Jojue 1 - Maktub Ta Kumkajir

Bɨraɓe elta kɨ Jojue

¹ Go koi Moijt kɨ ɓer lo Bɨraɓe, Bɨraɓe el Jojue ngon Nun kɨ madkɨla Moij an:

² Ɓer lom Moij oi, tajigla i ɓai i gang bah Jurdẽ'n ɗan, ĩ kɨ deg'n ɗan tube kad andɨn kam dɔningt'n m'ndɨ mad Israelag.

³ Lokɨɗen'n a i ndan danjasɨ tit a ne, m'adsɨ tit'n m'elɨn Moij kete nõ.

⁴ Lagɨr dɔning losɨ a i ko dɨlalot'n ɗan kɨ Libã mbã kɨ bahbot, ad i bah Eprat kɨ dɔning lo Hetiag tube mbã kɨ bahbokat kɨko lokudkàdt.

⁵ De kɨɗa kɨ a ɗa nõit goto kɨ ndɔig tube'n a i ndɨn kɨ dɔi dõ. M'a mĩ nat sei tit'n. Mĩ'n nat kɨ Moij ye be. M'a m'nyagoi al, m'a M'nyai kɔ al.

⁶ I hɔ roi bá, ire kami kɨta ĩ la a ad deg'n ɗan õn nduba dɔning'n m'unɨn kɔm kɨ yokɨnda mad bɔwdg kɨ m'ad'd.

⁷ I hɔ roi bá, i ɗa dɨngam, oo go roi maj kad i ɗa kɨgo tat tube'n Moij kɨ ɓerkɨla kɨla lom ndai mbera. Ot tɔ roi kokõ ke kogel kɨtakad maj urri lo kɨɗen'n a awt.

⁸ Ad maktub mberkɨnda 'nten nya tai al. A i ndio kama ndɔ ho kàda ho kad i hɔ ɗa kɨgo nyagt tube kɨndang kamt, kɨtakad maj urri dɔ nyaɗait kɨɗen na a i tetɗɔɔ.

⁹ M'ndai mber 'nten ale? I hɔ tɔgibá, ire kami. Ot ɓool, ot kad kami gang man, kɨta Bɨraɓe Luwah loi i nat sei lo kɨɗen'n a awt.

Israel ɗa ron kɨta gang bah Jurdẽ

¹⁰ Kamla Jojue ndamber bɨradɔg lo deg an:

¹¹ I ndian kɨ lo hɔlondɨt, i ndan mber deg anan: I ɗan go nya sasɨ kɨta kam ndɔt kɨmita a i gangɨn bah Jurdẽ'n ɗan kad i taan dɔning'n Bɨraɓe Luwah losɨ adsɨ nyandubat.

¹² Jojue elta kɨ Rubeniag kɨ Gadiag kɨ nusɨ girr Manase an:

¹³ I gan kamsɨ dɔ tat'n Moij kɨ ɓerkɨla kɨla lo Bɨraɓe ndasɨ mbera lon el an: Bɨraɓe Luwah losɨ adsɨ taakò, na a adsɨ dɔning'n ɗan ho.

¹⁴ Nẽsɨg kɨ ngansɨg kɨ nyakulg losɨ a ndɨn dɔningt'n Moij adsɨ kɔtko nẽ lo bah Jurdẽ. Na ĩn gõɗɔɔg tube a i gangɨn bah kete nõ ngankõsɨgt, kɨ nyakat jisɨt kad i ɗan ne sed,

¹⁵ mbã kad Bɨraɓe ad ngankõsɨg taakò tit'n adsɨn, kad ĩn tɔ taan dɔning nyandubat'n Bɨraɓe Luwah losɨ ndɨ ad'd. Kamla a i tel i ɗen gog kam dɔning nyadubat losɨ'n Moij kɨ ɓerkɨla kɨla lo Bɨraɓe adsɨ kɔtko ne kɨ bah Jurdẽ ko loɓakàdt.

¹⁶ Turɨn Jojue anan: J'a kɨ ɗa nyag tube'n i ndaj mbera, na j'a j'aw lot kɨɗen'n a i laj tit.

¹⁷ J'a kɨ tel roj go tat loi tit'n kɨ telɨn roj go tat lo Moij ye be. Na kɨ Bɨraɓe Luwah loi i nat sei tit'n ĩn nat kɨ Moij.

¹⁸ Dekɨɗen'n ndɨ taaɗɔ mberkɨnda loi, na tel ron go tat loi al dɔ nyat kɨ ɗi'n i ndaa mbera a ne, a tɔlɨna kɔ. I hɔ tɔgi bá, ire kami ngang.