Jeremi 7 - Maktub Ta Kumkajir

Juda ɗa yo, ad yerr kɨ ron

¹ Ta'n tee kokɨro Bɨraɓet, ɗe ro Jeremit, an:

² I ɗa tabit't lo kuj lo Bɨraɓe, lot'n non i la mber ta 'nten an: Oon dɔ ta lo Bɨraɓe ĩn deg kɨ Juda tube, ĩn ngékand tabitg'n ɗan kɨta kɔsɨ dɔ ber nõ Bɨraɓet.

³ Titbe kel Bɨraɓe Ngekoosɨg, Luwah lo Israel. I oon go ɗobg losɨ kɨ kɨlaɗasɨ kamla m'a m'nyasɨ kad i ndɨ kam lot'n ɗan.

⁴ Ot ɓan kul tag kɨngom kɨ kan: Kuj kɨjaɓat lo Bɨraɓe, kuj kɨjaɓat lo Bɨraɓe, kuj kɨjaɓat lo Bɨraɓe.

⁵ Ĩla i gangɨn ta denesew ku det kɨ madɓen,

⁶ ĩla i ɗan ngetɔg dɔ mbaht, ke ngonhal, ke nge ngawkoi al, ĩla ũn mosɨ kɨkanj ta lot'n ɗan al, ĩla i awɨn ro yogt kɨ mbah al in tee kɨ majal dɔsɨt a ne,

⁷ m'a m'adsɨ ndɨ kam lot'n ɗan kam dɔningt kɨ mad bɔwsɨg maɗi nu mbãkɨnõt.

⁸ Na oon i ndɨ ɓan kul tag kɨngom kɨkari pãbe.

⁹ Ɗi kɨ be? I ɓoogɨn i tɔlɨn deg, i ɗan kaya i lan horr nya kɨkootmbĩ adɨn Baal, i awɨn go yogt kɨ i gerɨnd kete al.

¹⁰ Goot gog i ɗen, ɗan nomt kam kujt'n ɗan in kunɨn tɔm dɔt, elɨn anan: Aj ji woi. Na I ho ɗan nyag kɨyerr.

¹¹ Kuj'n ɗan in kunɨn tɔm dɔt ye tel bulo to ngekumɗob ta kumsɨt a? Mĩ kɨbe kɨdɔm m'oo nya 'nten. Titbe la i takel Bɨraɓe ye.

¹² Awɨn lot lom kɨjaɓat, Silo, in tɔm ndɨ koot maɗi nu, oon nya'n m'ɗa sia kɨta ɗagootal lo deg lom Israel.

¹³ Na tajigla, tit kan i ɗan kɨlag 'nten tube. Titbe la i takel Bɨraɓe ye. Tit'n m'elsɨn ta kɨdɔtdɔt kanj nya ta, na oon dɔ al m'kunsɨ na i turɨn ta al.

¹⁴ Kɨtɔ 'nten m'a m'ɗa kɨ kuj'n ɗan in kunɨn tɔm dɔt, ĩn i ɓan kula, kɨ lon m'adsɨ kɨ bɔwsɨg tit'n m'ɗan kɨ Silo ye be.

¹⁵ M'a m'lasɨ kɔ takum'mt tit'n m'lan ngankõsɨg kɔ, ad i koh Epraim kɨtaagbe.

¹⁶ Na ĩ Jeremi taa, ot kɔ kɨta deg'n ɗan, ot kun ndii kɨ dõ kɔn, ke kelta sem kɨtad, ot kɔ kɨkanj nya ta kɨtɔ kad m'a m'oo dɔ kɔ loi al.

¹⁷ I oo nya'n ɗan kam ɓebogt kɨ Juda kɨ dɔ ɗobgt kɨ Jerusalem ale?

¹⁸ Ngang ɔin kir, bɔwdg ɗan horr, dekɨdẽg lɔi'n nduj, ɗan ne woina kad ngar kɨdẽ kɨdɔrãt kad nũn kadkari nyakãi n'adɨn yog kɨmbah kɨtakad kɨ n'sɔkɨmɨn ne.

