Jã 5 - Maktub Ta Kumkajir

Jeju yoot de kɨ ngerokoinjɔr

¹ Go nyagt'n non, Juipg awɨn ɓebo Jerusalemt kɨ n'ɗan nah lod mad. Jeju awt ho.

² Kam ɓebo Jerusalemt, nderbe kɨ tabit batgt, mankaar mad kɨ tɔa i Betesda kɨ ta hebre to tit; kuj girr gang mi ɗan tit nõ.

³ Girr kujgt'n non, ngémõig ngãi be ton tit, ta mankaart: Mundog, mootg, kɨ ngérokoinjɔrg to ngoon yee man.

⁴ Kɨtɔ malaika lo Bɨraɓe mad, kaglo mad a ɗisɨ, and kam mankaart, bur mana. Ngemõi'n a ud kam mant'n non dasa go yeeat a ne, a yoot; ke neni ĩn mõi kɨ titbãi.

⁵ Ku ngémõigt'n ton ta mankaart nõ ye, de mad kɨ mõi ɗaa ɓal dɔmɨta gidaijijoo tot nõ.

⁶ Lon Jeju ooa to ber kɨ kɔtɨn, na ger kad mõi ɗaa kaglo ngãibe ye, ndɨjea an: I ndig kad i yoot e?

⁷ Ngemõi tura an: Bɨraɓe, de lom kɨ kad un lam kam mankaart lon man yeen goto na lon m'ndɨ m'ag ɓaitɔ a ne, de mad and nõmt.

⁸ Jeju ela an: I ɓai dõ un nyatoi, na i ɓaning.

⁹ Kɨtajigt, de'n non yoot, ad ɓai dõ un nyaton, na ɓaning. Na tit kan hã nya'n non ɗa nya kɨ ndɔ taakò ye,

¹⁰ kɨbog lo Juipg elɨn de'n Jeju yoota anan: Ndɔ 'nten i ndɔ taakò, i goɗobat al kad un nyatoi.

¹¹ De'n non turd an: De'n yootɨm nõ la elɨm an: Un nyatoi, na i ɓaning.

¹² Deg'n non ndɨjena anan: De'n eli an: Un nyatoi na i ɓaning ye, i nõ a?

¹³ Na de'n yoot ye, ger de'n yootɨn nõ al, kɨta Jeju tee kɔ ku degt'n ɗan lot'n non.

¹⁴ Ndɔ madt, Jeju ndɔda kam kuj ndub Luwaht, na ela an: Oo dɔ maj. Tajigla ĩ kɨ yoot, ot ɗa majal gog ta, na ɓeta kõ kɨ tɔi ĩn ɗai ye, tel ɗai gog tɔ.

¹⁵ De'n non aw el kɨbog lo Juipg kad i Jeju la yootɨn ye.

¹⁶ Kɨtɔ 'nten, kɨbog lo Juipg awɨn ne kɨ ta kɨ Jeju, kɨta yoot de'n non kɨ ndɔɔ taakò.

¹⁷ Na Jeju turd an: Bɔwm ndɨ ɗa kɨla mbã tajigla, mĩ kaa m'ndɨ m'ɗa kɨla ho.

¹⁸ Lon Juipg oon dɔ ta 'nten ye, kɨbog lod sahn ɗob tɔla, i kɨta tɔin tɔi dɔ ndɔɔ taakò hã kɨɗabe al, na i kɨta kel'n ndɨ el an: Luwah i Bɔw koojɨn, ho oo ron asɨ na derɨr kɨ Luwah.

Tɔg Ngon Luwah

¹⁹ Jeju tee tan eldɨn ta 'nten an: M'elsɨ kɨ tɨga wakɨsɨ i rota. Ngon asɨ ɗa nya mad kɨ dɔn al. Na a ɗa nya'n oo Bɔwɨn lo ɗat tã, nyag tube'n Bɔw ndɨ ɗa ye, Ngon kaa ne, ɗa titbe ho.

²⁰ Kɨtɔ Bɔw tar ngon, ad ɔja nyag tube'n ndɨ ɗa; a ɔja kɨlag kɨbobo'n oo nõ, kad ɗa. Na ta a yasɨ biw.

²¹ Tit'n Bɔw ndɨ ad ngékoig ɓain lo koit, na ad'd kumkajir ye, titbe tɔ ho la Ngon ndɨ adɨn kumkajir ĩgɨn hã ndig kad'd ho ye.

²² Bɔw ndɨ gangta dɔ det mad al, na la takɨgang tube ji Ngont.

²³ Kɨtɔkad deg tube ɔsɨngon Ngon, tit'n ndɨ ɔsɨn ne gon Bɔw ye be. Bɔw la, la Ngon ye, de'n ndɨ ɔsɨgon Ngon al a ne, ndɨ ɔsɨgon Bɔw kɨ Ngelaa al tɔ.

