Lebitik 10 - Maktub Ta Kumkajir

Nadab kɨ Abihu oin

¹ Nadab kɨ Abihu ngan Aarõ, dekɨɗen ũn gajo, ɔi yalhorr tit ũ nõkag kɨkootmbĩ dɔt, na ndah horr kɨ bĩ dang'n non nõ Bɨraɓet, na i nya'n Bɨraɓe ndad mbera al.

² Kamla horr tee ko nõ Bɨraɓet õd, ad oin nõ Bɨraɓet.

³ Moij el Aarõ an: 'Nten la i nya'n Bɨraɓe eltaa lon el an: M'a mĩ kɨ kunjɗang kɨ ro degt'n ndɔt'n kɨ romt, na m'a mĩ kɨ kɔsɨgon takum degt tube. Aarõ ndɨ tan mbo.

⁴ Moij kun Misael kɨ Elsapan, ngan Ujiel ngonkõ bɔw Aarõ, eld an: I ndɔt'n kɨ ne ɔin nin ngankõsɨg'n ton kam lot kɨjaɓat awɨn ne gid gongt.

⁵ Ĩn tɔ ndɔt'n, na ɔin nind kam kubgt lod kɨ gid gongt tit'n Moij elɨn.

⁶ Moij el Aarõ kɨ ngana Eleajar kɨ Itamar an: Ot ngɨsen bisɨdɔsɨ, ot tilɨn kub losɨ, na ɓeta oin, ke Bɨraɓe ɓawong kɨ ngékawna tube'n non kɨta ĩgɨn Bɨraɓe ad horr õd.

⁷ Ot teen tɨga tabit kujkub ndɔdnat, na ɓeta oin kɨta yib kurrdɔt lo Bɨraɓe i dɔsɨt. Ɗan kɨgo tat lo Moij.

Mberkɨndag kɨta ngejanyamosɨ

⁸ Bɨraɓe el Aarõ an:

⁹ Ĩ kɨ ngani nat, ot kãin kasɨnduu, ke kasɨ kɨ wong, lon i ndɨ andɨn ne kam kujkub ndɔdnat, na ɓeta oin. 'Nten a i mberkɨnda kɨ tokɨnõt ku ngakasɨt

¹⁰ kɨtakad i ɔrrɨn nin nyag kɨjaɓat kɨ nyag kɨjaɓat al, nyag kɨyerr kɨ nyag kɨkar nat,

¹¹ kad i ndoon Israelag mberkɨndag tube'n Bɨraɓe ad'd kɨtakul Moij.

Gaj lo ngejanyamosɨ kam kadkarit

¹² Moij el Aarõ kɨ Eleajar kɨ Itamar, ngan Aarõ kɨjoo'n nãin kɨ dɔd dõ, an: Ɔin ndeg nya kɨnãi kam kadkarigt kɨlahorr nõ Bɨraɓet, i san kɨkanj berrkasɨ kad dɨngɨrt kɨta i nya kɨjaɓat kɨtɔitɔi.

¹³ A i san kam lot mad kɨjaɓat kɨta i gaj loi kɨ gaj lo ngani kam kadkarigt kɨlahorr nõ Bɨraɓet, kɨta nya 'nten la i nya'n ndam mbera ye.

¹⁴ A i san gu dã kɨ bii kɨ bing dã kɨ kun kɨ dõ kam lot mad kɨjanjoi, ĩ kɨ ngani kɨdɨngã kɨ kɨdẽ nat sei, kɨta adsɨn kad i gaj loi kɨ gaj lo ngani kam kadkarigt kɨ kad kamsɔllom lo Israelag.

¹⁵ A ɗen kɨ bing dã kɨ kun kɨdɔn kɨ gu dã kɨ bii nat kɨ mboola'n i kɨta la horro nõ Bɨraɓet. A i gaj loi kɨ ngani kɨtakul mberkɨnda kɨ tokɨnõt tit'n Bɨraɓe nda'n mbera.

¹⁶ Moij sah bal bĩã kadkari kutdɔ majal na oo, horr õa oi. Kamla Moij ɓawong kɨ Eleajar kɨ Itamar ngan Aarõ kɨ nãin kɨ dɔd dõ, an:

¹⁷ Kɨtɔɗi i san kadkari kutdɔ majal kam lot kɨjaɓat al a? I nya kɨjaɓat kɨtɔitɔi'n Bɨraɓe adsɨ kɨtakad i unɨn ɗagootal lo ngékawna kad i lan kadkari kutdɔ majal kɨtɔɗi nõ Bɨraɓet.

¹⁸ Oo, ɗen kɨ mosɨ dã kam lot kɨjaɓat al. Sumba kad san kam lot kɨjaɓat tit'n m'ndan mbera.

¹⁹ Aarõ el Moij an: Oo, lan kadkari kutdɔ majal lod kɨ kadkari lod kɨlahorrt nõ Bɨraɓet ɓone, na kɨgo nyat kɨ tee dɔmt, ĩla m'sa kadkari kutdɔ majal a ne, a maj takum Bɨraɓet a?

²⁰ Lon Moij oo dɔ ta 'nten ye kama sokɨber.