Jã 4 - Maktub Ta Kumkajir

Jeju kɨ dekɨdẽ kɨ Samarit

¹ Parisɨg oon hoi Jeju kad aw kɨ ngéndoog ngãi ho, ɗa deg baptem tɔi kɨ lo Jã ngeɗa deg baptem ho.

² Na rota, i Jeju hã ɗa deg baptem al, na ngéndoog loa la ɗan deg baptem ye.

³ Lon Jeju oo dɔ takel Parisɨg titbe ye, ɓai dɔning Judet, tel aw Galilet gog.

⁴ Na kad aw tee Galilet, sumba kad ndah dɔning Samari gang.

⁵ Aw tee ɓe madt kɨ dɔning Samarit kɨ tɔa i Sikar, nderbe kɨ kad ndɔɔt'n Jakob ad ngonɨn Jojep.

⁶ Nõbe bulo man lo Jojep ɗa tit nõ maɗi nu, kɔr ndia asɨ Jeju nakɨ, ad ndɨ ber ta bulo mant'n non, kɨ kàd kɨ ɗa dan ɓet ad i midi.

⁷ Dekɨdẽ mad kɨ Samarit ɗe ga mant, na Jeju ela an: Adɨm mant m'ãi.

⁸ Kaglot'n non, ngéndoog loa awɨn kam ɓet kɨ'n ndugon nyasa.

⁹ Dekɨdẽ'n non el Jeju an: Ĩ Juip ale? Ye titbãi hã i kɔm man kãi mĩ'n mĩ de kɨ Samarit a? Dekɨdẽ'n non elta titbe kɨta Juipg hɔn nooj kɨ deg kɨ Samarit dɔ nyat mad al.

¹⁰ Jeju tura an: Neni i ger kadkari lo Luwah, na i ger de'n ɗa kɔɔi man a ne, ni ĩla a i ndɨjea man kãi ye, na ĩ a adi man kumkajir.

¹¹ Dekɨdẽ ela an: Bɨraɓe, kini goto jiit, kamla bulo wo kɨɓing, ye titbãi a i gan man kumkajir'n hã i ɗa i eltaa nõ a?

¹² Ĩ ye, ĩ kɨbo tɔi kaaj Jakob'n adj bulo man'n ɗan, ĩ kɨɓe kɨ dɔn ãi mana kɨ nganɨn kɨ ɓut nyakulg lon nõ yo?

¹³ Jeju tura an: Dekɨɗen a ãi man bulo'n ɗan a ne, kɨnda a õa gog tɔ.

¹⁴ Na dekɨɗen a ãi man'n m'a m'ada a ne, kɨnda a õa gog al bat, na man'n m'a m'ada a tel man kɨ ɓa kamat tit mankɨɓa nũ bulbul be, na a ada kumkajir kɨ mbãkɨnõt.

¹⁵ Dekɨdẽ el an: Bɨraɓe adɨm man'n i ndɨ eltaa nõ kad kɨnda õm gog al, kad m'tel m'ɗe m'ga man al ta.

¹⁶ Jeju ela an: Aw i kun ngawi, na i tel i ɗe so.

¹⁷ Dekɨdẽ tura an: Ngawɨm goto. Na Jeju ela an: Elta kɨ rota la an: Ngawi goto ye;

¹⁸ Kɨtɔ i taa ngawg kete asɨ mi, na dekɨdɨngã'n i ndɨ sia tajigla ye, i ngawi al, ad i ta kɨ rota la el ye.

¹⁹ Taa ne, dekɨdẽ ela an: Bɨraɓe, m'ger, ĩ ngekelta kɨ ta Luwaht.

²⁰ Kaaj Samariag ɔsɨn dɔd nõ Luwaht dɔ mbalt'n ɗan, na ĩn Juipg elɨn anan: Lon sumba kad deg ɔsɨn dɔd nõ Luwaht tit i Jerusalem.

²¹ Jeju tura an: Dekɨdẽ oo dɔ ta lom maj. Kaglo mad a ɗe nõ, a ɔsɨn dɔd ber nõ Luwaht dɔ mbalbot'n ɗan, ke Jerusalemt al.

²² Ĩn Samariag i gerɨn nya'n i ndɨ ɔsɨn dɔsɨ ber nõat nõ al, na jĩ Juipg taa ne, kɨ ger nya'n kɨ ndɨ j'ɔsɨ dɔj ber nõat nõ. Kɨtɔ ngekaj deg a tee ko kɨ girr Juipgt.

²³ Na kaglo ndɨ ɗe nõ, tajigla ɗe woi, i kaglo'n, ngékɔsɨdɔd ber nõ Luwaht kɨ Bɔw a ɔsɨn dɔd ber kam Ndilt, kɨ kam rotat, kɨta ngékɔsɨdɔdber nõ Luwaht kɨ jeje titbe, nõ la Bɔw ndɨ sahd kad ɔsɨn dɔd ber nõat ye.

²⁴ Luwah i Ndil, ad maj kad ngékɔsɨdɔdber nõat, kɨ ɔsɨn dɔd ber nõat kam Ndilt kɨ kam rotat.

²⁵ Dekɨdẽ ela an: M'ger kad Mesi: Ad i Krist a ɗe, na lon a ɗe woi a ne, a ɔrrj girr nyag tube.

²⁶ Jeju tura an: mĩ'n m'ɗa m'eli ta la mĩ Krist ye.

