Jã 3 - Maktub Ta Kumkajir

Jeju dan na ta kɨ Nikodem

¹ De mad i nõ ku Parisɨgt, tɔa i Nikodem, i kɨkɨɗa ku kɨbogt lo Juipg.

² De'n non ɗe ro Jejut ndɔ ela an: Rabi, ad i ngeem, kɨ ger kad ĩ ngendoodeg kɨ ɓai kokɨro Luwaht, kɨta de mad kɨ asɨ ɗa nyakɔjg kɨ yaya'n i ndɨ i ɗa nõ goto, na Luwah i nat sia tã.

³ Jeju tura an: Rota, rota la m'ndɨ m'eli nõ; ĩla oojɨn de kooj kɨ kij al a ne, a asɨ ko kõɓe lo Luwah al.

⁴ Nikodem ela an: titbãi a oojɨn de gog lon telɨn ngatɔg a? Asɨ kad and kam kont gog kad ooja kooj kɨ kõ joo'oo?

⁵ Jeju tura an: Rota, rota la m'ndɨ m'eli nõ: Ĩla oojɨn de kam mant kɨ kam ndilt al a ne, a asɨ kand kam kõɓet lo Luwah al.

⁶ De'n de ooja i dãro, na de'n oojɨna kam tɔg Ndilt kɨkunjɗang i Ndil.

⁷ Ot kad ta'n m'eli m'an: A oojsɨn ko kɨ dõ nõ yai.

⁸ Nel ndɨ la kɨ lot'n ge, i ndɨ oo kaa, na i ger lon ɓait ke lon ndɨ awt nõ al, titbe ho la i kooj de'n oojɨna kam tɔg Ndilt kɨkunjɗang ye.

⁹ Nikodem ela an: Nya 'nten a i root e?

¹⁰ Jeju tura an: Ĩ ngendoo Israel ye la i ger nyag 'nten al yo?

¹¹ Rota, rota la m'ndɨ m'eli ye; kɨ ndɨ kɨ j'elta nyag'n kɨ ger, kɨ ndɨ kɨ manaj dɔ nyagt kɨ j'oo kɨ kumj, na be kaa ne, i ndig taan najkɨma loj al.

¹² Ĩla m'elsɨ ta dɔ nyagt kɨ ndɨ ɗan nya dɔningt la na adɨn kamsɨ taa al ye, titbãi a kadmɨn kamsɨ ĩla m'elsɨ ta dɔ nyagt'n a ɗan nya dɔrãt a?

¹³ Kɨtɔ de mad kɨ aw dɔrãt goto, na Ngon de kɨ ɗisɨ ko kɨ dɔrãt tã.

¹⁴ Tit'n maɗi dɨlalot Moij dɔ li ningakasɨ ta kagt unan kɨ dõ ye, titbe ho la a dɔn ne Ngon de dɔ kagt unɨn na ne kɨ dɔ ho ye,

¹⁵ kad dekɨɗen ada kamɨn a ne, kɨ ngah kumkajir kɨ mbãkɨnõt.

¹⁶ Kɨtɔ Luwah tar deg kɨ dɔningt kɨ tar kɨ tɔitakɔl mbã ad ngonɨn kɨ kooj kɨɗabe kad dekɨɗen ada kamɨn a ne kɨ nuj kɔ al, na kɨ ngah kumkajir kɨ mbãkɨnõt.

¹⁷ Kɨtɔ Luwah la Ngonɨn dɔningt kɨtakad'n gangɨnta dɔ degt kɨ dɔningt al, na kɨtakad deg kɨ dɔningt ngahn kaj kɨtakula.

¹⁸ De'n ndɨ adkamɨn Ngon a ne Luwah gangta dɔat al bat, na de'n ndɨ ada kamɨn al a ne, Luwah gangta dɔat woi, kɨta adkamɨn Ngon Luwah kɨ kooj kɨɗabe al.

¹⁹ Takɨgang la ten: Kunj ɗe dɔningt ne, na deg ndigɨn til tɔi kunj kɨta kɨlaɗad i kɨmajal.

²⁰ De'n ndɨ ɗa majal a ne, ndɨ ɔsɨta kunj, ndɨ ɗe ro kunjt al, na beta kunj kɨja kɨlaɗang kɨ tɨga wang ta kum degt.

²¹ De'n ndɨ ɗa kɨgo rotat a ne, ndɨ ɗe ro kunjt kɨtakad kunj tee kɨlaɗang kɨgo ndigt lo Luwah kɨ tɨga wang ta kum degt.

Jã ngeɗa deg baptem manaj dɔ Jejut ɓaitɔ

²² Go nyagt 'nten, Jeju aw dɔning Judet, nat kɨ ngéndoog lon. Ndit nu, na ɗa ɗa deg baptem.

²³ Jã kaa ne, ɗa ɗa deg baptem lot kɨ tɔa i A'n non, nderbe kɨ Salim, kɨta man i ngãi nõbe; deg ɗent kad Jã ɗad baptem.

²⁴ Kaglot'n non hɔn Jã dangait al ɓaitɔ.

²⁵ Na ngéndoog lo Jã majɨn na ta kɨ Juip mad dɔ kar ro dɔ nya kɨyerrt.

²⁶ Ngéndoog lo Jã awɨn ro Jãt elɨna anan: Rabi, de'n ndɨ sei maɗi gid bah Jurdẽt, de ka'n i mãanaj nõ ye, oo, ɗa ɗa deg baptem, na deg ndɨ awɨn roat.

²⁷ Jã turd ta an: De mad asɨ ngah nya mad kɨ dɔn al na ĩla Luwah ada tã.

²⁸ Ĩn kɨɓeg oon dɔ kɨ mbisɨ, m'an mĩ Krist al, na mĩ de'n Luwah lam nõat kad kɨ m'ɗa goɗob loa tã.

²⁹ De'n taa dekɨdẽ kij la i ngaw dekɨdẽ ye, na madkɨɗaa'n ndɨ kadat i ngaw dekɨdẽ al, na roa ndɨ nela ngãi lon ndɨ oo dɔ ndi ngetaa dekɨdẽkij. Lom i titbe ho, mĩ tit madkɨɗa ngetaa dekɨdẽkij be, ad rom nelɨm kɨdumbit.

³⁰ Maj kad tɔa ko ngãi kɨtɔi, na kɨ lom tel kɨ ber.

Jeju Krist Ngeɗisɨ ko kɨ dɔrãt

³¹ De'n ɗisɨ ko dɔrãt i dɔ nyagt tube; na de'n i kɨ dɔningt la i kɨ lo dɔning, ndɨ elta nyag kɨ dɔningt tube;

³² ndɨ manaj dɔ nyagt'n oo kɨ kumɨn, kɨ nyag'n oo dɔ kɨ mbin, na de kɨ oo najkɨma loa goto.

³³ Na de'n oo najkɨma loa a ne, so go najkɨmat kad Luwah el rota.

³⁴ De'n Luwah laa ye, ndɨ elta kɨ ta Luwaht, kɨta Luwah ɓaakot kɨ ndilɨn.

³⁵ Bɔw tar ngonɨn, ad la nyag tube jiat.

³⁶ De'n ndɨ adkamɨn Ngon a ne, ngah kumkajir kɨ mbãkɨnõt, na de'n adkamɨn Ngon al a ne, a ngah kumkajir al bat, na wong lo Luwah i dɔat.