Jeremi 1 - Maktub Ta Kumkajir

Luwah kun Jeremi kɨta kɨla

¹ Tag lo Jeremi ngon Hilkɨja, kɨkɨɗa ku ngejanyamosɨt ĩgɨn ndin Anatot kam dɔning Benjamit.

² Ta lo Bɨraɓe ɗe ro Jeremit kaglot lo Josias ngon Amon, ngar kɨ Juda kam ɓalt kɨkɨlah gidaimɨta lo kõɓe loa.

³ Ela ta ɓaitɔ kaglot lo Jojakim ngon Josias, ngar kɨ Juda. Elata ɓaitɔ kam naht kɨmi lo ɓal kɨkɨlah gidaikɨɗa lo Sedekias ngon Josias, ngar kɨ Juda kam ɓalt'n non la ngéndɨ Jerusalem awɨn ɓert.

⁴ Ta lo Bɨraɓe ɗe romt an:

⁵ M'geri kete lon m'ɓain kam kõit al ɓaitɔ, lon i teen kam kõit kɨtɨga al ɓaitɔ, m'ndai kɔtkokɨɗa kad ĩ ngekelta kɨtamt kɨ ro girrdegt.

⁶ M'tur m'an: Ah Bɨraɓe Luwah, m'ger kelta al kɨta mĩ ngon ɓaitɔ.

⁷ Na Bɨraɓe turɨm an: Ot kel kan, mĩ ngon na a aw kɨ log tube'n m'a m'lait a eld ta tube'n m'ndai mbera.

⁸ Ot ɓoold na mĩ nat sei kad m'aji, Titbe la i ta'n Bɨraɓe elɨm.

⁹ Kamla la jin ɔdɨn tam, el an: Oo, m'nda ta lom tait.

¹⁰ Oo, ɓone m'adi tɔg dɔ girrdegt kɨ kõɓeg kad i retd ruprup, i tɔd kɔsɨkɔsɨ, kad i nujd, i tɔsɨ i tɨlad, kad i ndad gog, i hɔd ningt.

¹¹ Ta lo Bɨraɓe elɨm an: Jeremi, oo ɗi a? M'tur m'an: M'oo dɔj kag amand.

¹² Kamla Bɨraɓe elɨm an: Oo maj, kɨta m'ndɨ m'ngom go ta lom kɨ tɔl kõna.

¹³ Ta lo Bɨraɓe ɗe romt kɨkõjoo an: Oo ɗi a? M'tur m'an. M'oo jo mad ndɨ leg na jo'n non tel kɨ ɓodo.

¹⁴ Bɨraɓe elɨm an: Ko ɓodo la nyakɨto a ɓait, so dɔ ngéndɨ dɔningt'n ɗan tube ye.

¹⁵ Oo m'a m'kun girrdeg kɨ kõɓeg kɨ dang dang kɨ ɓodo, kel Bɨraɓe. A ɗen, ngar dekɨɗen a nda pong kõɓe lon ta tabitgt kɨ Jerusalem. A gugɨn dɔ ndogbɔrrgt loa, gug dɔ kɨ kɨnõ ɓebogt kɨ Juda tube.

¹⁶ M'a m'elta dɔ tat kɨngang lom kɨ dɔdt kɨtɔ majal lod kɨta nyàmɨn kɔ, lan horr nyag kɨkootmbĩ adɨn yog, ɔsɨn dɔd ber nõ kɨlaɗa jidt.

¹⁷ I ɓai dõ i dɔɓoi na eld tag tube'n m'ndai mbera. Ot ɓool na ɓeta a ne, m'adi ndahd nõdt.

¹⁸ Oo, ɓone m'ndai tit ɓebo kɨngang dɔ dɔningt kɨtaagbe tit pilie hand, tit ndogbɔrr ningakasɨ, nõ ngargt kɨ Juda kɨ mbaiɓeg loa, kɨ ngéjanyamosɨ loa, kɨ ngéndɨ dɔningt'n non ho.

¹⁹ A ɗɔɔin na a tetɨn ɗɔɔ al, kɨta m'a mĩ sei nat kad m'aji, kel Bɨraɓe kɨ Ngetɔg tube.