²⁷ Kaglot'n non ngéndoog lo Jeju tel ɗen, na oona ɗa elta kɨ dekɨdẽ ad ta yad. Na de mad kɨ ndɨjea ta an: ɗi i ge roat a? A ke kɨtɔɗi i ɗa elta kɨ dekɨdẽ'n ɗan goto?

²⁸ Taa ne, dekɨdẽ nya ɓir man lon nõbe, na tel aw kam ɓet el deg an:

²⁹ I ɗen oon de mad ɗa ta bulo mant nõ, dam kɨlag tube'n m'ɗa ye, de'n non i Krist ale?

³⁰ Tala deg kɨjan butbut kam ɓet kɨ tɨga awɨn ro Jejut.

³¹ Kaglot'n non, ngéndoog lo Jeju ndeena kad sanya, elɨna anan: I sanya ngon sĩ.

³² Na Jeju turd an: M'aw kɨ nyasa mad la, kad m'sa, na i gerɨn al.

³³ Go tat 'nten, ngéndoog loa ndɨjen na ta kɨnadt anan: De mad ɗe kɨ nyasa ada a?

³⁴ Jeju eld an nyasam laten: Kɨ m'ɗago ndigt lo ngelam, kɨ m'tɔl kon kɨla loa tɔ.

³⁵ I ndɨ anan nãi nah sɔɔ kamla ɓal a ndɔ ale? Oon maj m'ndɨ m'elsɨ, unɨn kumsɨ kɨ dõ oon ne ndɔɔg. Nyako tut asɨ ja woi.

³⁶ Ngeja nyako ndɨ taa nyabajin, na ndɨ mbõ nyako kɨta kumkajir kɨ mbãkɨnõt, titbe ngeduw nyako kɨ ngeja nyako ndɨ ɗan ronel nat.

³⁷ Kɨtɔ ta'n terrta el ten ye, i rota: De mad ɗa duw nya, na kɨmad ɗa ja.

³⁸ M'lasɨ mad i jan nyako kam ndɔɔt kɨ i ɗan kɨla tit ɔrɨn al, madg la ɔrɨn kamt kete ye, na ĩn i ɓan maj kɨ kand kɔrd.

³⁹ Samariag ngãibe kɨ kam ɓet'n non adɨn kamd Jeju kɨta ta'n dekɨdẽ eld an: Dam nya ɗam tube.

⁴⁰ Titbe lon Samariag ɗen ro Jejut ye, ndɨjena kad ndɨ sed, na Jeju ndɨ kam ɓet'n non ndɔ joo.

⁴¹ Samari madg ngãibe adɨn kamd Jeju kɨta tag'n Jeju ĩ kɨɓe eld.

⁴² Na tel elɨn dekɨdẽ'n non anan: Tajigla jad kamj Jeju kɨta ta'n i elj nõ al, na kɨta jĩ kɨɓe j'oo dɔ ta loa kɨ mbij, na kɨ ger kad ĩ ngekaj deg kɨ dɔningt jeje.

Jeju yoot ngon kooj ngekɨla kɨbo lo ngékõɓeg

⁴³ Go ndɔt kɨ joo'n ɗa Samarit, Jeju ɓai nõbe aw dɔning Galilet;

⁴⁴ kɨta Jeju kɨ dɔn manaj kete woi an: Ngekelta kɨ ta Luwaht a ngah kɔsɨgon ɓekoojɨnt al.

⁴⁵ Lon aw tee Galilet ye, deg hɔna kɨ rodt maj maj, kɨta ĩn kaa ne awɨn lo ɗa nah Pakɨt Jerusalem; ad oon nyag tube'n Jeju ɗat nõ.

⁴⁶ Jeju tel aw Kanat dɔning Galilet, ad i lot'n mbel mant ad tel kasɨnduu; de mad ndɨ ɓebo Kapernawmt nõ, i ngeɗakɨla lo ngekõɓeg, ngona kɨdɨngã i mõi.

⁴⁷ Lon oo hoi Jeju kad ɓai dɔning Judet aw dɔning Galilet ye, aw roat, ndɨjea kɨ aw Kapernawmt kɨ yoot ngonɨn kɨdɨngã'n to ta koit.

⁴⁸ Jeju ela an: Asɨn kad kamsɨ Luwah al; ĩla oon nyakɔjg kɨ nya madg kɨ yaya al.

⁴⁹ Ngekɨla lo ngékõɓeg tura an: Bɨraɓe aw kam kujt lom kete kamtã la kad ngonɨm oi.

⁵⁰ Jeju ela an: Aw ɓe loi ngoni yoot woi. Ngekɨla lo ngékõɓeg adkamɨn ta'n Jeju ela nõ, ad tel ndɨ aw ɓe.

⁵¹ I dɔ ɗobt ɓaitɔ la ngan ngékɨlag loa lan ta, na elɨna anan: Ngoni yoot woi.

⁵² Na ndɨjed dɔkàd kɨ bãi ro ngonɨn ton soot a? La turɨna anan: Tagbe lokɨsɔle la, dɔga tɔrrɨn jĩn roat ye.

⁵³ Nõbe la, bɔw ngon gerɨn kad i dɔkàd'n Jeju elɨn ta an: Ngoni yoot woi. Na ĩ kɨ ngékɨɓe lon adɨn kamd Jeju.

⁵⁴ 'Nten la, i nyakɔj kɨ ya kõjoo'n Jeju ɗa lon ɓain dɔning Judet aw dɔning Galilet ye.