Lebitik 11 - Maktub Ta Kumkajir

Dãg kɨ kar kɨ kɨkar al

¹ Bɨraɓe el Moij kɨ Aarõ an:

² Elɨn Israelag anan: Oon dãg kɨ sumba kad i sand ku dãgt tube kɨ dɔningt laten:

³ A i san dã kɨɗen'n kɨngotinjaa tɔ joo, na a sanya na tel ɔsɨ sa gog.

⁴ Na ĩgɨn san nya na tel ɔsɨ san gog koon ke kɨngotinjad tɔ joojoo koon, a i sand al. Titbe a i san lukum al kɨta sanya na tel ɔsɨ sa gog, na kɨngotinjaa tɔ joo al. A i oona tit nya kɨyerr.

⁵ A i san brangg al, kɨta a sanya tel ɔsɨ sa gog na kɨngotinjaa tɔ joo al, a oona tit nya kɨyerr.

⁶ A i san dɔgdɔgum al, kɨta sanya tel ɔsɨ sa gog, na kɨngotinjaa tɔ joo al, a i oona tit nya kɨyerr.

⁷ A i san boor al kɨta kɨngotinjaa tɔ joo, njaa gaj joo na sa nya na tel ɔsɨ sa gog al, a oona tit nya kɨyerr.

⁸ A i san dãd al, a ɔdɨn nind al tɔ, a oond tit nya kɨyerr.

⁹ Nyag kɨ kam mant'n a i sand laten: A i san nya kɨɗen'n aw kɨ mbɨr gidɨn kɨ ngɔn, ke kam mant ke kam bahbot ke baht kɨdu.

¹⁰ Nya kɨɗen kɨ kam bahbot ke baht kɨdu'n ninga mbɨr gida ke ngɔa goto, ad i nyag'n awɨn kam mant ke ndɨn kam mant, a i oond tit nya kɨyerr.

¹¹ Nyag'n non a ĩn nya kɨyerr rosɨt, a i san dãd al, a i oond tit nya kɨyerr.

¹² Nyag tube kɨ kam mant'n mbɨrd, kɨ ngɔd goto, a i oond tit nya kɨyerr.

¹³ Oon, yelg'n ĩn kɨyerr rosɨt, na a i sand al, laten: Kurro, girra kɨ korko,

¹⁴ kɨsoli kɨ wara kɨ dang dang

¹⁵ kagã kɨ dang dang kɨɗen,

¹⁶ bulum, kɨ lew kɨderbah, ndulogidɓe kɨ dang dang,

¹⁷ koibaɗor, yelman kɨ kɔibo,

¹⁸ lubo kɨ ngadĩ kɨ malg

¹⁹ gõ kɨ mana kɨ gonkadndɔg kɨ dang dang lawdari kɨ dow.

²⁰ Nya kɨ kɔrkɔdber kɨɗen kɨ ɓai kɨ bɔgɨn'n aw kɨ njan kɨsɔɔ a i kɨyerr rosɨt,

²¹ na ku nyagt ngékɔrkɔdber tube'n ɓain kɨ bɔgd, ndian kɨ njad kɨsɔɔ, a i san ĩgɨn awɨn kɨ kurnjad kad talɨn ne dɔningt.

²² Oon, ĩgɨn a i sand laten: Kɨbet kɨ dang dang kɨɗen, kɨdaa kɨ kɨɗen, kɨndir kɨɗen kɨ taw kɨɗen.

²³ Ndeg nyag ngékɔrkɔdber tube'n awɨn kɨ bɔgd kɨ njad kɨsɔɔ a oond tit nya kɨyerr.

Kɔd nya kɨ a tel de kɨyerrt

²⁴ Kɨtɔ nyag'n non la a i telɨn ne kɨyerr ye dekɨɗen'n ɔd nind a ne, a i kɨyerr mbã lokɨsɔle.

²⁵ Dekɨɗen'n un nin nyag'n non a ne, a tugo kub lon na a i kɨyerr mbã lokɨsɔle.

²⁶ Dã kɨɗen'n aw kɨ kɨngotinjan nõ tɔ joo al, sanya na tel ɔsɨ sa gog al tɔ a ne, a i oona tit nya kɨyerr. Dekɨɗen'n ɔd'd a ne, a i kɨyerr.

