Jeremi 5 - Maktub Ta Kumkajir

Girr takɨgang kɨdɔ Jerusalemt

¹ I ãin ngɔd kɨdɔ ɗobg kɨ Jerusalem, i nɔlɨn, oon kad i gerɨn. I sahn kam natlogt kad i ngahn de, de mad kɨ hɔ ɗa nya kɨdenesew, de kɨro. Kamla m'a m'nyago majal lo Jerusalem kɔ.

² Ke neni elɨn anan: Bɨraɓe ndɨ kɨ dɔa dõ, kaa ne ndan yo takɨbal kari.

³ Ah Bɨraɓe, kumi oo nyag kɨrota al e? I ndad na rod tod al, i tɔɔ kohd na mbetɨn ndakɔj, takumd ngang tɔi mbal, mbetɨn tel kɨroit.

⁴ M'el m'an: Rota, deg'n ɗan ĩn ngéndog, ɗan nya kɨlo ɓoodt kɨta gerɨn ɗob lo Bɨraɓe al, ke mberkɨnda lo Luwah lod.

⁵ M'a m'aw ro kɨbogt m'a m'eld kɨta gerɨn ɗob lo Bɨraɓe ɓet kɨ mberkɨnda lo Luwah lod tɔ, na deg'n non tetɨn jug, gangɨn kɨla dɔɔ.

⁶ Kɨtɔ 'nten la tubo kɨ kam kút hɔd biskolo kɨmut nujd, kag ndia gug dɔ ɓe lod, dekɨɗen in tee tɨga a ne, tubo a hɔa, ria nat, kɨta tɔin dɔ ta ngãibe, ɗagootal lod bɨla kɨdɔtdɔt.

⁷ Titbãi m'a m'nyan go majal loi kɔ a? Nganig tĩn nyàmɨn kɔ, ndan yo kɨ takul nya kɨ i Luwah al. M'uld kɨ nyasa kɨmaj na ɗan kaya kawɨn na koosɨg kam kujt lo kaya dekɨdẽ.

⁸ Titɨna kɨ sɨndag kɨ ulɨnd maj, ndian kɨ log papa, nẽbe kɨ nube, kɨɗen kudt la ndil, sahn nẽ madɓen.

⁹ Nya kɨ titbe m'a m'ɔj kuma ale Titbe la i takel Bɨraɓe ye. Girrdeg kɨ titbe, m'a m'nda ngɨra dɔat ale?

¹⁰ I alɨn dɔ ndogbɔrrt loa, i nujɨnd, na ot nujɨm kɨtaagbe. I gangɨn dɔj nduun i lo Bɨraɓe al kɔ.

¹¹ Kɨtɔ ngékɨɓe lo Israel kɨ ngékɨɓe lo Juda ɗan sem nya kɨlo ndokumt, Titbe la i takel Bɨraɓe ye.

¹² Majɨn ta ger Bɨraɓe, elɨn anan: Luwah goto. Nyakɨto a ɔdj al j'a j'oo nyakat ke bo al.

¹³ Ngekelta kɨta Luwaht tit'n kɨ nel la kɨjeje goto kamdt; titbe a ɗan ne sed ho ye.

¹⁴ Kɨtɔ 'nten Bɨraɓe Luwah Ngekoosɨg elɨn ta. Tit'n i elɨn ta 'nten oo, m'ndig kad ta lom kɨ tee tait i horr na deg'n ɗan ĩn kir kad horr õd.

¹⁵ Oon, m'ndɨ m'ɗe kɨ girrdeg kɨsãi kɨ dɔsɨt Ĩn ngekɨɓe lo Israel, Titbe la i takel Bɨraɓe ye. I girrdeg kɨngang i girrdeg kɨ ndɨ maɗi nu, girrdeg'n i ger ta ɓe loa al, oo dɔ ta loa al tɔ.

¹⁶ Ɓɔl kɨrãg loa i dɔɓad kɨ ɗa tag, tube ĩn gõɗɔɔg.

¹⁷ A san nyako loi kɨ nyasa loi, a san ngani kɨdɨngãg kɨ kɨdẽg, a san batg loi kɨ mangg loi, a san kand nduu loi kɨ kand kag mbaiɓood loi. Ɓebog loi kɨngang ĩgɨn i ɓakuld ye, a nujd kɨ kiyaɗɔɔ.

¹⁸ Na ndɔt'n non kaa, m'a m'nujsɨ kɨtaagbe al. Titbe la i takel Bɨraɓe ye.

¹⁹ Lon deg loi a elɨn anan, Kɨtɔɗi Bɨraɓe Luwah loj ɗan sej nyag kɨ titbe a? Kamla a turd an: Tit'n i nyàmɨn ne kɔ na i ɗan ɓer adɨn yog kam dɔningt losɨ ye, titbe tɔ a i ɗan ne ɓer lo mbahg kam dɔningt kɨ i losɨ al.

²⁰ I elta 'nten ad ngékɨɓe lo Jakob oon dɔ, i la mbera kam Judat an:

²¹ Oon dɔ ta 'nten maj ĩn ɓood deg kɨkanj terr, ĩn kɨ kumsɨ na oon ne lo al ĩn kɨ mbisɨ na oon ne dɔ ta al.

²² I ɓoolmɨn ale? Takel Bɨraɓe. Rosɨ ndad kɨnomt ale? Mĩ kɨ ngenda ngár kad i ɗobnin bahbo i ɗobnin kɨtokɨnõt kad tɔi dɔ al hula ɔsɨ pɨkapɨka na tɔga asɨ al, ko huhu na tɔi al.

²³ Na deg'n ɗan ĩn ngédɔngang, taan takɔj al ĩn ngételrogotat al, Ĩn ngétaaɗɔɔ na kaw lo kɨ kamsɨ ge.

²⁴ Elɨn kamdt anan: Ad kɨ ɓoolɨn Bɨraɓe Luwah loj. Elɨn titbe al. I ngekad ndii kɨdasa lon ɓart mban girrɨn mbã ndii kɨ kɨdɔboit, lon ɓal ndɔt ad kaglo tet nyako ɗe ad kaglog ton lotodt.

²⁵ Ɗagootal losɨ la ɔgsɨ majkurr, majal losɨ to la ɔgsɨ nyamajg ye.

²⁶ Kɨtɔ ngahn deg kɨmajal ku degt lom umɨn lo tit ngehɔ yel be, yan gum hɔn ne deg.

²⁷ Tit'n kuj yel ɗoosɨ kɨ yelg, kujg lod ɗoosɨn kɨ ndokum titbe telɨn ngétɔg kɨ ngenyangah.

²⁸ Ulɨn rod, boon mbulmbul, rod ndulo, ɗan majal kɨtɔi, gangɨn ta lo ngan halg kad maj urrd al gangɨn ta lo ngendog al tɔ.

²⁹ Nya kɨ titbe, m'a m'ɔj kuma al e? Takel Bɨraɓe. Girrdeg kɨ titbe, m'a m'nda ngɨra dɔat al e?

³⁰ Nya kɨmajal ngãi kɨ kɨyerr ndɨ ɗa nya kam dɔningt 'nten

³¹ Ngekelta kɨta Luwaht elɨn ta kɨ ngom, ngejanyamosɨ õnɓe kɨgo takɔjt lod na deg lom gen nya kɨ titbe. Dɔboia a ne, a i ɗan ɗi a?