Jakari 1 - Maktub Ta Kumkajir

Kunɨn deg kɨ tɔrrɨn ndid

¹ Bal kɨ ngekõjoo lo Darius kɨ nah kɨjijoo, ta lo Bɨraɓe ɗe ro Jakari ngon Berekia, ngon Ido ngekelta kɨta Luwaht, an:

² Wong ɗa Bɨraɓe ngãi do bɔwsɨgt.

³ Kɨtɔ 'nten i eld an: Titbe kel Bɨraɓe Ngekoosɨg i telɨn kɨromt, kel Bɨraɓe Ngekoosɨg na m'a m'tel kɨrosɨt ho, kel Bɨraɓe Ngekoosɨg.

⁴ Ot kad ĩn tit bɔwsɨg Ĩgɨn ngekelta kɨta Luwaht kɨmaɗi kõ kɨdɔdt anan: Titbe kel Bɨraɓe Ngekoosɨg i telɨn, i nyan go ɗobg losɨ kɨmajal kɨ kɨlaɗasɨ kɨmajal. Na oon dɔ al, nelɨn mbid kɨromt al tɔ, kel Bɨraɓe.

⁵ Bɔwsɨg ĩn ɗah a? Ngekelta kɨta Luwaht ndɨn kɨ dɔd dõ mbãkɨnõt a?

⁶ Na tag lom kɨ mberkɨndag lom ĩgɨn m'nda mbera ɓerg lom ngekelta kɨtamt ye, hɔn bɔwsɨg kɨ ta ale? Telɨn, elɨn anan: Bɨraɓe Ngekoosɨg ɗa sej tit'n ɔj kɨ n'ɗan kɨta ɗobg loj kɨ kɨlaɗaji.

Ngekalsɨndag dan kag myrrtgt

⁷ Ɓal kɨ ngekõjoo lo Darius kɨ nah kɨkɨlah gidaikɨɗa kɨ ndo kɨdɔjoo gidaisɔɔ lo nah'n non in i nah Sebat ye. Ta lo Bɨraɓe ɗe ro Jakari ngon Berekia, ngon Ido an:

⁸ M'oo nya kam kondɔt na oo de mad al dɔ sɨnda ndàit kɨ ɗà dõ ku kag myrrtgt kam kut na ko gidat sɨnda ndaig kɨ sɨnda mɔsɨg kɨ sɨndag kɨndà.

⁹ Kamla m'el m'an: Ah Bɨraɓe lom sɨndag'n ɗan ĩn ɗi a? Na malaika'n hã elɨm ta ye an: M'a m'ɔji takĩd kad i ger.

¹⁰ De'n ɗa ku kag myrrtg turɨm an: Ĩgɨn ɗan la Bɨraɓe lad kad lan go dɔning.

¹¹ Na turɨn malaika lo Bɨraɓe'n ɗa ku kag myrrtgt anan: Jĩ kɨ lago dɔning na oo, dɔning kɨtaagbe to lom, to taa koo.

¹² Kamla malaika lo Bɨraɓe turta, el an: Bɨraɓe Ngekoosɨg, mbã ndɔ bãi ta a i ɔj kamkẽ loi Jerusalem kɨ ɓebog kɨ Juda al a? Ĩgɨn i ɗa sed wong asɨ ɓal dɔtanãimɨta.

¹³ Bɨraɓe turtag kɨmaj kɨ kɨsɔlkam ad malaika'n elɨm ta.

¹⁴ Kamla malaika'n el sem ta ye, an: I ko an: Titbe kel Bɨraɓe Ngekoosɨg: Jang ɗam ngãibe dɔ Jerusalemt kɨ Siõ

¹⁵ na mĩ kɨ wong kɨ tɔlsɔkɨr dɔ girrdegt'n ɗan ĩgɨn ndɨn lom kɨta lon m'ɗa wong sĩbe a ne, deg'n ɗa ɗan nya ad darondo aw kɨ ketekete.

¹⁶ Kɨtɔ 'nten, mĩ Bɨraɓe Ngekoosɨg m'el m'an: M'a m'tel m'aw Jerusalem gog Kad m'ɔj kõkam, a ɗan kuj ndub tɔm gog, na a ɔjɨn kɨla mbɔj lo dɔi Jerusalemt.

¹⁷ I ko ɓaitɔ an: Titbe kel Bɨraɓe Ngekoosɨg; Ɓebog lom a ɗoosɨn kɨ nyamajg kɨngãi, Bɨraɓe a tel sɔl kam Siõ gog na a mbed Jerusalem ɓaitɔ.