Joel 1 - Maktub Ta Kumkajir

Kɨbetg tujɨn dɔning

¹ Ta'n Bɨraɓe el Joel, ngon Petuel.

² Oon dɔ ta 'nten ĩn bɨgag, i nelɨn mbisɨ ĩn ngendɨ dɔning Israelt tube. Nya kɨtitbe ɗa nya kam ndɔgt losɨ ke kam ndɔgt lo bɔwsɨg a?

³ Ɔrrɨn hoia ngansɨg, kɨ ngansɨg tɔ ɔrrɨn hoia ngandg na ngandg a ɔrrɨn hoia ngaka kɨ a ɗen.

⁴ Nya'n tawg nyan ye, kɨbetg san, nya'n kɨbetg nyan ye, dɨbirg san, nya'n dɨbirg nyan ye, kɨdaag san.

⁵ I ndoolɨn, in ngékasɨɗa, i nõn, in tube, ngekãi kasɨnduu udɨn wi kɨta kasɨnduu kɨkij'n a ɔrrɨn tasɨt kɔ nõ.

⁶ Kɨtɔ girrdeg mad ɓai ndoor dɔning lom, i girrdeg kɨ ngétɔg kɨ de asɨ da kɔrd al, ngangd tit ngang tubo na sile ngangd tit lo kõ tubo.

⁷ Tujɨn dĩndug, na ɔrrɨn ngɔ kag mbaiɓoodg lom, ɔrrɨn ngɔd tube na land ber ad dɔ jidg ndàn ngũng.

⁸ I hɔn ndo, i nõn tit ngomand'n lan kub hɔndo kɨta ngawɨn kɨ oi.

⁹ De kɨ ɗe kadkari nduj kɨ kadkari nyakãi, kuju lo Bɨraɓe goto. Kɨta 'nten ngéjanyamosɨ kɨ ngékɨlaɓer lo Bɨraɓe hɔn ndo.

¹⁰ Tujɨn ndɔɔg, dɔning ɗoosɨ kɨ ndo kɨ hɔ kɨta nujɨn nyako, man nduu ii, na yib tɨga.

¹¹ I ɗan rosɔl, ĩn ngéndɔɔg, i udɨn wi, ĩn ngékoogo ndɔɔ nduug kɨta nyako gem kɨ nyako ɔrj kɨta nyako kɨ kam ndɔɔt nuj kɔ.

¹² Dĩ nduu tut, mbaiɓood ndulo, kag grenadie, kag tumbur kɨ kag kɨmasɨ, kagg tube kɨ kam ndɔɔt tutɨn, ronel goto ro degt.

Kɔgro nyasa kɨ kelta kɨ Luwah

¹³ I lan kub hɔndo, i nõn, ĩn ngéjanyamosɨ, udɨn wi, ĩn ngéɗakɨlaɓer lo dɨngɨr kadkari, i ɗen, i hɔn lo to ndɔ ne kɨ kub hɔndo rosɨt, ĩn ngéɗa kɨlaɓerg lo Luwah lom, kɨta adɨn kadkari nduj kɨ kadkari nyakãi, kuju lo Luwah losɨ al,

¹⁴ I ndan mber kɔgro nyasa, i kunɨn ngékawna kɨnat i kawɨn kɨbog kɨnat kɨ deg tube'n ndɨn kam ɓet kɨ kam kujt lo Bɨraɓe Luwah losɨ, i kon kɨdɔ Bɨraɓet.

¹⁵ Yi! Ndɔ'n non, a i ndɔ kɨkootɓool kɨta i ndɔ lo Bɨraɓe ndɨ ɗe tit yokoosɨ kɨ ngenuj deg kɨgo kɔjt'n Luwah kɨ Ngetɔg ɔjɨn kamɨnt.

¹⁶ Unɨn nyasa takumjt kɔ ale? Ronel kɨ kamnda goton kam kujt lo Luwah loj ale?

¹⁷ Konya ndum girr ningt, damg ĩn kɨtuj, kuj ngom nyako tetɨn kɨta nyako tut.

¹⁸ Oon, dãg ndɨ tõn ɗusɨɗusɨ, ɓut mangg tɔ oon lo kɨ awɨnt al kɨta nyasa lod goto, ã, ɓut batg tɔ ngahn nyasa al,

¹⁹ A Bɨraɓe, m'ko kɨ dɔit kɨta horr õ lokulnyag kɨ kam ndɔɔt na ndõ horr õ kagg kɨ kam mut,

²⁰ Dãg kɨmut tɔ ndɨ kon kɨdɔit kɨta man tube ii ndã, na horr õ lokulnyag kɨ kam ndɔɔt.