Jã 12 - Maktub Ta Kumkajir

Mari urr yib kɨ kootmbĩ nja Jejut

¹ Ndɔ kɨbojidet kete nõ Pakɨt Jeju ɗe Betanit, ɓe lo Lajar ka'n Jeju ada ɓai ku ngékoit.

² Nõbe ɗan nyasa kɨlosɔle kɨ tɔa; Mart ɗa ad'd nyasa, na Lajar i ku ĩgɨtɨn ndɨn ta nyasat kɨ Jeju.

³ Maɗi un yib nard kɨjanjoi kɨ kootmbĩ, kɨ gata i ngãi asɨ gaj litɨr kɨɗa, wurɨn nja Jeju, na bɔr njaa kɨ bisɨdɔn ad sé yib kɨ kootmbĩ asɨ kam kuj nakɨ.

⁴ Na Judas Iskariot ngon Simõ kɨkɨɗa ku ngéndoogt loa, kan a laa ji degt ye, el an:

⁵ Kɨtɔɗi ndugon ne yib kɨ kootmbĩ'n non tan ne gursɨ kɨ de a ngah lon ɗa kɨla ndɔ ɓumɨta, kad adɨn ngéndog al a?

⁶ Judas elta 'nten kɨta ta ɓai hã õ kama kɨta ngéndog al, na ngong nar i jiat ad a un tit kɨta i ngeɓoog la elɨn ta ye.

⁷ Na Jeju an: I nyana jen, kɨta yib kɨ kootmbĩ'n wurɨn njam ye ɗan go rom kɨta dubɨm.

⁸ Ngéndog ndɨn rosɨt la kɨ ndɔgbe, na mĩ, mĩ rosɨt kɨ ndɔg al.

⁹ Koosɨ Juipg oon hoi Jeju ndɨ Betanit, ad ɗen kɨta Jeju hã kɨɗabe al, na kɨta koo Lajar'n Jeju ada ɓai ku ngékoigt.

¹⁰ Ngéjamosɨkadkari kɨbog, ɔjɨn na ta tɔl Lajar ho

¹¹ kɨta Juipg ngãibe nyand kɨta tɔa, na aw adɨn kamd Jeju.

Jeju ɗe Jerusalemt

¹² Loti got, koosɨdeg'n ɗen naht lon oon hoi Jeju ndɨ ɗe ɓebo Jerusalemt ye,

¹³ ɔin dɔ jikag tumbur tee ne kɨta la taa kɨ ko tadt anan: Hosana. Majkurr i kɨ dɔ ngeɗe kam tɔ Bɨraɓet, kɨ Ngar lo Israelag.

¹⁴ Jeju ngah ngon korro ndɨ dɔat, kɨgo tat'n ndangɨn kam Maktubt anan:

¹⁵ Deg kɨ ɓebo Siõt, ot ɓoolɨn. Oon, Ngar losɨ ndɨ ɗe, ndɨ dɔ ngon korrot.

¹⁶ Dasa ngéndoog loa gerɨn girr nyag 'nten al, na lon Jeju ngah kɔsɨgon woi ye, kamla kamd ga dɔ kad ndangɨn nyag 'nten kam maktubt dan ne dɔa, na tɔlɨn ta nyag 'nten dɔat.

¹⁷ Koosɨdeg'n ɗan ro Jejut lon kunɨn Lajar kɨ tee kam ɓadt, na ada ɓai ku ngékoit ye mana naj.

¹⁸ Koosɨdeg tee lan taa kɨta oon hoi nyakɔj kɨ yan ɗa.

¹⁹ Kɨtɔ 'nten Parisɨg elɨna ne ta anan: I gan dɔsɨ set i ngahn nya mad al, oon deg kɨ dɔningt tube ndulon goa woi.

Grekɨ madg sahn koo Jeju

²⁰ Grekɨ madg ku ĩgɨtɨn ɗen kɨta kɔsɨ dɔd ber nõ Luwaht lo ɗa naht ye,

²¹ ɗen ro Pilipt, de kɨ Besaidat kam dɔning Galilet, elɨna kɨtag anan: Ngej, kɨ ge koo Jeju.

²² Pilip aw el Andre, kamla Andre kɨ Pilip aw elɨn Jeju.

²³ Jeju turd an: Dɔkàd asɨ woi kad Ngon de ngah kɔsɨgon.

²⁴ Rota, rota la m'ndɨ m'elsɨ ye. Ĩla kum nyako so dɔningt na oi al a ne, to kɨ kɨɗan na ĩla oi a ne, a and kandɨn ngãi.

²⁵ De'n ndɨ ɗa ta ron a ne, a laa kɔ, na ĩn hã ndɨ tar Luwah tɔi ron dɔningt la a ne, a ngom ron na a ndɨ kumkajir mbãkɨnõt.

²⁶ Ĩla de mad ndig ɗa kɨlaɓer lom a ne, kɨ ndulo gom; lon mĩ tit la ngekɨlaɓer lom a i tit ho ye; ĩla de mad ndɨ ɗa kɨlaɓer lom a ne, Bɔwm a ɔsɨgona.

