Jeremi 3 - Maktub Ta Kumkajir

Juda kɨ Israel ĩn dekɨdẽ kɨro al

¹ Ĩla de mad tuɓa nẽn, nyàa ada ta ngaw kɨɗang, dekɨdɨngã'n non a tel ɗe ro dekɨdẽt'n non gog ɓai a? Dɔning a tel kɨyerr kɨtɔi ale? Na ĩ Israel, i ɗa kaya kɨ ngendigi ngãi, A i tel kɨromt a? Titbe la i takel Bɨraɓe ye.

² Un kumi kɨ dõ i oo doorlog lokɨɗah ton sei tit al a? I ɗa ta ɗobgt tit Arab be kam dɨlalot na i yerr kɨ dɔning kɨtakul kayakɨɗa kɨmajal loi.

³ Kɨtɔ 'nten la ɔgɨn ne man ndii ked, ndii bɨna ed al tɔ. Titbe kaa i kɨ takum kaya dekɨdẽ in roa sɔla al.

⁴ Tajigla i ko kɨdɔmt an: Bɔwm, in nam lon mĩ kɨdu, titbe ale?

⁵ Wong loa a i titbe kɨndɔgndɔg a? A hɔ wong kamɨnt mbãkɨnõt a? Oo, i elta na i ɗa majal kɨkete kete kɨ kamndig.

⁶ Kaglot lo ngar Josias Bɨraɓe elɨm an: I oo nya'n Israel, girrdeg kɨro al, ɗa a? Aw dɔ mbalbogt kɨ girr kag kɨmbool kɨɗen, ɗa kaya.

⁷ M'el m'an: Goot'n hã ɗa nyag'n non tube woi ye, a tel kɨromt. Na tel al. Ngonkõa Juda ngendokum oo ɓet.

⁸ Ke neni m'tuɓa Israel kɨta kayakɨɗa, m'ada maktub tuɓaa, m'oo Juda ngonkõa kɨ ngendokum ɓool al na aw ɗa kaya titbe ɓaitɔ.

⁹ Kɨtɔ kayakɨɗa lo Israel i nya mad al roat ad dɔning tel kɨyerr, hɔ sa ngaw kɨ mbal kɨ kag.

¹⁰ Titbe kaa Juda, ngonkõa kɨ ngendokum, tel kɨromt kɨ kam kɨkɨɗa al na kɨlo ndo kumt koon. Titbe la i takel Bɨraɓe ye.

¹¹ Bɨraɓe elɨm an: Israel, girrdeg kɨ ro al, ɔj ron girrdeg kɨdenesew tɔi Juda kɨ ngendokum.

¹² Aw, i la mber tag 'nten kojigel an: Israel, ngeɗagootal, i tel kɨromt. Titbe la i takel Bɨraɓe ye. M'a m'ooi kɨ takum kɨwong al kɨta mĩ ngekõkam. Titbe la i takel Bɨraɓe ye. M'a m'hɔ wong kammt mbãkɨnõt al.

¹³ Maj kad i ger gootal loi, maj kad i ger kad i taa ɗɔɔ Bɨraɓe Luwah loi ad i ndia kɨ log papa kɨro yogt kɨ girr kag kɨmbool kɨɗen, na i tel roi go tat lom al. Titbe la i takel Bɨraɓe ye.

¹⁴ I telɨn kɨromt, ĩn ngan ngé telrogotat al. Titbe la i takel Bɨraɓe ye. Kɨtɔ mĩ ngesɨ, m'a m'unsi kɨɗa kɨ ɗa kam ɓebot mad, ke joo joo ku girnoojt mad, m'a m'ɗe sesɨ Siõt.

¹⁵ M'a m'adsɨ ngengomsi kɨgo kamndigt lom, a ngomdsɨ kɨ goosa goosa, kɨ terra.

¹⁶ Lon i bɨlan kɨ dɔtdɔt kam dɔningt woi ye, ndɔat'n non. Titbe la i takel Bɨraɓe ye. A elɨn ta dɔ sund kunkɔt lo Bɨraɓe gog al ta. A gan dɔt al, a ndan kamd dɔt al tɔ. A ɗan kamkil al, a ɗan sund kunkɔ kɨ rang al ta.

¹⁷ Kaglot'n non a kunɨn to Jerusalem Pong Ndɨ Bɨraɓe. Girrdeg kɨ dang dang a kawɨn'na Jerusalem kam tɔ Bɨraɓet, a ɗan kɨgo kamd kɨmajal kɨ kõgkong al ta.

¹⁸ Kaglot'n non ngékɨɓe lo Juda a ndian nat kɨ ngekɨɓe lo Israel, a telɨn ko dɔningt kɨjigei nat, kɨ kam do ningt in mad bɔwsɨg nyakagɓet.

¹⁹ M'el rom m'an: Kɨ ɗob kɨtitbãi m'a m'ndain dan nganɨmgt m'a m'adi dɔning kɨmaj tɔi, nyakagɓe kɨmaj tɔi nyamajg lo girrdeg tube a? M'ga dɔmt m'an: A i kunɨm bɔwi a i nya ta kaw gomt al.

²⁰ Rota, tit'n dekɨdẽ ngendokum ngawɨn ye, titbe ĩn ngékɨɓe lo Israel, i ndoon kumm. Titbe la i takel Bɨraɓe ye.

²¹ Oon dɔ ndita ko kɨdɔ mbalbogt kɨ todɨla, ad i nõn kɨ koyo lo Israelag kɨta tɔɔn ɗob, na kamd oi dɔ Bɨraɓe Luwaht lod.

²² I telɨn kɨromt, in ngan ngedum, m'a m'nyago ɗagootal losɨ. Oo, jĩ kɨ ndɨ kɨ j'aw roit kɨta ĩ Bɨraɓe Luwah loj.

²³ Rota, ndi kɨse in bai kɨdɔ doorgt i kari kɨndang ke kɨdɔ mbalbogt i takɨbal. Rota, kam Bɨraɓe Luwah loj la kaj lo Israel i tit ye.

²⁴ Yog kɨrosɔl san kand kɨla lo bɔwjg tube maɗi basait nu, ad i batg lod kɨ mangg lod, ngandg kɨ dɨngã kɨ kɨdẽ.

²⁵ Ad kɨ to kam rosɔlt loj, ad rosɔl loj tel bajo kutdɔji kɨta kɨ ɗa majal ndoorɨn Bɨraɓe Luwah loj maɗi, basait nu, mbã ɓone. Kɨ tel roj go tat lo Bɨraɓe Luwah loj al.