²⁷ Dãg tube'n awɨn kɨ kɨmunr njad, na ndian kɨ danjad a i oond tit nya kɨyerr. Dekɨɗen'n ɔd nind a ne, a i kɨyerr mbã lokɨsɔle,

²⁸ na de'n un nind a ne, a tugo kub lon, a i kɨyerr mbã lokɨsɔle. A i oond tit nya kɨyerr.

²⁹ Dãg ngékag dɔningt'n a ĩn kɨyerr rosɨt laten: Yegg kɨ dang dang yeg tɔr kɨ burrg kɨ dang dang,

³⁰ kɨbɔ, mar, burmong, ngarwãi kɨ kɨlãi.

³¹ Ĩgɨn non la a ĩn kɨyerr rosɨt ku dãgt kɨ ngekɔrrkɔd'd ber tube. Dekɨɗen'n ɔd nind a ne, a i kɨyerr mbã lokɨsɔle.

³² Nya kɨɗen'n nind so dɔt a ne, a tel kɨyerr. Kag kɨɗen kɨ tɔsɨ nyaɗakɨlat kɨ kub, ngɨra, ɓool, nya kɨɗen kɨ ɗan ne kɨla a ũn kam mant na a i kɨyerr mbã lokɨsɔle, kamla a tel kɨkar ye.

³³ Jo ning kɨɗen'n nind so kamt a ne, nyag kɨ kamt tube a ĩn kɨyerr ho, a i ton jo'n non kɔ.

³⁴ Nyasa kɨɗen'n man tugo nya kɨyerr so dɔt a ne, a i kɨyerr, nyakãi kɨɗen kɨ kam jomant kɨ titbe a i kɨyerr.

³⁵ Nya kɨɗen'n nind so dɔt a ne, a i kɨyerr, pur ke mbahil a tond kɔsɨ kɔsɨ. In kɨyerr na a i oond tit nya kɨyerr.

³⁶ Lo ɓa man ke man kɨnu a i kɨjanjoi, na nya'n ɔd nind a ne, a i kɨyerr.

³⁷ Ĩla nind so dɔ kum nyat kɨta dub a ne, kum nya'n non a i kɨkar,

³⁸ na ĩla ũn man dɔ kum nyat mad kamla nind so dɔt a ne, kum nya'n non a i kɨyerr.

³⁹ Ĩla dã mad'n i dã sasɨ oi a ne, de'n ɔd nina a i kɨyerr mbã lokɨsɔle.

⁴⁰ De'n sa dã kɨkoi'n non a tugo kub lon, a i kɨyerr mbã lokɨsɔle, na de'n un nin dã'n non a tugo kub lon, a i kɨyerr mbã lokɨsɔle.

⁴¹ Dã kɨɗen ngekɔrkɔd ber kɨdɔningt a ne, i kɨyerr rosɨt, a i san al.

⁴² Nya kɨɗen kɨ ag dɔningt ke ngekɔrkɔd ber ĩgɨn ndian kɨ njad kɨsɔɔ ke njad koosɨ, a i sand al kɨta ĩn nya kɨyerr rosɨt.

⁴³ Ot telɨn rosɨ kɨyerrt kɨtakul nya mad kɨ ɔrr kɔdɨn ber ke ag dɔningt, ot yerrɨn rosɨ sed, na ɓeta i telɨn kɨyerr kɨtatɔd.

⁴⁴ Mĩ Bɨraɓe Luwah losɨ, kɨta 'nten i jan rosɨ ɓat kad ĩn ne kɨ kunjɗang kɨta mĩ kɨ kunjɗang. Ot yerrɨn kɨ rosɨ kɨ dã kɨɗen ngekɔrkɔd ber kɨ ngekag dɔningt.

⁴⁵ Kɨtɔ mĩ Bɨraɓe'n m'tee sesɨ kam dɔning Ejipt't kɨtɨga kad mĩ Luwah losɨ. Kɨ ĩn kɨ kunjɗang kɨta mĩ kɨ kunjɗang.

⁴⁶ 'Nten la i mberkɨnda'n ɔj dɔ dãg kɨ yelg kɨ nyakumkajɨr kɨɗen'n ndɨ ɔdɨn rod kam mant kɨ nya kɨ kumkajir kɨɗen ĩgɨn agɨn dɔningt

⁴⁷ kɨtakad ɔrrɨn ne nin nyag kɨyerr kɨ nyag kɨkar nat, dã kɨ sumba sa kɨ dã kɨ sumba sa al.