¹⁹ I mĩ la ndɨ sɔkɨmɨn yo oo? Titbe la i takel Bɨraɓe ye. Ĩn kɨdɔd ten kɨ girr rosɔl lod kɨkɔsɨdɔd ale?

²⁰ Kɨtɔ 'nten titbe kel Bɨraɓe Luwah: Oo, wong lom, wong lom kɨtɨngabil a ɗe dɔ lot'n ɗan, dɔ det kɨ dɔ nyakult kɨ kag kɨ kam ndɔɔt kɨ kandnya kɨdɔningt, a õ tit horr be na a oi al bat.

Mbetɨn koo dɔ ta lo Luwah

²¹ Titbe kel Bɨraɓe Ngekoosɨg, Luwah lo Israel: I lan kadkari losɨ kɨ lahort kɨ kɨjakɔ dɔt, i san dã.

²² Lon mad bɔwsɨg teen ne dɔning Ejipt't kɨtɨga ye, m'eld ta ke m'ndad mber dɔ kadkari kɨlahorrt ke kadkari kɨjakɔ al.

²³ 'Nten la i mber'n m'ndad: Oon dɔ ndim a ne, m'a mĩ Luwah losɨ a ĩn deg lom ho. I ndian kam ɗobgt lom tube ĩn m'ndasɨ mbera kɨtakad maj urrsɨ.

²⁴ Na oon dɔ al, nelɨn mbid al tɔ, telɨn rod go ndimt al, na taan takɔj kɨmajal kɨ ngarkamdt kɨkongkong, awɨn kɨkete al, na telɨn kɨ gog.

²⁵ Lon bɔwsɨg teen dɔning Ejipt't mbã ɓone, ndɔ tube m'la kɨ ɓerg lom ngekelta kɨ tamt kɨrosɨt,

²⁶ na ĩng taa ne, oon dɔ ta lom al, nelɨn mbid oon ne al tɔ, na ngɨran god, ɗan majal tɔi kɨlo bɔwdg ɓaitɔ.

²⁷ Ĩla i eld tag 'nten tube kaa a oon dɔ ta loi al, ke i kund kaa a turɨn ta al.

²⁸ Kamla i eld an: Oo girrdeg'n oo dɔ ndita lo Bɨraɓe Luwah loa al, ndig ta takɔj al ta kɨrota goto roat, tee taat al.

²⁹ I ngɨse dɔi, i laa kɔ sãi i nõ hɔndo dɔ doorlogt kɨ ton dɨla kɨta Bɨraɓe mbet ngakan ɗan, ngésɔk wong loa kɨtɔlsɔkɨr.

Ndɔg kɨmajal ngãi a ɗen

³⁰ Kɨtɔ ngan Juda ɗan nya kɨmajal takum'mt kel Bɨraɓe. Udɨn nyag kɨyerr kam kujt lom, in kunɨn tɔm dɔt telɨna kɨyerrt.

³¹ Ɗan dɨngɨr mad'n tɔa i Topet kam hollot lo ngan Hinom kɨtakad lan ngandg kɨdɨngã kɨ kɨdẽ horrt, nya'n m'nda mbera al, na m'ga kamm dɔt al tɔ.

³² Kɨtɔ 'nten oon, ndɔg ndɨ ɗen nõ. Titbe la i takel Bɨraɓe ye. Lon a kunɨn tɔa Topet ke Hollo lo ngan Hinom gog al ta, na a elɨn anan: I Hollo tɔl deg. A duwɨn ngékoig kam Topet kɨta lo dub nin kɨɗang goto.

³³ Nin deg'n non a tel nyasa yelg kɨ dõ kɨ dãg kɨ dɔningt, na de mad in a tuɓad kɔ goto.

³⁴ M'a mad kud wi kɨronel kɨ kamnda goto kam ɓebogt, kɨ Juda kɨ dɔ ɗobg kɨ Jerusalem, ndi pa lo ngetaa dekɨdẽ kij, kɨ pa lo ngetaangaw kij a goto kɨta dɔning a tel gotlo.