Joel 2 - Maktub Ta Kumkajir

Ndɔ lo Bɨraɓe ndɨ ɗe

¹ I kunɨn towmand kam Siõt, unɨn ndisɨ kɨ dõ i kon ne dɔ mbalbot lom kɨjaɓat. Ad ngéndɨ dɔningt tube ndadɨn kɨta ndɔ lo Bɨraɓe ndɨ ɗe, i nderbe.

² I ndɔ til kɨ lo kɨdiw kirir, i ndɔ kilndii kɨ til kɨdiw kirir. I tit lo kɨ to pitpit tit bijalo kɨ ndɨ tĩ kɨdɔ mbalbogt, titbe tɔ girrde mad kɨ bɨla ngãi kɨ tita goto maɗi, kɨ ɗe goat kaa ne goto mbã ngakat kɨ ngaka.

³ Nõat i horr kɨ õ nya mugɨj, goat i ndõ horr kɨ õ giling giling. Kete nõat dɔning i tit ndɔɔ Eden na goat i dɨlalo kɨ nya gotot. Rota, nya mad kɨ tee ãi jiat goto.

⁴ Ood a tit sɨndag be, ãin ngɔd tit sɨnda ɗɔɔg,

⁵ kahd i tit kah pusɨɗɔɔg kɨ tɔin tasom mbalbogt, kahd i tit ndõ horr kɨ ngekõ gind mũ, tit ɓut ngéɗɔɔg kɨ ngétɔg ĩn ɗa ɗan rod kɨta ɗɔɔ.

⁶ Nõdt tɔ kɨngasa ga deg takumd ɓa kɨmɨllam nda

⁷ ãin ngɔd tit gõɗɔɔg na alɨn ndogbɔrr tit ngéɗɔɔg, dekɨɗen ndia kɨ ɗob lon kɨ sumba sew kanj tɔ ɗob,

⁸ de kɨ mbire namɨn goto, dekɨɗen ndia kɨ ɗobt lon ke ndan rod ta nyakat't kaa, gangɨn na al.

⁹ Ãin dɔ ɓebot, alɨn ngɔd dɔ ndogbɔrrt andɨn kam kujgt na udɨn buro kujgt tit ngéɓoogg be.

¹⁰ Dɔning yee nõdt, dɔrã ndad, kàd kɨ nah duwɨn til, kɨmẽg unjɨn al.

¹¹ Bɨraɓe ad oon dɔ ndin nõ ɓut ngéɗɔɔgt lon kɨta koosɨg loa ĩn ngãibe, na de'n ɗa nya kɨgo tat lo Luwah, i de kɨngang. Kɨtɔ ndɔ lo Bɨraɓe i kɨbobe, i kɨkootɓool tɔ, nõ asɨ ɗa loɗant ndɔt'n non a?

Luwah Kun deg kɨ tɔrrɨn ndid

¹² Ke titbe kaa ne, Bɨraɓe el an: tajigla i telɨn kɨromt kɨ ngarkamsɨ tube, ɔgɨn rosɨ nyasa, i nõn kɨ man kumsɨ, i hɔn ndo,

¹³ i kubg losɨ hã maj kad i tilɨn al na i ngarkamsɨ la maj kad i mbelɨn ye. I telɨn kɨ ro Bɨraɓe Luwaht losɨ kɨta i ngekookumtondo kɨ ngekõkam, i ngendɨ badɔ wongt, i ngekamkẽ kɨngãi na nyàgo kɔjta ɗa majal kɨ ɔj.

¹⁴ Nõ ger a? Maja a tel nyàgo kɔjtaɗa lon, na nya majkurr gont kɨ kadkari nduj kɨ kadkari nyakãi kɨta Bɨraɓe

¹⁵ I kunɨn tow kam Siõt, i ndan mber kogro nyasa, i kunɨn ngékawna kɨnat,

¹⁶ i kawɨn deg kɨnat i ndand kɔtko kɨɗa, i kawɨn kɨbog, i kawɨn ngang kɨ ngang ngékilmba. Ad ngetaa dekɨdẽkij tee kam kujt lon kɨtɨga kɨ dekɨdẽ, ngetaa ngaw kij tee kam lot lon.

¹⁷ Kɨ ngejanyamosɨ ngékɨlaɓerg lo Bɨraɓe nõn mbɨna dɨngɨrt kɨ natlo, anan: I nya deg loi, ah Bɨraɓe, ot kad nyanduba loi tel nyakid na ɓeta telɨn nya godɔt ko ro girrdegt. Kɨtɔɗi a elɨn ku degt anan: Luwah lod i ɗah a?

Kaj ut go tɔrrndi

¹⁸ Kamla Bɨraɓe a ɗa jàng kɨta dɔning lon na a oo kumtondo lo deg lon.

¹⁹ Bɨraɓe turta el deg lon an: Oon, m'a m'la kɨ nyako kɨ man nduu kɨkij kɨ yib m'adsɨ, a i ndanɨn na m'a mad i telɨn nya kid ku degt gog al ta.

²⁰ M'a m'ɔrr madngétasɨg kɨ ɗen ko ɓodo jigel ko sãi m'a m'tuɓad kɨ dɔningt kɨ todɨla kɨ tut kurum. Ɓut kɨ nõat m'a m'laa kam bahbot kɨ ko lo ɓakàdt, Ɓut kɨ goat m'a laa kam bahbot kɨ gida kam bahbot kɨlokudkàdt, nduma kɨkoota kɨgã a ɓai tĩ kɨ log kɨta ɗa nyag kɨbobo.

²¹ Dɔning, ot ɓool, i ɗa ronel kɨ kamnda kɨta Bɨraɓe ɗa nyag kɨbobo.

²² Dãg kɨmut, ot ɓoolɨn kɨta mũ kɨmbool ndɨ ɓa kam dɨlalot, kag ndɨ teen kɨ kand'dg, kag mbaiɓood kɨ dĩndu ndɨ teen kɨ kand'd kɨ to mbuj.

²³ Ĩn deg kɨ Siõ i ɗan ronel kɨ kamnda kam Bɨraɓe Luwaht losɨ kɨta a adsɨ man ndii kaglot kɨ sumba loa a adsɨ man ndii kɨdasa kɨ kɨdɔi ɓalt tit kɨ maɗi.

²⁴ Dɔgarg a ɗoosɨn kɨ nyako gem, loɓanduug a ɗoosɨn kɨ man nduu kɨkij kɨ yib.

²⁵ M'a m'tel m'basɨ gog ɓalg'n tawg kɨ ngan kɨbetg, kɨbetg kɨ dɨbirg kɨ kɨdaag san nya ndɔɔg losɨ, ĩn koosɨ ngéɗɔɔg lom'n m'lad dãsɨt.

²⁶ A i san nya ngãi, ad tɔl ɓood, a i ndubɨn tɔ Bɨraɓe Luwah losɨ'n ɗa nyag kɨyaya kɨtɔsɨ na ro deg lom a sɔld gog al bat.

²⁷ A i gerɨn ta kad mĩ dan Israelt, mĩ Bɨraɓe Luwah losɨ, Luwah kɨɗang goto, na deg lom rod a sɔld gog al bat.