Jeremi 2 - Maktub Ta Kumkajir

Israelag nyan ɗob lo Bɨraɓe

¹ Bɨraɓe elɨm an: Aw, i la mber ta 'nten kɨ mbi degt kɨ Jerusalem an:

² Kamm ga dɔ kamkẽt loi kɨ maɗi lon ĩn kɨdui ɓaitɔ, i tarɨm lon m'hɔn dɔi ye, i geem ngãi. I ndulon gom kam dɨlambot, dɔningt kɨ nyako gotot.

³ Israel i kɨjaɓat kɨta Bɨraɓe, i kandnya loa kɨdasa, deg tube'n tɔn koah a ne, takɨgang i dɔdt a ngahn kõ, kel Bɨraɓe.

⁴ Oon dɔ ta lo Bɨraɓe in ngékɨɓe lo Jakob tube, girrkooj ngékɨɓe lo Israel.

⁵ Bɨraɓe el an: Ɗagootal kɨ titbãi bɔwsɨg ngahn kammt kad tɔrrɨn ne rod kɔ romt awɨn go nyagt kɨpãbe kad telɨn nya kɨpãbe ho a?

⁶ Elɨn anan: Bɨraɓe kɨ nge tee sej dɔning Ejipt't ye i ɗah al a? Ngekɔrrj ta ɗob kam dɨlalot, kam dɔningt kɨ tut kurum, kɨ holɓeg ngãi, dɔning kɨ man gotot dɔning kɨ diw dĩ, dɔning kɨ de nda gang al, de ndɨt al tɔ ho.

⁷ M'ɗe sesɨ kam dɔning majkurrt kad i san kanda, kɨ nyag loa kɨ majmaj, na lon i ɗent woi, i yerrɨn kɨ dɔning lom, adɨn nyakagɓe lom tel kɨyerr tɔ.

⁸ Ngéjanyamosɨ elɨn anan: Bɨraɓe i ɗa al a? Ngéndoodeg mberkɨnda germɨn al. Ngéngombatg tɔin dɔ tag lom, ngékelta kɨtamt ndɔ'n ndil kam tɔ Baalt, awɨn go nyagt kɨ majd goto.

⁹ Kɨtɔ 'nten m'a m'kɔl sei dɔ tat ɓaitɔ, m'a m'kɔl kɨ ngan ngansɨg. Kel Bɨraɓe.

¹⁰ Awɨn dɔ doorgt kɨ Kɨtim, i nɔlɨn. I lan ngombangkɨla Kedar, i nɔl, oon maj, deg'n non kɨlaɗad tit losɨ a?

¹¹ Girrdeg madg ĩn nõ mbelɨn luwahg lod a? Na luwahg'n non ĩn luwahg kɨjeje al. Na deg lom mbelɨn tɔko lod kɨ nya kɨ maja goto.

¹² Ah dɔrãg, adɨn kɨngasa gasɨ, adɨn rosɨ ndad kɨ ɓool kɨtɔlsɔkɨr. Kel Bɨraɓe.

¹³ Kɨtɔ deg lom ɗan majal joo nyàmɨn kɔ mĩ loɓa man kumkajir, na ɓah'n jo man kɨ to kɨta rod ĩgɨn a ngomɨn man al.

¹⁴ Israel i ɓer kɨ ndugona a ke i ngon kɨkooj ɓe a? Kɨtɔɗi tirɨna pur tit'n nyatetɗɔɔ be

¹⁵ Bal tubog lan ndid kon ne kɨdɔat, nujɨn dɔning loa, adɨna tel kam mũ. Lan horr ɓebog loa, ad ngendɨt goton.

¹⁶ Kɨ tɔi 'nten, deg kɨ Nop kɨ deg kɨ Takpanes tɔn kadɔi.

¹⁷ Nyag 'nten tube teen dɔit kɨta i nyàgo Bɨraɓe Luwah loi lon ndɨ ɔrri ta ɗob kam ɗobt kɨmaj ale?

¹⁸ Tajigla, kɨtɔɗi i un ɗob kaw Ejipt't kɨta kãi man bah Nil a? Kɨtɔɗi i aw Asiri Kɨtɔ kãi man bah Eprat a?

¹⁹ Majal loi a nda ɔji, telrogotat al loi a ɔji kuma. Asɨ kad i ger na i oo to, i nya kɨ majal kɨ kɨkatbang kad i nyàgo Bɨraɓe Luwah loi na i ɓoolm al bat, kel Bɨraɓe Luwah Ngekoosɨg ye.

