Jonas 3 - Maktub Ta Kumkajir

Deg kɨ ɓebo Ninib nyan ta ɗob lod kɨmajal

¹ Kamla ta lo Bɨraɓe ɗe ro Jonast nja kɨkõjoo, an:

² I ɓai aw Ninib, ɓe kɨbo ngãin non, i la mber ta'n m'eli.

³ Jonas ɓai aw Ninib tit'n Bɨraɓe ela'n. Ninib i ɓe kɨbo ngãi, nda dan ɓea gang asɨ ndia ndɔ mɨta.

⁴ Jonas mba girr kand kam ɓebot, ndia ndɔ kɨɗa, ndɨ la mber ta an: Nãi ndɔ dɔsɔɔ a ne, ɓebo Ninib a nuj.

⁵ Deg kɨ Ninib adɨn kamd Luwah, lan mber kɔg ro nyasa, lan kub hɔndo rodt, mba girra dɔ kɨbogt mbã kɨ dɔ kɨdugt.

⁶ Lon ta tee ro ngart kɨ Ninib ye, ɓai dɔ pong kõɓet lon, ɔrr kub mbaiɓe lon kɔ, la kub hɔndo gootat, ndɨ kam buhoort.

⁷ Ngar ndamber, na ad lan mber'n non kam Ninibt: 'Nten i ta kɨ tee kokɨro ngart kɨ mbaiɓeg lon, Ot kadɨn de, ke dã, ke mang, ke bat ɔdɨn nya mad tadt. Ot kad san nya. Ot kad ãin man.

⁸ Na kɨ adɨn deg kɨ dãg tu lan kub hɔndo rodt. Kɨ kon kɨ ndid kɨbobe kɨ dɔ Luwaht. Ã, kɨ dekɨɗen nya ɗob lon kɨmajal kɔ kɨ nyaɗaa kɨ lo ngetɔgt.

⁹ Nõ asɨ ger ke maja Luwah a nya ta, a nyàgo wong lon kɨtɔlsɔkɨr kɨtakad kɨ nujɨn al?

¹⁰ Lon Luwah oo nya'n deg ɗan nõ, kɨ nya kɨ dekɨɗen nya ta ɗob lon kɨmajal kɔ ye, Luwah nya ta kɔjta ɗa sed nya kɨ to.