Jã 2 - Maktub Ta Kumkajir

Taana kɨ Kanat

¹ Ndɔ mɨta got deg ɗan nah taana kam ɓet kɨ Kana kam dɔning Galilet. Kõ Jeju i tit nõ.

² Kunɨn Jeju kɨ ngéndoog loa kad awɨn lo nah taanat ho.

³ Lon kasɨnduu tɨga ye, kõ Jeju ela an: Kasɨ nduu lod goto.

⁴ Na Jeju tura an: Dekɨdẽ ɗi goi nat sem a? Kaglo lom asɨ al ɓaitɔ.

⁵ Kõ Jeju el ngan ngéɗakɨla an: Nya kɨ ɗi'n a elsɨ a ne i ɗan.

⁶ Jo mbalg kɨbojidet ndɨn nõbe kad Juipg tugon ne rod kɨgo nyabelɓet lod. Kam jo kɨ ɗa asɨ kũn man litɨr dɔjijoo ke ɓu kɨ dɔjoo kari.

⁷ Jeju el ngan ngékɨlag an: Urɨn man kam jogt'n ndɨn adɨn ɗoosɨ. Na ton man kɨ jogt mbã ndɨ tad njirr.

⁸ Jeju eld an: Tajigla ɔdɨn man aw ne adɨn bɨradɔ ngekoogo nyasa. Na ngan ngékɨlag awɨn kɨ man adɨn bɨradɔ ngékoogo nyasa.

⁹ Bɨradɔ ngekoogo nyasa ɔd man kɨ tel kasɨnduu tant oo, na ger lon ngahnt al, na ngan ngékɨla taa gerɨn ɓet. Bɨradɔ ngekoogo nyasa kun ngetaa dekɨdẽ kij kɨ ront,

¹⁰ na ela an: A adɨn kasɨ kɨmaj kete ad deg ãin ndenɨn, kamla a adɨn kɨ m'asɨ njɔrr ko gog ye. Na titbãi i ngom kasɨ kɨmaj mbã, na be tã i ndɨ ad a?

¹¹ 'Nten i nyakɔj kɨ ya kɨdasa'n Jeju ɗa kam Kanat kɨ dɔning Galilet, ɔjɨn tɔgɨn titbe, na ngéndoog loa adɨna kamd.

¹² Gog go nyat'n ɗa Kanat, Jeju awɨn Kapernawm, nat kɨ kõn, kɨ ngankõn kɨ ngéndoog lon; na ndɨn nõbe ndɔ ngãi al.

Jeju tuɓa ngéɗagat kɔ kamkuj kawnat

¹³ Ndɔ ɗa nah lo Juipg kɨ tɔa i Pakɨ i nderbe, ad Jeju ɓai aw Jerusalem.

¹⁴ Lon tee Jerusalemt ud kuj kawnat lo Juipg, ngah deg tit ndɨ ɗawɨn mangg, batg, kɨ derrg, na kɨmadg ndɨ mbelɨn nar dɔ tabɨlgt.

¹⁵ Lon Jeju oo titbe ye, nda kɨla ndet, na tuɓad tube kɔ kam kuj kawnat, kɨ mangg kɨ batg lod, na tɨnda nar lo ngémbel nar tĩkɔ, kamla tɔsɨ tabɨlg lod tɨla.

¹⁶ Na el ngéɗawderg an: I teen kɨ derrg losɨ kɔ labe, ot telɨn kuj lo Bɔwm kuj ɗa gat losɨ.

¹⁷ Kam ngéndoog loa gah dɔ tat 'nten kɨ ndang kam pagt an: Bɨraɓe, jang tɔlɨm sɔkɨr kɨta kuj loi.

¹⁸ Juipg unɨn ta, elɨna anan: Nyakɔj kɨ ya kɨ ɗi a i ɗa kad ɔj'jɨn kad kɨ ger kad aw kɨ tɔg, kad i ɗan kɨla kɨ titbe?

¹⁹ Jeju turd an: I tɔn kuj kawna'n ɗan kɨ ber, na kam ndɔt kɨmita, m'a m'ɗaa gog.

²⁰ Kamla Juipg elɨna anan: Ɓal dɔsɔɔ gidaikɨbojidet hã ɗan ne kuj kawna'n ɗan ye la, ĩ tã an: A i ɗaa kam ndɔt kɨmita be yo?

²¹ Na Jeju elta kɨ terr dɔ kuj kawnat dan dɔ dãron.

²² Kɨtɔ 'nten lon Jeju ɓai ku ngékoit ye, ngéndoog loa gan kamd dɔ tat'n eld, ad adɨn kamd ta kɨndang kam maktubt, kɨ ta'n Jeju el nõ tɔ.

Jeju ger ngarkam deg tube

²³ Lon Jeju ndɨ ɓebo Jerusalemt kaglo ɗa nah Pakɨt ye, deg ngãibe oon nyakɔjg kɨ yaya'n ɗa ye adɨna kamd.

²⁴ Na Jeju ad'd kamɨn al kɨta gerd tube.

²⁵ Jeju ndig kad de elɨn ta lo de mad al, kɨta ĩ kɨɓe ger nya kɨ ngarkam degt ɓet.