Jeju elta koin

²⁷ Tajigla ta ndɨ õ kamm ngãi kaa man ɗi a? Ka man oo Bɔwm ajɨm dɔkàdt 'nten ne? Be al, kɨta 'nten la m'ɗen mbã dɔkàt 'nten ye.

²⁸ M'a m'el m'an: Oo Bɔw ad tɔi kɔ. Ndi ta mad tee ko dõ dɔrãt an: Mad tɔm ko woi, na m'am mad tɔm ko kɨdɔt ɓaitɔ.

²⁹ Koosɨdeg'n ɗan nõbe, lon oon dɔ ndi ta'n non ye anan: Ndii la ndáng ye; kɨmadg anan: Malaika la ela ta ye.

³⁰ Jeju tur an: Ndita'n non ko kɨtatɔm al, na kɨtatɔsɨ.

³¹ Takɨgang dɔ duniat'n ɗan i tajigtla, tajigla Luwah a tuɓa ngekõɓe kɨ duniat'n ɗan kɔ.

³² Mĩ taa, lon a unmɨn kɨ dɔ dɔningt a ne, m'a m'ɔrr deg tube kɨromt.

³³ Elta 'nten dan go koin ɓet n'a n'oi.

³⁴ Koosɨdeg turɨna anan: J'oo kam Mberkɨndat Krist a ndɨ kɨ nont ye, titbãi i ndɨ el an: Sumba kad a unɨn Ngon de kɨ dõ a? Ngon de'n non i nõ a?

³⁵ Jeju eld an: Kunj ndɨ kusɨt la ngonsĩ ɓaitɔ. I ndian lon i ndɨn ne kɨ kunj ɓaitɔ kɨtakad til hursɨ yedeng al. De'n a ndia kam tilt ger lon ndɨ awt al.

³⁶ Lon i ndɨn kɨ kunj ɓaitɔ ye, adɨn kamsɨ kunj kɨtakad i telɨn ne deg ngenda kam kunjt. Jeju elta 'nten kamla ɓai rodt aw yaron.

Juipg adɨn kamd Jeju al

³⁷ Na ke Jeju ɗa nyakɔjg kɨ yaya ngãi nõdt titbe kaa ne, adɨna kamd al;

³⁸ kɨtakad tɔlɨn ne ta ta'n Ejai ngekelta kɨ ta Luwaht el an: Bɨraɓe nõ taa tan oon dɔ rojt a? Nõ oo tɔg ji Bɨraɓe a?

³⁹ Asɨn kad kamd Luwah al kɨta Ejai el tɔ an:

⁴⁰ Luwah ut kumd mbukɨ; ad kamd kongkong na ɓeta a oon kɨ kumd; na ɓeta gerɨn girra ngarkamdt kad telɨn kɨromt ad m'yootd.

⁴¹ Ejai elta 'nten kɨta oo kunj Jeju kɨɗangeɗeng la elɨn ta loa ye.

⁴² Na be kaa ne, deg madg ngãi ku mbaiɓegt taan ta loa, na tɔn tad dɔt kɨ tɨga wakɨsɨ al, na ɓeta Parisɨg tuɓand kɔ kam kuj kawnat lo Juipg.

⁴³ Kɨtɔ tarɨn kɔsɨgon lo deg tɔi lo Luwah.

Jeju i kunj kɨta deg

⁴⁴ Jeju un ndɨn kɨ dõ kon an: De'n ndɨ adɨm kamɨn a ne, mĩ kɨ kɨɗambe hã ndɨ adɨm kamɨn al, na ndɨ adkamɨn ngelam ho.

⁴⁵ De'n ndɨ oom a ne, ndɨ oo Ngelam ho.

⁴⁶ Mĩ kunj m'ɗe dɔningt ne kɨtakad dekɨɗen ndɨ adɨm kamɨn a ne, kɨ ndɨ kam tilt al.

⁴⁷ Ĩla de mad ndɨ oo dɔ tag lom na ngom god al a ne, i mĩ hã m'ndɨ m'gangta dɔat al, kɨta m'ɗe kɨ m'gangta dɔ degt al na kɨmaj deg kɨ dɔningt.

⁴⁸ De'n ndɨ mbetɨm ndɨ ta tag lom al tɔ a ne, ngegangta dɔat i nõ, ad i ta'n m'la mbera nõ la a gangta dɔat ndɔt kɨ dɔboit ye.

⁴⁹ Kɨtɔ m'un ta kɨdɔm m'el al, na Bɔw kɨ ngelam la ndam mber dɔ nyat'n sumba kad m'el, na m'la mbera deg.

⁵⁰ M'ger, mberkɨnda loa i kumkajir kɨ mbãkɨnõt. Kɨtɔ 'nten, tag'n m'ndɨ m'el ye, m'ndɨ m'el tit'n Bɔw elmɨn.