Lebitik 1 - Maktub Ta Kumkajir

Kadkari kɨlahorr

¹ Bɨraɓe kun Moij ela ta ko kam kujkub ndɔdnat an:

² Elta kɨ ngan Israelg, eld an: Lon de mad kusɨt a ad kadkari Bɨraɓe a ne, a ɗe kɨ dã kadkari kam ɓut nyakulgt kɨbo ke kɨdu.

³ Ĩla kadkari loa i kadkari kɨlahorrt kam ɓut nyakulgt kɨbo a ne, a ad kɨdɨngã kɨkanj nya mad ɗaa, a ad ta tabit kujkub ndɔdnat kad ngah maj takum Bɨraɓet.

⁴ A nda jin dɔ kadkari kɨlahorrt kad'n ngah maj takum Bɨraɓet, na i nyakutdɔ majal loa.

⁵ Kamla a tɔl bɔw mang'n non nõ Bɨraɓet, na ngan Aarõ ngéjanyamosɨ a unɨn mosa tudɨn gugɨn ne dɔ dɨngɨr'n i tabit kujkub ndɔdnat.

⁶ A tɔrr ngɨraa kamla a gang dã'n non sĩ sĩ.

⁷ Ngan Aarõ ngéjanyamosɨ a lan horr dɔ dɨngɨrt, a ũn kir dɔ horrt kɨgoagoa.

⁸ Ngan Aarõ ngejanyamosɨ a ũn dã kɨ gangɨn nõ, dɔa kɨ mboola, kɨgoagoa dɔ kirt'n i dɔ horrt dɔ dɨngɨrt.

⁹ A tugo tia kɨ njaa kɨ man, na ngejanyamosɨ a laa horro kɨtaagbe dɔ dɨngɨrt. I kadkari'n horr õa, i kadkari kɨlahorrt, i sé kɨ kootmbĩ kɨ nel Bɨraɓe.

¹⁰ Ĩla kadkari loa i kadkari kɨ lahort kam ɓut nyakulgt kɨdu, batg ke bĩãg a ne, a ad kɨdɨngã kɨkanj nya mad ɗaa.

¹¹ A jakɔa kad dɨngɨrt kɔtko ɓodo nõ Bɨraɓet, na ngan Aarõ ngejanyamosɨ a unɨn mosa tud gugɨn ne dɔ dɨngɨr.

¹² A gang dã'n non dɨtɨmdɨtɨm nat kɨ dɔa kɨ mboola na ngejanyamosɨ a ũd kɨgoagoa dɔ kirt'n i dɔ horrt dɔ dɨngɨrt,

¹³ na a tugo tia kɨ njaa kɨ man. Ngejanyamosɨ a laa horro kɨtaagbe dɔ dɨngɨrt, i kadkari'n horr õa, i kadkari kɨlahorrt, i sé kɨ kootmbĩ kɨ nel Bɨraɓe.

¹⁴ Ĩla kadkari loa kɨta Bɨraɓe i kadkari yelg kɨlahorrt a ne, a ɗe kɨ kadkari derngɔtg ke ngan derkulg lon.

¹⁵ Ngejanyamosɨ a tɔl yel dɔ dɨngɨrt, a gang dɔa na laa horro dɔ dɨngɨrt, na a ad mosa ãi kad dɨngɨrt.

¹⁶ A ɔrr ɓɔlɓooa kɨ bela, a ũ kad dɨngɨrt ko loɓakàdt, lon a ũn buhoor tit.

¹⁷ Kaya nat joo mbɨna bɔgagt kanj ganga nat. Ngejanyamosɨ a laa horro dɔ dɨngɨrt dɔ kirt'n to dɔ horrt. I kadkari'n horr õa, i kadkari kɨlahorrt, i sé kɨkootmbĩ kɨ nel Bɨraɓe.