Bɨraɓet na oin.

² Bɨraɓe el Moij an: El ngonkõi Aarõ kɨtakad and kam lo kɨjaɓat gid kubganglot kɨndɔgndɔg nõ nyakutdɔ sundt al, na ɓeta oi kɨta m'a m'tee hɔi kam kilndiit dɔn dɔ nyakutdɔt.

³ Ɗob kɨ titbe la Aarõ a andɨn kam lot kɨjaɓat't ye. A hɔ ngon bɔw mang kadkari kutdɔ majal kɨ bal bat kadkarit kɨ lahort.

⁴ A la kubji kɨ ngal kɨjaɓat kɨ kɨ sɔl lom lom, a la kalesõ lẽ kɨ sɔl lom lom ront, a dɔ ɓon kɨ kub dɔɓo kɨ sɔl lom lom, a ut dɔn kɨ jɔg lẽ kɨsɔllomlom. Ĩgɨn non ĩn kubg kɨjaɓat'n a la ront got'n ndogɨn man.

⁵ A taa bal bĩã joo ji ngékawnat lo Israel kadkari kutdɔ majal kɨ bal bat kɨɗa kadkari kɨlahorrt.

⁶ Aarõ a la bɔw mang kadkari kutdɔ majal lon kɨ majal lo ngékɨɓe lon

⁷ kamla a hɔ bal bĩãg kɨjoo ndad nõ Bɨraɓet tabit kujkub ndɔdnat.

⁸ Aarõ a ya yuk dɔ bal bĩãgt kɨjoo nõ, kɨkɨɗa kɨta Bɨraɓe na kɨkɨɗa kɨta Ajajel.

⁹ Aarõ a un bal bĩã kɨ kɨɗa'n yuk so dɔat kɨta Bɨraɓe, na a tɔla, laa kadkari kutdɔ majal.

¹⁰ Bal bĩã'n yuk so dɔat kɨta Ajajel, a laa kumkajir nõ Bɨraɓet kɨtakad tuɓana kɔ kam dɨlalot kɨta Ajajel.

¹¹ Aarõ a la bɔw mang kadkari kutdɔ majal lon kɨ majal lo ngékɨɓe lon. A jakɔ bɔw mang kadkari kutdɔ majal lon.

¹² A un gajo kɨ ɗoosɨ kɨ yalhorr kɨ dɔ dɨngɨrt nõ Bɨraɓet, a ɔi nduj nõkag kɨ kootmbĩ kɨtoletlet ɗoosɨ jin joo, ɗen gid kubganglot,

¹³ a ũ nduj nõkag dɔ horrt nõ Bɨraɓet kɨtakad sahorr nõkag kɨkootmbĩ ut dɔ nyakutdɔ sund najkɨmat kɨtakad oi al.

¹⁴ Goot gog a ɔd mosɨ bɔw mang kɨ ngon jin tud nõ nyakutdɔt ko loɓakàdt nja tanãimɨta, a tud nõ nyakutdɔt nja tanãimɨta kɨ ngon jin.

¹⁵ Kamla a jakɔ bal bĩã kadkari kutdɔ majal lo deg, na a aw kɨ mosɨ gid kubganglot, a ɗa kɨ mosɨ bal bĩã 'nten tit'n ɗan kɨ mosɨ bɔw mang, a tud dɔ nyakutdɔt kɨ kɨnõat nyakutdɔt tu.

¹⁶ A ɗa titbe kɨta kutɨn dɔ lo kɨjaɓat kɨta yerr lo Israelag kɨ tɔidɔtag lod kɨ majal kɨ ɗa lod tube. A ɗa titbe tɔ, kɨta kujkub ndɔdna'n i ku ngéɗakɨlat kɨyerrt.

¹⁷ Kɨ de mad and kam kujkub ndɔdnat al lon Aarõ a and kɨta la kadkari kutdɔ lo kɨjaɓat mbã kad tee tɨga kamtã, a ut dɔ majal lon kɨ kɨlo ngékɨɓe lon kɨ kɨlo ngékawna lo Israel tube.

