Jã 9 - Maktub Ta Kumkajir

Jeju ad mundo oo lo

¹ Jeju ndɨ tɔi, oo de mad kɨ i mundo kɨ teen kam kont.

² Ngéndoog loa ndɨjena anan: Ngendoodeg nõ ɗa majal, ad oojɨn ne de'n ndɨn kɨ mundo, i ĩ ke ngékoojag a?

³ Jeju turd an: De'n ndɨn hã ɗa majal al, ke ngékoojag, na i mundo kɨtakad Luwah ɔjɨn tɔg kɨla lon ko kamat ad deg oon.

⁴ Lon kàd ɗa dõ ɓaitɔ ye, maj kad m'ɗa kɨlag lo ngelam, lo kɨ diw ndɨ ɗe, na de a asɨ ɗa kɨlat al.

⁵ Lon mĩ dɔningt ɓaitɔ ye, mĩ kunj kɨta deg kɨ dɔningt.

⁶ Lon elta 'nten ye, tiw horr tan dɔningt, lɔi'n bɔrr, kamla ɔrr bɔr'n non kum mundot ye,

⁷ ela an: Aw, i tugo kumi kam mant kɨtaa i Siloe: Girr tɔ Siloe i titbe: Ĩ kɨ la ta la. Mundo aw tugo kumɨn kam mant, na lon tel a ne, oo lo ar nyang.

⁸ Madɓeag kɨ ĩgɨn hã oona maɗi i ngekɔnya ye anan: Ĩ kan ndɨ ber ndɨ kɔnya ye al a?

⁹ Kɨmadg anan: I roa kɨ roa. Kɨmadg tɔ anan: Ãã i de kɨ taa ta ta. Na ĩ kɨɓe el an i mĩ.

¹⁰ Kɨtɔ 'nten elɨna anan: Titbãi teen ne kumi a?

¹¹ Tur an: De kan a kunɨna Jeju nõ la, lɔi bɔrr, ɔrr kummt, na elɨm an: Aw Siloet i tugo kumi. Taa ne, m'aw Siloet, m'tugo kumm, na m'oo lo.

¹² Dea ye i ɗa a? Tur an: M'ger al.

Parisɨg nderɨn girr ta lo mundon oo lo

¹³ Ɗen kɨ mundo kan ngah koo lo nõ ro Parisɨgt.

¹⁴ Ndɔ'n Jeju lɔi bɔrr kum det'n non ad kuma tee ye, i ndɔ taakò.

¹⁵ Kɨtɔ 'nten Parisɨg ndɨjena ne titbãi ngahn koo lo. Mundo eld an: Ɔrr bɔrr kummt, m'tugo a ne m'oo lo.

¹⁶ Dɔ tat'n non kɨmadg ku Parisɨgt anan: De'n non i de kɨ ɓai kokɨro Luwaht al. Kɨtɔ ngom ndɔ taakò al, na kɨmadg anan: Titbãi de kɨ ngeɗamajal asɨ ɗa nyakɔjg kɨ yaya tit'n non a? Kɨtɔ 'nten la gangɨn ne na joo ye.

¹⁷ Kamla tel ndɨjen mundo anan: Ĩ ye, ta loi i ɗi dɔat tit kan ten kumi ye a? Turd an: I ngekelta kɨ ta Luwaht.

¹⁸ Titbe kaa ne, Juipg adɨn kamd kad i mundo kɨ maɗi ngah koo lo al, ad kunɨn ngékooja ɓaitɔ.

¹⁹ Ndɨjend anan: De'n ɗan i ngonsɨ kan oojɨna kɨ mundo yo. Titbãi ndɨ oo lo tajigla a?

²⁰ Ngékoojag turɨnd anan: Jĩ kɨ ger kɔikɔi i ngonj, j'ooja kɨ mundo tɔ,

²¹ na titbãi ndɨ oo lo tajigla taa, kɨ ger al. I ndɨjen kɨɓe kɨ dɔa, i de kɨ tɔg gang, asɨ kelta dɔnt.

²² Ngékooj mundo elɨn tag'n non kɨta ɓoolɨn; Juipg ndan tad nat kete woi, ĩla de mad elta kɨtɨga wakɨsɨ an: Jeju i Krist a ne, kɨ'n tuɓana kɔ kam kuj kawnat lod.

²³ Kɨtɔ 'nten ngékoojag anan: I de kɨ tɔg gang i ndɨjena ta ĩ kɨɓe oon.

²⁴ Parisɨg tel kunɨn de'n i mundo maɗi kɨrodt gog ɓaitɔ, elɨna anan: ad kɔsɨgon Luwah. Jĩ kɨ ger de'n non i ngeɗamajal.

²⁵ Turd an: Ke i ngeɗamajal kaa ne, m'ger al; nya kɨɗa la m'ger ye, mĩ mundo, na tajigla m'oo lo.

²⁶ Elɨna anan: Ɗa ɗi sei? Titbãi teen kumi a?

²⁷ Turd an: M'elsɨ woi, na oon dɔ al; kɨtɔɗi i ndig koon ne dɔ gog tɔ a? I ndigɨn tel ngéndoog loa ho a?

²⁸ Tajɨna ho ho anan: Ĩ la i ngendoo lo de'n non ye, jĩ taa ne, jĩ ngéndoog lo Moij.

²⁹ Kɨ ger Luwah elta kɨ Moij, na de'n non taa, kɨ ger lon teet al.

³⁰ De'n non turd an: Ĩnten i nya kɨya kad i gerɨn lon de'n non teet, ĩ tɔ tee kumm.

³¹ Kɨ ger Luwah a oo dɔ kɔ lo ngéɗamajalg al; na de'n nyaɗaa i kɨgo lo Luwaht, na ndɨ ɗago ndigt loa tɔ a ne, ĩla Luwah ndɨ oo dɔ kɔ loa tɔ ye.

³² Lo mba girr duniat nu de kɨ oo kad de tee kum de'n i mundo kɨ teen kam kõnt goto.

³³ Ĩla de'n non i kokɨro Luwaht al a ne, asɨ ɗa nya mad kɨ ya titbe al.

³⁴ Turɨna anan: Oojɨn kɨtaagbe kam majalgt, ye la i ndɨ i ndooj yo? Tuɓana kɔ.

Mundo kɨgo Ndilt

³⁵ Jeju oo hoi mundo'n tuɓana kɔ. Lon ndɔda ye, ela an: I ad kami Ngon de a?

³⁶ De'n non tur an: Bɨraɓe i nõ kad m'ada kam a?

³⁷ Jeju ela an: Ooa de'n ɗa eli ta nõ i ĩ.

³⁸ De'n non tur an: Bɨraɓe mad kamm, na ɔsɨ dɔn ber nõat.

³⁹ Kamla Jeju el an: Kɨtɔ takɨgang la m'ɗen dɔningt ye, kad ĩgɨn oon lo al a ne, kɨ oon lo, kad ĩgɨn ndɨ oon lo tɔ a ne, kɨ telɨn mundo

⁴⁰ Parisɨg madg'n ĩn nat sia ye, oon dɔ ta 'nten, elɨna anan: Jĩ ye, jĩ mundog tɔ ho?

⁴¹ Jeju turd an: Neni ĩn mundog a ne, majalg losɨ goto, na tajigla i ndɨ anan I ndɨ oon lo, kɨta 'nten majal losɨ ton lo tont.