Jã 11 - Maktub Ta Kumkajir

Lajar oi

¹ Mõi ɗa de mad'n tɔa i Lajar; ɓe loa i Betanit, i ɓe lo Maɗi kɨ Ngonkõa Mart.

² I Mari'n wur Bɨraɓe kɨ yib kɨ kootmbĩ, na bɔrr njaa kɨ bisɨdɔn nõ la mõi ɗa ngonkõa Lajar ye.

³ Kɨtɔ 'nten ngankõa kɨdẽg kɨjoo'n non la elɨn Jeju anan: Bɨraɓe, de kan i tara ye i mõi.

⁴ Lon Jeju oo dɔ ta 'nten ye el an: Mõi 'nten a tee koi al, na i kɨtakad tɔ Luwah ngahn kɔsɨgon, kad Ngon Luwah ngah kɔsɨgon kɨta kulaa.

⁵ Jeju tar Mart kɨ ngonkõa kɨdẽ, kɨ Lajar.

⁶ Lon oo hoi mõi kɨ ɗa Lajar ye, ɗa ndɔ joo dɔt kɨ lot'n non.

⁷ Kamla el ngéndoog lon: Ad kɨ tel j'awɨn dɔning Judet gog.

⁸ Ngéndoog loa elɨna anan: Ngendoo deg, ɗa ndɔ ngãi al ɓaitɔ la Juipg sahn tɨlai kɨ mbal ye la i ndig tel gog yo?

⁹ Jeju tur an: dɔ kàd i kɨlah gidaijoo kam ndɔt kɨɗa ale? Ĩla de a ndia kàda a ne, a ga njan gigt al kɨta a oo kunj kɨ dɔningt'n ɗen.

¹⁰ Na ĩla de ndia ndɔɔ a ne, a ga njan gigt kɨta kunj goto kamat.

¹¹ Jeju eltag 'nten kamla eld an: Namj Lajar to ɓi na m'a m'aw m'ndoola dɔ ɓit.

¹² Ngéndoog loa elɨna anan: Bɨraɓe ĩla to ɓi a ne, a yoot.

¹³ Jeju elta koi Lajar, na ngéndoog loa oon anan ndɨ elta taakò kɨ lo ɓit.

¹⁴ Kɨtɔ 'nten Jeju eld kɨ tɨga wakɨsɨ an: Lajar oi;

¹⁵ na m'ɗa ronel kɨtatɔsɨ dɔ goto'n m'goto nu kad adɨn ne kamsɨ; be kaa ne ad kɨ j'awɨn roat.

¹⁶ Dɔ tat 'nten Tomas, ĩn a kunɨna Dydim, ad i ndɨngã ye, el ngendoo namɨng an: Ad kɨ j'awɨn tɔ ho kad j'oi nat kɨ Bɨraɓe.

Jeju i ngeɓai kɨ deg lo koit

¹⁷ Lon Jeju ɗe ye, ngah Lajar ɗa ndɔsɔɔ kam ɓadt woi.

¹⁸ Ɓe Betani taa, ɗa kad ɓebo Jerusalemt nderbe, asɨ kilometɨr mɨta.

¹⁹ Juipg ngãibe ɗen kete ro Mart't kɨ Mari kad kɨ'n ton sed dɔ ndubat lo ngon kõnd.

²⁰ Lon Mart oo hoi Jeju a ɗe ye, aw la taa, na Mari taa ne, ndɨ ber kuju.

²¹ Mart el Jeju an: Bɨraɓe nĩ i ndɨ la a ne ngonkom a oi al.

²² Na m'ger tajigla kaa nya ɗi a i kɔ Luwah a ne Luwah a ad.

²³ Jeju ela an: Ngonkõi a ɓai lo koit.

²⁴ Mart ela an: M'ger a ɓai ndɔ ɓai ngékoit kam ndɔt kɨ dɔboit.

²⁵ Jeju ela an: Mĩ ngekad ngékoig ɓain, mĩ kumkajir, de'n ndɨ adɨm kamɨn, ĩla oi kaa ne a tel kumkajir.

²⁶ Na dekɨɗen'n ndɨ kɨ dɔn dõ, na ndɨ adɨm kamɨn a ne a oi al mbãkɨnõt. I ta ta 'nten e?

²⁷ Mart ela an: Ãã Bɨraɓe m'ger kammt ĩ Krist, Ngon Luwah kɨ ngeɗe dɔningt.

Jeju nõ

²⁸ Lon Mart elta 'nten kamla aw kun Mari kɨ ngonkõ gid tilt, ela an: Ngendoodeg ɗa ne na ɗa kuni.

²⁹ Lon Mari oo dɔ ta 'nten ye ɓai kanangbe aw ro Jejut.

³⁰ Kɨtɔ Jeju and kam ɓet al ɓaitɔ, na ɗa lot'n Mart ndɔdat nõ.

³¹ Kɨtɔ 'nten Juipg ton sia dɔ ndubat, ndɨn sia kam kujt, lon oon Mari ɓai kanangbe, tee kɨtɨga ye, ndulon goa. Oon a anan ndɨ aw dɔɓat kɨ n'nõ.