¹⁸ Lon tee tɨga aw kad dɨngɨrt'n i nõ Bɨraɓet kɨta la kadkari kutdɔa a ɔd mosɨ bɔw mang tẽ kɨ mosɨ bal bĩã ɔsɨn gaj dɨngɨr gug dɔ.

¹⁹ A tud mosɨ dɔ dɨngɨrt kɨ ngon jin nja tanãimɨta a ɗan kad tela kɨjaɓat dɔ yerrt lo Israelag.

Bal bĩã ngekun ɗagootal

²⁰ Lon la kadkarit dɔ lo kɨjaɓat kɨ kujkub ndɔdna kɨ dɨngɨr woi ye, ad ɗen kɨ bal bĩã kɨ kumkajir'n non ho.

²¹ Aarõ a nda jin tujoo dɔ bal bĩã kɨ kumkajir, na a tɔ tan dɔ ɗagootalt lo Israel tube kɨ tɔidɔtag lod tube kɨ majalg lod tube, ndah dɔ bal bĩãt'n non. Goot gog a laa ji de madt'n ndana kɨta kɨla'n non kad aw sia nyàa kɔ kam dɨlalot.

²² Titbe bal bĩã kɨ ngekun ɗagootal lod tube nõ a awɨn kam dɔningt kɨ de gotot, na de'n non a nya bal bĩã ka nõ kam dɨlalot.

²³ Kamla Aarõ a and kam kujkub ndɔdnat, a ɔrr kub lẽ'n la ront lon andɨn kam lot kɨjaɓat, a la lot'n non gog

²⁴ A ndog man kam lot mad kɨjaɓat, a la kub lon ront kamla a tee la kadkari lon kɨlahorrt kɨ kadkari kɨlahorrt lo deg to kɨta kutdɔ majal lon kɨ kɨlo deg.

²⁵ A la mbool dã kadkari kutdɔ majal horro dɔ dɨngɨrt.

²⁶ De'n aw kɨ bal bĩã kɨta Ajajel nyàa kɔ kam dɨlalot a tugo kub lon, a ndog man, gog got a tel and kam gongt.

²⁷ Bɔw mang kɨ bal bĩã'n awɨn kɨ mosɨd kam lot kɨjaɓat kɨta kutdɔ majal ye, a ɔind awɨn ne gid gongt lan ngɨrad kɨ dãd kɨ kĩd horro ad õ kɔ.

²⁸ De kɨ ngelad horro nõ a tugo kub lon, a ndog man, na a tel and kam gongt gog.

²⁹ 'Nten la i mberkɨnda kɨ tokɨnõt kɨtɔsɨ. Nah kɨkõtanãimɨta kɨ ndɔ kɨkɨlah lo nah'n non a i sɔlɨn dɔsɨ, a i ɗan kɨla mad al, ke ngon ngeɓe ke mbah'n hɔlondɨ kusɨt,

³⁰ kɨta ndɔt'n non la a lan kadkari kutdɔ majal losɨ kad arsɨn. A ĩn kɨkarnyang dɔ majalgt losɨ nõ Bɨraɓet.

³¹ A i ndɔ taakò kad i taan ne kò, na a i sɔlɨn dɔsɨ. I mberkɨnda kɨ tokɨnõt.

³² Ngejanyamosɨ'n i kɨ wur ndahna kɔtkokɨɗa kad ndɨ goot bɔwɨnt kam kɨla janyamosɨt a la kadkari kutdɔ majal kɨ kub lẽ kɨ sɔl lom lom kɨjaɓat ront.

³³ A la kadkari kutdɔ lo kɨjaɓat, a la kadkari kutdɔ kujkub ndɔdna kɨ dɨngɨr, a la kadkari kutdɔ ngejanyamosɨ kɨ ngékawna tube.

³⁴ A i mberkɨnda kɨ tokɨnõt kɨtɔsɨ. A la kadkari kutdɔ majal nja kɨɗa ɓal kɨɗen kɨta majalg lo Israelag tube. Ɗa tit'n Bɨraɓe ndan mbera Moij.