²⁴ M'ndɨ m'elsɨ kɨ tɨga wakɨsɨ, rota, de'n ndɨ oo dɔ ta lom, na ndɨ adkamɨn ngelam a ne, ngah kumkajir kɨ mbãkɨnõt; a gangɨn ta dɔat al, na tee ta koit kɨ kumkajirt.

²⁵ M'elsɨ kɨ tɨga wakɨsɨ i rota, dɔ kàd a ɗe nõ, na tajigla ɗe woi, ngékoig a oon dɔ ndɨ Ngon Luwah, na ĩgɨn oon dɔ ndia ye, a ɓain ndɨn kɨ dɔd dõ.

²⁶ Tit kan Bɔw ĩn kɨ tɔg kad deg kumkajir ye, titbe tɔ la ad ngonɨn tɔg kad deg kumkajir ho ye,

²⁷ na ad ngonɨn tɔg gangta dɔ degt kɨta i ngon de.

²⁸ Adɨn nyag 'nten yasɨ al, kɨta kaglo ndɨ ɗe nõ, lon ngékoig'n dubɨnd a oon dɔ ndia,

²⁹ a teen kam dɔɓadgt, ĩgɨn ɗan maj a ɓain lo koit kɨta kumkajir, na ĩgɨn ɗan majal ye, a ɓain lo koit kad gangɨn ta dɔdt.

Deg man naj kɨmaj dɔ Jejut

³⁰ Jeju el tɔ an: Mĩ m'asɨ ɗa nya mad kɨ dɔm al, m'ndɨ m'gangta kɨgo tat'n m'oo dɔ ta Bɔwt, na ta kɨ m'gang i goɗobat, kɨta m'ndɨ m'ɗa kɨgo ndigt lom al, na kɨgo ndigt lo ngelam tã.

³¹ Ĩla m'ndɨ m'manaj dɔ romt mĩ kɨɓe a ne, titbãi deg a gerɨn kad ta lom i rota a?

³² Na de mad i nõ, ndɨ manaj dɔmt, na m'ger manaj loa kɨ ma dɔmt i rota.

³³ Na ĩn, i lan deg ro Jãt, na Jã manaj dɔ rotat.

³⁴ Na mĩ taa ne, m'sah kad de tã mam naj al, na m'ndɨ m'elta titbe kad i ngahn ne kaj.

³⁵ Jã i tit horr dɔg kɨ unj njoinjoi, na i ndigɨn ɗa ronel dɔ kunjat kaglot kɨ sĩbe.

³⁶ Na mĩ taa, m'ndɨ kɨ naj kɨ mã kɨbo tɔi lo Jã'n mã dɔmt kɨta kɨlag'n m'ɗa, Bɔwm la adɨm tɔg kad m'ɗadɨn ye, kad deg gerɨn kad i Bɔw la lam ye.

³⁷ Bɔw, ĩn hã lam, mamnaj tɔ, i ĩn oon dɔ ndia nja kɨɗa al ho, oon takuma nja kɨɗa al ho.

³⁸ I ngomɨn tag loa kamsɨt al, kɨta adɨn kamsɨ ngona'n la nõ al.

³⁹ I ndɨ oon tag kɨndang lo Luwah kɨta oo anan a i ngahn kumkajir kɨ mbãkɨnõt kamt. Na i rotag kɨ ndang lo Luwah'n non la ndɨ mamɨn naj ye.

⁴⁰ Be kaa ne, i ndigɨn ɗe romt kad i ngahn kumkajir kɨ jeje al.

⁴¹ M'ndɨ m'sah kɔsɨgon kokɨro degt al.

⁴² Na m'gersɨ, tar Luwah goto kamsɨt.

⁴³ M'ɗe kam tɔ Bɔwmt, na i hɔmɨn kɨ rosɨt al, na ĩla de mad kɨɗang ɗe kam tɔnt kɨ kɔsɨdɔn a ne, a i hɔna kɨ rosɨt,

⁴⁴ Titbãi a asɨn kad kamsɨ Luwah ĩgɨn i ndɨ ndigɨn ngah kɔsɨgon kokɨro degt, na i sahn kɔsɨgon kɨ ɓai kokɨro Luwaht kɨɗabe al a?

⁴⁵ Ot gaan kan, mĩ m'a m'lata dɔsɨt nõ Bɔwmt. Na i Moij ĩn i ndan kamsɨ dɔat nõ la a la ta dɔsɨt ye,

⁴⁶ Ni adɨn kamsɨ Moij jeje a ne, ni a admɨn kamsɨ ho, kɨta Moij ndangta kam maktubt dan dɔm.

⁴⁷ Na tit kan i taan tag kɨ ndang lo Moij al ye, titbe ho la, i taan tag lom al ho ye.