Jã 7 - Maktub Ta Kumkajir

Ngankõ Jeju adɨna kamd al

¹ Go nyagt 'nten Jeju a lago log kam dɔning Galilet, ndig lago log kɨ kam dɔning Judet al kɨta Juipg sahn ɗob tɔla.

² Nah lo Juipg ad i nah kujkam i nderbe.

³ Ngankõag elɨna anan: I ɓai nẽbe aw dɔning Judet kad ngéndoog loi oon kɨlag'n i ndɨ i ɗa.

⁴ Kɨtɔ de'n ndig kad deg gernɨn a ne, a ɗa nyag kɨ tɨga wakɨsɨ: Tit'n i ɗan nyag kɨ yaya 'nten ye, ɔj roi kɨ tɨga, ad deg kɨ dɔningt ne oon.

⁵ Kɨtɔ ke ngankõa kaa ne, adɨna kamd al.

⁶ Jeju eld an: Kaglo lom asɨ al ɓaitɔ, na ĩn taa ne, kaglo losɨ asɨ kɨndɔgndɔg be.

⁷ Deg kɨ dɔningt ne asɨ kɔsɨsɨn ta al, na mĩ taa ndɨ ɔsɨmɨn ta, kɨta m'ndɨ manaj dɔ kɨlaɗadt kɨmajal.

⁸ I ndɨ awɨn lo ɗa naht, na mĩ m'ndɨ m'aw al ɓaitɔ, kɨta kaglo lom asɨ al.

⁹ Lon Jeju eld ta 'nten ye, ndɨ kɨ dɔning Galilet.

Jeju aw lo ɗa naht kam ɓebot kɨ Jerusalem

¹⁰ Na lon ngankõ Jeju awɨn lo ɗa naht woi, kamla ĩ kɨɓe aw godt ho ye. Na ɔj ron kɨ tɨga al, na i gid tilt.

¹¹ Juipg sahna lo ɗa naht anan: I ɗa a?

¹² Nyur ngutngut ɓai ku koosɨdegt kɨ dɔ Jejut; kɨmadg anan i de kɨmaj, kɨmadg tɔ anan: Be al, na ndɨ ũ koosɨdeg mut ta kũ.

¹³ Titbe kaa de mad kɨ ire kamɨn elɨn ta loa kɨtɨga wakɨsɨ goto, kɨta deg ngãi ɓoolɨn Juipg.

¹⁴ Lon ten ngawden nah kujkamt ye, Jeju aw kam kuj ndub Luwaht, ɗa ndoo deg.

¹⁵ Taa ya Juipg ad anan: De'n ndɨn ndoo mberkɨnda lo Juipg nja kɨɗa al ye, titbãi hã ɗa ɔrrj girr mberkɨndag a?

¹⁶ Jeju turd an: Nyandoo kɨ m'ndɨ m'ndoo deg ye, i lom al, na i lo Luwah kɨ Ngelam.

¹⁷ Ĩla de mad ndig ɗa kɨgo ndigt lo Luwah a ne, a ger ke nyandoo lom'n m'ndɨ m'ndoo deg i kokɨro Luwaht, a ke m'ndɨ m'un kɨdɔm la m'el.

¹⁸ De'n un ta el kɨ dɔn a ne, ndɨ sah kɔsɨgon kɨ kɔsɨ dɔn; na de'n ndig kad ngelan ngah kɔsɨgon a ne, i de kɨro, nya mad kɨdenesew al goto roat.

¹⁹ Moij adsɨ Mberkɨnda ale? Na de kɨɗa kusɨt kɨ tel ron go Mberkɨndat goto. Kɨtɔɗi i ndɨ sahn ne ɗob tɔlɨm a?

²⁰ Deg koosɨg turɨna anan: Ndil kɨmajal i kamit; nõ sah ɗob tɔli a?

²¹ Jeju turd an: Kɨla kɨ kɨɗa'n m'ɗa, la taa ndɨ yasɨ tube ye.

²² Gaj kɨja i kokɨro Moij al, na i kokɨro bɨra bɔwgt tã, na Moij ndasɨ mber kad i jan gaj ngan kɨdɨngãg kɨta 'nten la i ndɨ i jan ne gaj ngan kɨdɨngãg ke kɨ ndɔ taakò ye.

²³ Ĩla i jan gaj de kɨ ndɔ taakò kɨtakad tɔi dɔ Mberkɨnda lo Moij al a ne, kɨtɔɗi i ndɨ ɗan ne wong dɔmt, kɨtakad kɨ mad de lapia kɨtaagbe kɨ ndɔ taakò a?

²⁴ Ot gangɨn ta kɨgo koo takum det, na i gangɨn ta kɨgoɗobat, ad i ta kɨgang kɨdenesew.

Jeju i Krist

²⁵ Deg madg ku ngendɨ ɓebo Jerusalemt elɨn anan: Ĩn ndɨn i de'n sahn ɗob tɔla ye ale?

²⁶ Oon ndɨ elta kɨ kam kɨmisɨmisɨ kɨ tɨga wakɨsɨ, na elɨna ta mad al. Rota ngékõɓeg loj gerɨn kad i Krist wan?

