Job 1 - Maktub Ta Kumkajir

Job i ngemaj, ɓool Luwah

¹ Maɗi nu de mad ndɨ dɔning Uts, tɔa i Job. De'n non i de kɨ kasɨnatap, i de kɨdenesew, ɓool Luwah na mbet nyaɗa kɨmajal,

² Ooj ngan kɨdɨngãg tanãimɨta kɨ ngan kɨdẽg mɨta.

³ Aw kɨ batg dub tanãimɨta kɨ lukumg dub mɨta kɨ bɔw mangg joo joo ɓu mi kɨ kon korrog ɓu mi kɨ ngékɨlaɓerg ngãibe. De'n non i kɨbo tɔi deg tube kɨ ngendɨ loɓakàdt.

⁴ Nganag awɨn kɨ nyabelɓe lod, a awɨn be lo na kad ɗan mburnam, dekɨɗen aw kɨ ndo lon na a kunɨn kõnandg kɨmita kad san ho ãin ho nat sed.

⁵ Lon ndɔ ɗa mburnam lod tɨga woi ye. Job a kund kɨront kad ard, a ɓai kɨsĩ ritit la kadkari kɨlahorrt kɨta dekɨɗen kudt kɨta Job el an: Maj a ne, nganɨm ɗan majal ndoorɨn Luwah ngar kamdt. Titbe la Job a ɗan kɨndɔgndɔg.

Luwah nya ɗob ad Su na Job

⁶ Ndɔ mad ngan Luwah ɗen ɗàn nõ Bɨraɓet na Su ɗe ɗa dandt ho.

⁷ Bɨraɓe el Su an: I ɓai ko ɗah a? Su tur el Bɨraɓe an: M'ɓai ko lago dɔning kɨ log'n m'a m'ndiat.

⁸ Bɨraɓe el Su an: I oo ɓer lom Job a? De mad kɨ tit sia dɔningt ne goto. I de kɨkasɨnatap kɨ kɨdenesew, ɓool Luwah, mbet nyaɗa kɨmajal,

⁹ Su tur el Bɨraɓe an: Job ɓool Luwah kari a?

¹⁰ I nda kɨnga gug dɔa kɨ ngékɨɓe loa kɨ nyag loa tube ale? I ad maj urr kɨlaɗa jia na nyag loa bɨlan ngãi dɔningt.

¹¹ Na i la jii ɔdɨn nyag loa tube oo ke a elta kɨmajal dɔit takumit al a,

¹² Bɨraɓe el Su an: Oo nyag loa tube m'la jiit. Nya kɨɗabe, roa taa ot kad nya mad ɗaa. Kamla Su tee ko nõ Bɨraɓet.

Tuj so dɔ ngan Jobt kɨ nyamajg loa

¹³ Ndɔ mad ngan Job kɨdɨngã kɨ kɨdẽ ndɨ san nya na ãin man nduu kam kujt lo ngon kõd kɨtɔg.

¹⁴ Ngombangkɨla mad tee ro Jobt ela an: Mangg ɗà ndɔrɨn, korrog ɗa san nya kad'dt

¹⁵ tentenbe Sabaniag ɗe son dɔdt, hɔnd na tɔlɨn ngékɨlaɓerg kɨ kiyaɗɔɔ, Mĩ kɨ kɨɗambe la m'tee jidt m'ɗe kɨ m'ɔrri hoia.

¹⁶ Ɗà elta ɓaitɔ ye de mad ɗe ela an: Horr lo Luwah tee kɨko dõ dɔrãt so dɔ batgt kɨ ngéɗakɨlag loi õnd mugɨj tube, Mĩ kɨ kɨɗambe la m'ãi m'ɗe kɨ m'ɔrri hoia.

¹⁷ Ɗà el ta ɓaitɔ ye de mad kɨɗang ɗe el an: Kaldeag ndan rod nat ɓut mɨta son dɔ lukumgt, hɔnd na tɔlɨn ngékɨlaɓerg loi kɨ kiyaɗɔɔ. Mĩ kɨ kɨɗambe la m'tee jidt m'ɗe kɨ m'ɔrri hoia.

¹⁸ Ɗà el ta ɓaitɔ ye de mad kɨɗang ɗe el an: Ngani kɨdɨngã kɨ kɨdẽ ndɨ san, ãin man nduu kam kujt lo ngonkõd kɨ tɔg

¹⁹ na oo, nél kɨbobe ɓai kɨko dɨlalot nda dɔkum kuj kɨsɔɔ ad teet dɔ nganigt ad oin. Mĩ kɨ kɨɗambe la m'ãi m'ɗe m'ɔrri hoid.

²⁰ Kamla Job ɓai til kub lon, ngɨse dɔn, got gog so ningt ɔsɨ dɔn ber

²¹ el an: M'tee kɨ rom kari kam kõmt, m'a m'tel kɨ rom kari tɔ. Bɨraɓe la ad, na Bɨraɓe tɔ taa, kɨ ndubɨn tɔ Bɨraɓe.

²² Kam nyagt'n non tube Job ɗa majal al, elta kɨmal dɔ Luwaht al tɔ.