²⁰ Maɗi nu i tet jug kɨ kɔit, i gang kɨla dɔi kɔ. I el an: M'a m'ɗa ɓer loi gog al ta. Na dɔ door lot kɨ dõ kɨɗen kɨ girr kag kɨmbool kɨɗen i la dɔi ber tit kaya dekɨdẽ be.

²¹ Mĩ m'hɔi tit dĩ nduu kɨmaj ngãi, tit kumnya kɨmaj. Titbãi i mbel, i tel tit dĩ nduu kɨ mut be a?

²² Ke neni i tugo roi kɨ sabõ kɨmaj, ke i tugo roi kɨ sabõkat ngãibe kaa ne, ɗagootal loi to tɨga wang nomt. Kel Bɨraɓe Luwah ye.

²³ Kɨtɔɗi i el an: Mĩ kɨyerr al m'ndulo go Baal al a? I nɔl bangnjai kam hollot oo, na i ger nya kɨ i ɗa. Ĩ lukum kɨ ngenda kɨ log papa

²⁴ kõ korro kɨmut in londia i kam dɨlalot koon. Ɔrr see bɔw ko ro kam nélt kɨta nyura ndɨ õa. Nõ ɔga tɔlkon nyurkõ loa a? Ngesah goa tube, kɔr a ɗad al a ngahna kari kaglot loa.

²⁵ I ngom njai maj na ɓeta i ndia njai kari, ot kad kɨndaman tut kɔi, na i el an: Ã ã, kari kɨndang kɨta m'ndig yog kɨmbah, m'a m'aw godt.

²⁶ Tit ngeɓoog in roa sɔla lon hɔna dɔ ɓoogt, titbe tɔ la rosɔl a ɗan ngekɨɓe lo Israel, ĩn kɨ ngarg lod kɨ mbaiɓeg lod, ngejanyamosɨ lod kɨ ngekelta kɨ ta Luwaht lod.

²⁷ Ĩgɨn elɨn kag anan: Ĩ bɔwj. Elɨn mbal anan: ĩla ooj'j. Turɨn gid'd admɨn na takumd al. Na lon kamkɔl ɗad, a kon anan: I ɓai aj'j.

²⁸ Yog loi kɨ i ɗad kɨta roi ye, ĩn ɗah a? Ad ɓai ajsɨn kaglo kamkɔlt loi. Ah Juda, yog loi i in ngãi tit ɓebog loi ho.

²⁹ Kɨtɔɗi i ndɨ gakmɨn nea? Ĩn tube, i taamɨn ɗɔɔ. Titbe la i takel Bɨraɓe ye.

³⁰ M'nda m'ɔj ngansɨg na i kari kɨndang, turɨn go ndakɔj al. Kiyaɗɔɔ losɨ tɔl ngekelta kɨta Luwaht tit tubo kɨ ngenuj nya be.

³¹ Ah ngaka deg kɨ ɓone, oon dɔ ta lo Bɨraɓe maj. M'tel dɨlalo kɨta Israelt a? A ke ɓe lo til Kɨtɔ ɗi deg lom elɨn ne anan: Jĩ deg kɨ taa nyã dõ j'a kɨ tel kɨroit gog al a?

³² Kam ngomand a oi dɔ nya pare ron e? Ke dekɨdẽ ngetangawkij, kama a oi dɔ kub tana loa a? Na deg lom, kamd oi dɔm ndɔg ngãibe, de asɨ da kɔra al.

³³ Rota i ger go ɗobg ngãibe kɨta sahn go ngéndigi, mbã i ndoo dekɨdẽg ngeɗamaj al ɗobg loi.

³⁴ Titbe ta kub loi Ngah mosɨ de kɨdangt kɨ de ta lod goto ta kubtloi, De'n i hɔd dɔ ɓoogt al.

³⁵ Titbe kaa el an: M'ɗa majal al. Rota wong loa goto dɔmt. Lon i el ye titbe Oo, m'a m'aw sei lo takɨgangt kɨta el an: M'ɗa majal al.

³⁶ Kɨtɔɗi i ndian kɨ log kad i mbelɨn ɗob loi a? A i ngah rosɔl Ejipt't tit'n i ngahn rosɔl Asirit ye be ho?

³⁷ Lot'n non a i tee kɨ ji kɨkũ dɔit, kɨta Bɨraɓe mbet deg'n i ɓakuld. A i ngah majkurr rodt al.