Lebitik 15 - Maktub Ta Kumkajir

Nya kɨ ad dekɨdɨngã tel kɨyerr

¹ Bɨraɓe el Moij kɨ Aarõ an:

² El Israelag an: Lon dekɨdɨngã mad aw kɨ mõi'n ad ɓi tee roat a ne, ɓin non i nya kɨyerr.

³ 'Nten i mberkɨnda dɔ yerrt loa kɨta ɓin tee roat, ke ɓi ndɨ tee roat ɓaitɔ, ke ɓi nya ta tee kaa ne, i kɨyerr.

⁴ Tɨra kɨɗen'n ngemõi'n non to dɔt, ke nya kɨɗen'n ndɨdɔt a ne, a i kɨyerr.

⁵ De'n ɔd tɨra loa a ne, a tugo kub lon a ndog man, na a i kɨyerr mbã lokɨsɔle.

⁶ Dekɨɗen'n ndɨ dɔ nyat mad kɨ ngemõi'n non ndɨt a ne, a tugo kub lon, a ndog man, a i kɨyerr mbã lokɨsɔle

⁷ De'n ɔd dãro de kɨyerr'n non a tugo kub lon, a ndog man, a i kɨyerr mbã lokɨsɔle.

⁸ Ĩla ngemõi'n non tiw hortan dɔ det kɨkar a ne, de kɨkar'n non to a tel kɨyerr, a tugo kub lon, a ndog man, a i kɨyerr mbã lokɨsɔle.

⁹ Sirg kɨɗen'n ngemõi'n non ndɨdɔt a ne, a i kɨyerr.

¹⁰ Dekɨɗen'n ɔd nya mad'n i girr ngemõit'n non a ne, a i kɨyerr mbã lokɨsɔle. De'n un nya kɨ titbe tɔ a tugo kub lon, a ndog man, a i kɨyerr mbã lokɨsɔle.

¹¹ Dekɨɗen'n ngemõi'n non ɔda, na tugo jin kete al a tugo kub lon, a ndog man, a i kɨyerr mbã lokɨsɔle.

¹² Joning kɨɗen'n ngemõi'n non ɔd a ne, a tɔn kɔ, kag kɨɗen kɨ tɔsɨ nyaɗakɨlat a tugon kɨ man.

¹³ Lon ngemõi'n non yoot ad ɓi nya ta tee roat a ne, a tɨda ndɔ'n asɨ tanãimɨta kɨta kar ron, a tugo kub lon, a ndog ron kam mant kɨ ɓa, na a i kɨkar.

¹⁴ Ndɔ kɨkõjijoo a ne, a ɔi derngɔt joo ke ngan derkul joo a awɨn nõ Bɨraɓet tabit kujkub ndɔdnat ad ngejanyamosɨ.

¹⁵ Ngejanyamosɨ a la kɨkɨɗa kadkari kutdɔ majal na kɨmad kadkari kɨlahorrt. Ngejanyamosɨ a ɗa titbe kad utɨn dɔ majal loa nõ Bɨraɓet kɨta ɓi kɨ tee roat.

¹⁶ Ĩla man ro dekɨdɨngã tee a ne, a ndog ron kɨtaagbe kam mant, na a i kɨyerr mbã lokɨsɔle.

¹⁷ A tugo kub kɨɗen kɨ ndar kɨɗen'n man ro de'n non ãi kɨ tit, na a i kɨyerr mbã lokɨsɔle.

¹⁸ Ĩla dekɨdẽ to kɨ dekɨdɨngã kɨ titbe a ne, ĩn tujoo a ndogɨn man, a ĩn kɨyerr mbã lokɨsɔle.

Nya kɨ ad dekɨdẽ tel kɨyerr

¹⁹ Dekɨdẽ'n mosɨ ɗaa ad ãi roat a ne, a i kɨyerr mbã ndɔ tanãimɨta. Dekɨɗen'n ɔda a ne, a i kɨyerr mbã lokɨsɔle.

²⁰ Nya kɨɗen'n to dɔt kaglot'n mosɨ ndɨ ãi roat a ne, a i kɨyerr, nya kɨɗen'n ndɨdɔt a i kɨyerr tɔ.

²¹ Dekɨɗen'n ɔd tɨra tɔa a ne, a tugo kub lon, a i kɨyerr mbã lokɨsɔle.

²² Dekɨɗen'n ɔd nya kɨ ɗi'n ndɨdɔt a tugo kub lon, a ndog man, a i kɨyerr mbã lokɨsɔle,

²³ ke tɨra tɔa, ke nya'n ndɨdɔt, lon ɔd nya'n non a ne, a i kɨyerr mbã lokɨsɔle.

²⁴ Ĩla dekɨdɨngã to sia na mosɨ dekɨdẽ'n non ɔda a ne, a i kɨyerr ndɔ tanãimɨta na tɨra'n tot, a i kɨyerr ho.

²⁵ Ĩla mosɨ ɗa dekɨdẽ mad ndɔ ngãi, na i kaglo'n mosɨ a ãin roat al, ke tɔi kaglo loa a ne, a i kɨyerr. Kaglo tube'n mosɨ ɗaan a ne, a i kɨyerr tit kaglo kɨyerr loa tube kɨ mosɨ dã.

²⁶ Tɨra kɨɗen'n to dɔt ndɔg tube'n mosɨ ɗaan a i tit tɨra toa kɨ kaglot'n mosɨ ãin roat be, na nya kɨɗen'n ndɨdɔt a i kɨyerr tit kaglo'n mosɨ ãi roat ye be tɔ.

²⁷ Dekɨɗen'n ɔd nyag 'nten a i kɨyerr, a tugo kub lon, a ndog man na a i kɨyerr mbã lokɨsɔle.

²⁸ Lon yoot dɔ mõit woi ye, a tɨda ndɔ'n asɨ tanãimɨta, gog got a i kɨkar.

²⁹ Ndɔ kɨkõjijoo a hɔ derngɔt joo, ke ngan derkul joo, a ɗen ro ngejanyamosɨt tabit kujkub ndɔdnat.

³⁰ Ngejanyamosɨ a la kɨkɨɗa kadkari kutdɔ majal na kɨmad kadkari kɨlahorrt. Ngejanyamosɨ a ɗa titbe kɨta kutɨn dɔ majal loa nõ Bɨraɓet kɨta mosɨ ɗaa ye, tela kɨyerrt.

³¹ Titbe a arɨn ne Israelag dɔ nyagt kɨyerr lod, na ɓeta oin kam yerrt lod lon yerrɨne kɨ kujkub londɨ lom ĩn i dandt.

³² 'Nten la i mberkɨnda kɨta de'n ɓi tee roat ke man roa tee ad tela kɨyerrt,

³³ kɨta dekɨdẽ'n mosɨ ɗaa. Ad i kɨta dekɨdɨngã ke dekɨdẽ'n nya mad tee roat, kɨta dekɨdɨngã'n to kɨ dekɨdẽ'n i kɨyerr.