²⁷ Na jĩ kɨger lon de'n ndɨn teet, na lon Krist a ɗe a ne, de kɨ a ger koo lon a teet goto.

²⁸ Lon Jeju ndɨ ndoo deg kam kuj ndub Luwaht ye, ko kɨ ndɨn kɨbo an: I germɨn na i gerɨn ko lon m'teet ye ho? M'ɗe kɨ dɔm al, na Ngelam i ngerota; i gerɨna al.

²⁹ Mĩ m'gera, kɨta m'tee ko roat, ĩla lam ye.

³⁰ Kɨtɔ 'nten sahn ne ɗob hɔa, na de kɨ nda jin dɔat goto, kɨta dɔkàd loa asɨ al ɓaitɔ.

³¹ Na deg ngãibe ku koosɨgt adɨn kamd Jeju anan: Lon Krist a ɗe a ne, a ɗa nyakɔjg kɨ yaya tɔi ĩgɨn de'n ɗan ɗa yo?

Parisɨg lan ngéɗɔɔg kad hɔn Jeju

³² Parisɨg oon dɔ kosɨdeg ndɨ nyurɨn ta nyag'n non kɨ dɔ Jejut; ad ngéjanyamosɨkadkari kɨbog, kɨ Parisɨg lan ngéɗɔɔg kad hɔna.

³³ Kɨtɔ 'nten Jeju elɨn an: Nãi kaglo tẽbe kad m'ndɨ nat sesɨ ɓaitɔ, kamla m'a m'aw ro ngelamt ye.

³⁴ A i sahmɨn na a i ngahmɨn al, kɨta lon m'ndɨt ye, asɨn kawt al.

³⁵ Kɨtɔ 'nten Juipg elɨn na kɨ nadt anan: De'n ndɨn a aw ɗa hã j'a kɨ ngah al a? Ke a aw ro juipgt kɨ tĩn na ku Grekgt, kɨ'n ndoo Grekg e?

³⁶ Girr ta 'nten ye i ɗi el an: A i sahmɨn, na a i ngahmɨn al; lon mĩt, a asɨn kawt al a?

Ta dɔ man kumkajirt

³⁷ Ndɔ kɨ dɔboit, ad i ndɔ ɗa nah kujkam i ndɔ kɨbo. Jeju ɓai ɗa dõ, ko kɨ ndɨn kɨbo an: Ĩla kɨnda õ de mad a ne kɨ ɗe romt kɨ ãi.

³⁸ De'n ndɨ adɨm kamɨn a ne, ko kamat la bahg, kɨ man kumkajir a nunt ye tit'n ta kɨ kam Maktubt elɨn.

³⁹ Jeju elta 'nten dan dɔ Ndil Kɨkunjɗang'n ngékada kamd a ngahn; kɨta ad Ndil al ɓaitɔ, kɨta Jeju aw dõ ta kɔsɨgon al ɓaitɔ ho.

Koosɨdeg gangɨn na joo dɔ tat lo Jeju

⁴⁰ Kɨtɔ 'nten deg madg ngãibe ku koosɨgt'n oon dɔ ta 'nten elɨn anan: rota, de'n ɗan i ngekelta kɨ ta Luwaht kaa nõ.

⁴¹ Kɨmadg anan: De'n non i Krist. Krist a ɗe ko dɔning Galilet e?

⁴² Ta kɨ kam Maktubt an Krist a tee ko kam ngaka Dabidt kɨ ɓe Betlehem tɔ, ad i ngon ɓe kɨ Dabid ndɨt maɗi ye ale?

⁴³ Kɨtɔ 'nten deg koosɨg gangɨn na joo dɔ tat loa.

⁴⁴ Kɨmadg kudt ndigɨn hɔa, na de kɨ nda jin dɔat goto.

Ngékõɓeg lo Juipg mbetɨn kad kamd ta lo Jeju

⁴⁵ Ngéɗɔɔg tel ɗen ro ngejanyamosɨkadkari kɨbogt, kɨ Parɨsg. Ĩn tɔ elɨnd anan: Kɨtɔɗi i ɗen sia al a?

⁴⁶ Ngéɗɔɔg turɨn anan: J'oo de kɨ ngekelta kɨ titbe nja kɨɗa al?

⁴⁷ Parisɨg turɨn anan: Mbã ĩn tɔ i son mut e?

⁴⁸ Kɨmadg ndin nõ ku ngekõɓegt ke ku Parisɨgt ĩgɨn adɨna kamd a?

⁴⁹ Na deg koosɨg'n ndɨn, ngékada kamd'n gerɨn mberkɨnda al ye, ndɔl i dɔdt.

⁵⁰ Nikodem, ĩn aw ro Jejut ndɔ maɗi i kɨkɨɗa kudt ye, eld an:

⁵¹ Mberkɨnda loj ndɨ gangta dɔ det kete kanj koo ta kɨ taat, kanj ger nya'n ndɨ ɗa a?

⁵² Turɨna anan: Ĩ tɔ i de kɨ dɔning Galilet e? I ndio kam Maktub oo, ngekelta kɨta Luwaht kɨ ɗe ko dɔning Galilet goto.

⁵³ Nõbe dekɨɗen, un ɗob kɨɓe lon.