Jeremi 4 - Maktub Ta Kumkajir

Tuj a ɗe dɔ Judat kɨ Jerusalem

¹ Ah Israel, ĩla i tel, ĩla i tel kɨ romt. Titbe la i takel Bɨraɓe ye. Ĩla i ɔr nyag kɨyerr loi kɔ nomt a ne, a ĩn ngekaw kɨ njasɨ dõ al ta.

² Ĩla i nda yo an: Bɨraɓe ndɨ kɨ dɔa dõ kam rotat kɨ nyaɗa kɨgoɗobat kɨ kɨdene sew, kamla girrdeg a ngahn majkurr kamat na a ngahn tɔko kamat.

³ Kɨtɔ titbe la Bɨraɓe elɨn deg kɨ Juda kɨ deg kɨ Jerusalem an: I ndɔɔn ndɔɔ losɨ kɨkij, ot duwɨn nya dan kongt.

⁴ I jan rosɨ ɓat kɨta Bɨraɓe, i jan gaj ngarkamsɨ, ĩn deg kɨ Juda kɨ ngéndɨ Jerusalem na ɓeta wong lom ndu õsɨ tit horr be in de asɨ tɔla al kɨta kɨlaɗasɨ kɨ majal.

⁵ Ɔrrɨn hoia kam Judat, i lan mbera Jerusalemt anan: I kunɨn tow kam dɔningt, unɨn ndisɨ kɨ dõ anan: I kawɨn'na kɨnat, ad j'awɨn kam ɓebogt kɨngang.

⁶ Unɨn drapo kɨ dõ sumba lo kɨ Siõ ãin na, ot duban kɨta m'a mad nya kɨ majal kɨ nujkɔ kɨbobe ɗen kojigel.

⁷ Tubo ndɨ tee kam bulot lon, ngenuj girrdeg kɨ dang dang, ɓai londɨnt, so ɗobo kɨta nuj dɔning losɨ. A tel ɓebog loi gootɓe, ngéndɨt a goton.

⁸ Kɨtɔ 'nten i lan kub hɔndo rosɨt i nõn, i udɨn wi, kɨta wong kɨtɨngabil lo Bɨraɓe a nyàj al.

⁹ Ndɔt'n non ngar kɨ mbaiɓeg, Titbe la i takel Bɨraɓe ye. Rod a oi siw; ngejanyamosɨ, rod a ndad; ngekelta kɨta Luwaht, ɓool a ɗad.

¹⁰ Kamla m'el m'an: Ah Bɨraɓe Luwah, i gool deg'n ɗan kɨ Jerusalem tɔ an: A i ngahn lapia. Na kiyaɗɔɔ aw mbã tɔld.

¹¹ Ndɔt'n non a elɨn deg'n ɗan kɨ Jerusalem anan: Nel kɨtɨngabil ɗe ko doorlogt kɨ dɔ dɨlalot, dɔ ɓebo lo deg lom. I kɨta to tisa ke kɨta kar nyako al.

¹² I nel kɨ la kɨ tɔg ngãi in ndɨ ɗe kokɨromt. Tajigla m'a m'tee kɨ takɨgang lom kɨdɔdt.

¹³ Oon, ngenuj deg ndɨ ɗe tit kilndii be pusɨɗɔɔg loa tit'n kɨ nélbarwãi, sɨndag loa ãin ngɔd tɔin kurog. Beto loj kɨta jĩ kɨnuj.

¹⁴ Ah Jerusalem, i ar ngarkami dɔ majalt kɨtakad i aj. Mbã ndɔ bãi a i ngomɨn tagahi kɨ majal kamit a?

¹⁵ Kɨtɔ ndita tee ko dɔning Dan, elta ko dɔ mbalbot kɨ Epraim, ndɨ ɔrr hoi nujkɔ.

¹⁶ Ɔrrɨn hoia girrdeg kɨ dang dang, adɨn ngéndɨ Jerusalem gerɨn madngéta ndɨ ɗen ko dɔningt kɨ sãi unɨn ndid kon ne ndoorɨn ɓebog kɨ Juda.

¹⁷ Gugɨn dɔ Jerusalem gej tit'n kɨ deg ngengomd ndɔɔ be kɨta tam ɗɔɔ. Titbe la i takel Bɨraɓe ye.

¹⁸ Ɗobg loi kɨ kɨlaɗaig la ten kɨ nyag 'nten dɔit kand nyaɗai kɨgoot al. Rota, i kɨkatbang, mbut lo mbã tee ngarkamit.

¹⁹ Kamkɔl, kamkɔl lom, mĩ kɨ kamkɔl ngarkamt kamm ndɨ gam pipi, m'asɨ ndɨ tam mbo al, kɨta rom oo dɔ ndi tow ɗɔɔn ndɨ ko

²⁰ Ɔrrɨn hoi nujkɔ kɨdɔ nujkɔt kɨta tujɨn dɔning tube. Nujɨn kujkubg lom kɨ kub ganglo lom tentenbe.

²¹ Mbã ndɔ ɗi m'a m'oo drapo na m'oo dɔ ndi tow a?

²² Rota, deg lom ĩn ɓood germɨn al ĩn ngang kɨ hangald goto, goosɨ lod goto, nyager lod i majalkɨɗa, gerɨn nya ɗa kɨmaj goto.

²³ M'oo dɔning na i gotlo kɨ to kari, nya gotot, m'oo dɔrãg na kunjd goto,

²⁴ m'oo mbalbog na oo ĩn kɨye, doorlog tube ndɨ yeen yɨkɨtyɨkɨt.

²⁵ M'oo lo na m'oo de kɨɗa al, yelg kɨ dõ tube ãin na.

²⁶ M'oo na oo, Karmel tel dɨlalo, ɓebog loa tube ĩn kɨtuj nõ Bɨraɓet, nõ wongt loa kɨtɨngabil.

²⁷ Kɨtɔ titbe kel Bɨraɓe: Dɔning tube a tel gootɓe na m'a m'nuja kɨtaagbe al.

²⁸ Kɨtɔ 'nten dɔning a hɔndo, dɔrã kɨ dõ, til a ut dɔa kɨta m'el taa, M'ɔj ta ɗaa, m'a m'mbel kɔm al, m'a m'nya ta ɗaa al tɔ.

²⁹ Oon dɔ kah ngekalsɨndag kɨ ngékurkɨrãg deg tube ngendɨ ɓebot ãin na, a yan rod kam kut, a alɨn dɔ mbalgt, nyan ɓebog tube, de kɨ ndit goto.

³⁰ Na in Jerusalem, gootɓe kɨnuj, a i ɗan a. I la kub kɨkɨre wor wor roit, i pare roi kɨ nar ɔr, i tɔrr ɓal kumi, i ɗa mand kari kɨndang ngetarig kidin, ndɨ sahn ɗob tɔli.

³¹ Kɨtɔ m'oo dɔ ko tit ndi dekɨdẽ kɨ ngetõkooj, kamkil ɗaa tit dekɨdẽ in ndɨ ooj ngonderɨn. Ɓebo Siõ ndɨ tõ ɗusɨɗusɨ, la jin an: Beto lom tajigla kɨta rom oi siw nõ ngetɔldegt.