Jeremi 6 - Maktub Ta Kumkajir

Jerusalem a so dan kamkɔlt

¹ Ĩn deg kɨ Benjami, i tee ãin kɔ kam Jerusalemt, i kunɨn tow kam ɓet kɨ Tekoa, i ɗan nyakɔj dɔ ɓet kɨ Bet Kerem kɨ dõ kɨta nujkɔ a ɗe kojigel, i nujkɔ kɨbobe.

² M'a m'nuj ngomand kɨmaj, ɓebo Siõ kɨ to kumndà kɔ.

³ Deg ɓain awɨn kɨ roat Tit ngékulnyag kɨ ɓut nyakulg lod, a ndan kujkubg lod gugɨn dɔa, ɓut kɨɗen a sanya kam lot lon.

⁴ I ɗan go rosɨ kɨta ɗɔɔ sia, I ɓain, dan kada kaa, ad j'awɨn. Ɓe to loj, kad ɗa ud na ndil nya kɨlokɨsɔle tee ngal.

⁵ Ad kɨ bai, j'awɨn kɔndɔ ne kad kɨ nuj kuj kõɓeg loa.

⁶ Kɨtɔ titbe kel Bɨraɓe Ngekoosɨg: I gan kagg, i ɓan lo kɨ dõ ndoorɨn ɓebo Jerusalem, oo, i ɓebo'n sumba kad nda ɔja, nyaɗa kɨlo ngetɔgt koon la ɗoosɨ kama ye.

⁷ Tit'n buloman ndɨ ɓa kɨ man, titbe tɔ la nyaɗa kɨgoot al loa teen ye. Oon dɔ kah nyaɗa kɨlo ngetɔgt kɨ nujkɔ kamat, kõg kɨ dog ĩn nomt kɨndɔgndɔg.

⁸ Ah Jerusalem, i taa takɔj na ɓeta a ne, m'ɔrr rom roit kɔ, m'teli gootɓe, dɔning kɨ de gotot.

⁹ Titbe kel Bɨraɓe Ngekoosɨg: A burɨn ndeg Israel kɨnãi tit'n deg a burɨn ne kand nduu. I tel nda jii dɔat gog tɔ, tit'n ngeja kand nduu tel jin, nda dɔt nduut ye be.

¹⁰ Nõ m'a m'ela ta a? Nõ m'a m'una ngemanajt kad oon do a? Oon, mbid ut, asɨn ko dɔ al, ta lo Bɨraɓe tel nyakid rodt, ngahn ronel tit al.

¹¹ Mĩ taa, wong lo Bɨraɓe kɨtɔlsɔkɨr ɗoosɨ kamm, m'asɨ ndɨdɔt al. M'ũa dɔ ngont kɨdɔ ɗobt kɨ kɨdɔ kawnat lo basag, kɨta a hɔn dɨngam kɨ dekɨdẽ, bɨgag kɨ de'n ndɔa i ngãi.

¹² A taan kujg lod kɨ ndɔɔg lod kɨ nẽdg adɨn deg madg lon m'a m'la jim kɨdɔ ngendɨ dɔningt'n ɗan. Titbe la i takel Bɨraɓe ye.

¹³ Kɨtɔ 'nten la m'mbagirra dɔ de kɨdɔdut mbã kɨdɔ kɨbot, tube ĩn ngeɗakumnda, mba girra dɔ ngekelta kɨta Luwaht mbã kɨdɔ ngejanyamosɨt tube, ĩn ngégool deg.

¹⁴ Dɔn dó lo deg lom ad ta dó ho sĩsĩ, elɨn anan: Lapia lapia. Na lapia goto.

¹⁵ A ĩn kɨ rosɔl kɨta nyaɗa kɨyerr, rod sɔld al bat, unɨn kumd kɨ dõ kari. Kɨtɔ 'nten a son nat kɨ deg'n son, a tɔsɨ tɨland lon m'nda m'ɔjd. Titbe la i takel Bɨraɓe ye.

¹⁶ Titbe kel Bɨraɓe: I dɨba i ɗa da dɔ ɗobt, oon lo, i ndɨjen ɗobg kɨmaɗi oon, ke ɗob kɨ ɗah i kɨmaj a? I ndiant na a i ngahn ne taakò kɨta rosɨ. Na turɨn anan: Jĩ j'a kɨ ndiat al.

¹⁷ M'nda ngéngomlo rosɨt m'an: I nelɨn mbisɨ dɔ ndi towt. Na i turɨn anan: J'a kɨ nel mbij al.

¹⁸ Kɨtɔ 'nten oon dɔ, ĩn girrdeg kɨ dang dang. Ĩn ngékawna lo girrdeg kad i gerɨn ne nya'n a ɗad.

¹⁹ Deg kɨ dɔningt, oon dɔ. M'a m'ɗe kɨ nyakɨto dɔ degt'n ɗan, i kand tagahd kɨta nelɨn mbid dɔ tagt lom al mbetɨn mberkɨnda lom.

²⁰ M'a m'ge nya kɨkootmbĩ kɨ ɗe ko Seba kɨ kadnya kɨnel kɨdɔningt kɨsãi a? Kadkari losɨ kɨlahorrt ye, m'ge al kadkari losɨ kɨjakɔ nelɨm al tɔ.

²¹ Kɨtɔ 'nten titbe kel Bɨraɓe: Oo, m'a m'la mbal gagigt nõ degt'n ɗan, bɔwg kɨ ngang nat tube a gan njad dɔt madɓe kɨ nam a nujɨn.

²² Titbe kel Bɨraɓe: Oo, girrdeg mad ɓai ko dɔning kɨjigel, ndɨ ɗe girrdeg kɨbo ndɨ ɓai ko sãi dɔngoi dɔningt.

²³ Hɔn gã kɨrã kɨ ninga jidt, ngeɗa takõ kɨkanj kookumtondo ndid ko tit bahbo be, ndɨn dɔ sɨndagt. Dekɨɗen kudt ɗa ron woi kad ɗɔɔ sesɨ, ĩn ngendɨ Siõ.

²⁴ J'oo hɔid, jij oi yelel kamkɔl ɗaj, daiyo tit kɨlo dekɨdẽ kɨ ngetõkooj be.

²⁵ Ot teen kam ndɔɔgt, ot kawɨn dɔ ɗobgt kɨta kiyaɗɔɔ lo madngéta i nõ tuj kɨbobe gug dɔ lo gej,

²⁶ Deg lom kɨ ɓebot, i dõ ɓosɨ kɨ kub hɔndo, i ndubɨrɨn rosɨ kam buhoort i hɔndo ɗa hɔn ne ndo lo ngon kɨdɨngã kɨkal kɨɗabe, i nõn non kɨkatbang, kɨta, ngetujnya ndɨ ɗe, a hurj ruk.

²⁷ M'ndai ku degt lom kad i nánd, kad i gerd kɨ nan ɗobg lod.

²⁸ Ĩn, tube, ĩn ngétaaɗɔɔ, ngélata ko degt, ĩn ningakasɨ kɨ hand tube, ĩn nya kɨndum.

²⁹ Ndub ndɨ ɔsɨ ngãi na horr õ nar plomb kɔ, ndɨ arɨna kari kɨndang, majal loa ɔrr al.

³⁰ Kunɨn deg'n non nar arjã kɨmajal kɨta Bɨraɓe mbetd.