Jonas 1 - Maktub Ta Kumkajir

Jonas sah ɗob kãi sãi takum Bɨraɓet

¹ Ta lo Bɨraɓe ɗe ro Jonast ngon Amitai, an:

² I ɓai aw Ninib, ɓe kɨbo ngãin non, i la mber ta kɨdɔat kɨta ɗagootal lo ngendɨt ɓai aw mbã tee romt.

³ Na Jonas ɓai ãi takum Bɨraɓet kɨta kaw ɓet kɨ Tarsis. Aw ɓet kɨ Japo, ngah too kɨbo ndɨ aw Tarsis, ba nara, and kamt kɨtakad kɨ n'aw nat sed Tarsis sãi kɨ takum Bɨraɓet.

⁴ Na Bɨraɓe ad nél kɨbo ɓai dɔ bahbot ad nélbarwãi kɨ tɔg ngãi la dɔ bahbot, na too kɨbo to ta nujt.

⁵ Kamla ngénel too kɨbo ɓoolɨn ad dekɨɗen ko kɨdɔ Luwaht lon; ɔin nyagatg kɨ kam too kɨbot kam bahbot kɨtakad too kɨbo lod ɔi ngãi al. Jonas ɗisɨ and kam too kɨbot kɨkeme, to ber ad ɓi tɔla sɔkɨr kete lon nel la al ɓaitɔ,

⁶ Kɨbo lo ngéɗakɨla kam toot kɨbo ɗe roat, ela an: Ĩ i to i ɗa ɗi? I ɓai, i ko kɨdɔ Luwaht loi, maja a gah dɔjt kɨtakad kɨ nuj al.

⁷ Ngénel too kɨbo elɨn na ta anan: Ad kɨ yan yuk kɨtakad kɨ gerɨn ke kɨta de kɨ ɗah hã nya kɨmajal 'nten dɔjt. Yan yuk, na yuk so dɔ Jonast.

⁸ Elɨna anan: Kɨ kɔi kɨ elj kɨtɔɗi majal 'nten dɔjt. Kɨla loi i ɗi a? I ɓai ko ɗah a? Ɓe loi i ɗah a? Girrdeg loi ĩn nõg a?

⁹ Jonas eld an: Mĩ Hebre, mĩ ngeɓool Bɨraɓe Luwah kɨ dɔrãt dõ ngeɗa bahbo kɨ dɔning.

¹⁰ Kamla ɓool tɔl deg'n non sɔkɨr ad elɨna anan: I ɗa ɗi a? Deg gerɨn kad Jonas ndɨ ãi takum Bɨraɓet kɨta Jonas eld titbe.

¹¹ Kamla elɨna anan: Kaa kɨ ɗa ɗi sei kɨtakad bah tel to lom kɨtɔj a? Kɨtɔ nélbarwãi ad bah ɓai kɨ tɔgɨn kɨdɔtdɔt,

¹² Jonas eld an: Unmɨn i lamɨn kam bahbot. Kamla bah a tel to lom kɨtɔsɨ, kɨta m'ger ɓet i kɨtɔ majal lom la nélbarwãi kɨbo 'nten dɔsɨt ye.

¹³ Na deg nelɨn too kɨbo kɨ tɔgd kɨtakad telɨn kɨgog dɔningt, na asɨn al kɨta nélbarwãi ad bah ɓai kɨ tɔgɨn kɨdɔtdɔt, ndɨ ɔsɨd kɨgog.

¹⁴ Kɨtɔ 'nten kon kɨdɔ Bɨraɓet, anan: Bɨraɓe, kɨ kɔi, ot kad kɨ nuj kɨta ta lo de'n non. Ot la ta mosɨ de kɨ ta loa goto dɔjt. Kɨtɔ ĩ Bɨraɓe i ɗa kɨgo ndigt loi.

¹⁵ Titbe tɔ la unɨn ne Jonas lana kam bahbot, kamla bah tel to lom.

¹⁶ Deg'n non ɓoolɨn Bɨraɓe ngãibe, lan kadkari kɨjakɔ adɨn Bɨraɓe, na unɨn kɔd adɨna kɨ yokɨnda.