³² Lon Mari tee lot'n Jeju ɗa tit ye oa, so kɨ njat, ela an: Ni i ndɨ la a ne, ngonkom a oi al.

³³ Lon Jeju ooa to nõ, kɨ Juipg'n ɗen sia nat ɗa non ho ye, ɗa kamkil, ta õ kama tɔ.

³⁴ Jeju el an: I lan na ɗaa? Elɨna anan: Bɨraɓe i ɗe oo.

³⁵ Jeju mbel nõ ɓitit.

³⁶ Kɨtɔ 'nten Juipg anan: Oon tarɨn tara ye.

³⁷ Na kɨmadg kudt anan: De'n tee kum mundo ye, asɨ kad ɔg dɔ Lajar kad oi al ale?

Jeju ad Lajar ɓai lo koit

³⁸ Kɨtɔ 'nten Jeju ɗa kamkil gog tɔ, aw dɔ ɓadt. Dɔɓad'n non i bulo mbal, na mbal mad ut taa.

³⁹ Jeju el an: Unɨn mbal kɔ. Mart ngonkõ ngekoi ela an: Bɨraɓe tajigla, ot gã kɨta ɗa ndɔsɔɔ woi.

⁴⁰ Jeju ela an: M'eli m'an ĩla i taa ta lom a ne, a oo tɔg lo Luwah ale?

⁴¹ Kɨtɔ 'nten unɨn mbal kɔ. Kamla Jeju un kumɨn kɨ dõ, na el an: Oo Bɔw m'ɗai mersi kɨta koon oo dɔ kɔ lom.

⁴² Mĩ taa maɗi m'ger i ndɨ oo dɔ kog lom kɨndɔgbe na m'elta 'nten kɨta koosɨdeg'n ɗa gugɨn dɔm ɗan, kɨtakad gerɨn ne jeje ĩ la i lam ye.

⁴³ Lon elta 'nten ye, kun nya kɨ ndɨn kɨbobe an: Lajar i tee so.

⁴⁴ Ngekoi tee, jiag kɨ njag ĩn kɨdɔ kɨ kɨla kub, na takuma i kɨ dulo kɨtakub. Jeju eld an: I tutɨn na, na i nyana ad aw.

Mbaiɓeg ɔjɨn na ta kad'n hɔn Jeju

⁴⁵ Kɨtɔ 'nten deg ngãibe ku Juipgt'n ɗen ro Marit, na oon nya'n Jeju ɗa ye adɨna kamd.

⁴⁶ Na kɨmadg kudt awɨn ro Parisɨgt elɨnd ta nya'n Jeju ɗa nõ?

⁴⁷ Taa ne, ngéjanyamosɨkadkari kɨbog kɨ Parisɨg kawɨn ngékoogotag kɨ nat anan: De'n non ndɨ ɗa nyakɔjg kɨ yaya ngãibe, ka kɨ ɗa ɗi a?

⁴⁸ Ĩla kɨ nyàa kad ɗa titbe a ne, deg tube a adɨna kamd; Romag tɔ a ɗe tan lo kɨjaɓat loj kɨ girrdeg loj tube.

⁴⁹ Na kɨmad kudt nõ tɔa i Kaip, in hã i bɨra ngejanyamosɨkadkari ɓalt'n non ye eld an: Ĩ gerɨn nya mad kɨɗa al bat;

⁵⁰ maj kɨtakad de kɨɗa oi kɨta deg kad girrdeg kɨtaagbe nujɨn kɔ al. I gaan maj oon.

⁵¹ Ta 'nten un kɨdɔn hã el al, na kɨta i bɨra ngejanyamosɨkadkari kɨbo ɓalt'n non la ndɔ'n ndil an: Jeju a oi kɨta girrdeg lod ye.

⁵² Na kɨta girrdeg lod hã kɨɗabe al, na kɨtakad kawɨn ngan Luwah kɨ kam dãrot kɨkɨɗa, ngan Luwah, ĩgɨn tĩn na kɔ kɨ log.

⁵³ Ndɔt'n non ɔjɨn na ta kad'n tɔlɨn Jeju.

⁵⁴ Kɨtɔ 'nten Jeju ndian ku juipgt kɨ tɨga wakɨsɨ gog al; na ɓai lot'n non kɔ, aw kam dɔningt kɨ nderbe kɨ kad dɨlalot, and kam ɓet mad'n a kunɨna Epraim, nõbe la ndɨ tit kɨ ngéndoog lon ye.

⁵⁵ Pakɨ lo Juipg i nderbe ad deg ngãibe kɨ ngan ɓegt awɨn ɓebo Jerusalemt kete nõ Pakɨt kad kɨ n'arɨn rod.

⁵⁶ Ɗa sahn Jeju, ɗa elɨn na ta kam kuj ndub Luwaht anan: Oon ɗia? A ɗe lo ɗa naht ale?

⁵⁷ Ngéjamosɨkadkari kɨbog kɨ Parisɨg ndan mber kete kad de mad ger lo ndia a ne, kɨ tee njaat kad hɔna.