Jã 1 - Maktub Ta Kumkajir

Ta kumkajir

¹ Lo yaɓoodat ta i nõ, ta i nat kɨ Luwah, na ta i Luwah.

² Ta'n non i lo yaɓoodat nat kɨ Luwah.

³ Kɨtakula la Luwah ɗan nyag tube ye, kam nyagt'n Luwah ɗa ye, ɗa nya mad kɨɗa kɨkanjã al.

⁴ Kamat kumkajir i tit, na kumkajir i kunj lo deg.

⁵ Kunj ndɨ unj kam tilt, na til ut dɔa al.

⁶ Luwah la de mad kɨ tɔa i Jã.

⁷ De'n non ɗe, i ngemanaj, kɨtakad manaj dɔ kunjt, kad deg tube adɨn kamd Luwah kɨtakulɨn.

⁸ Ĩ kɨɓe kɨ dɔn i kunjɨn non al, na ɗe kɨtakad'n manaj dɔ kunjt.

⁹ Kunjɨn non la i kunj kɨ rota ye, lon ɗe dɔningt ne ndɨ unj dekɨɗen.

¹⁰ Ta i dɔningt. Luwah ɗa dɔning kɨtakula, na deg kɨ dɔningt gerɨna al.

¹¹ Ta'n non ɗe ro degt lon, na deg loa hɔna kɨ rodt al.

¹² Na deg tube'n hɔna kɨ rodt, na adɨna kamd tɔ ye, ad'd tɔg kɨ ĩ ngan Luwah.

¹³ Ĩgɨn non oojɨnd kɨtakul mosɨ al, ke kɨtakul ndig lo dãro de, ke kɨtakul ndig lo de, na ĩn kɨ kooj kɨtakul ndig lo Luwah tã.

¹⁴ Ta tel dãro de, hɔlondɨ rojt, j'oo maj loa kɨ tɔitɔi kɨ tit kɨmaj kɨ tɔitɔi lo ngon kɨ kooj kɨɗabe, kɨ ɗe ko ro bɔwt, ɗoosɨ kɨ kamkẽ kɨ rota tɔ.

¹⁵ Jã manaj, ɗa ko an: Ĩn ɗan la, i de'n m'elta loa m'an: De'n ndɨ ɗe gomt ye, i kɨbo tɔim kɨta i nõ maɗi nõ koojɨmt.

¹⁶ Jĩ tube kɨ ngah kamkẽ ko kam nyamajgt loa kɨ ngãi ad maj urrj kɨ dɔtdɔt.

¹⁷ Luwah ad mberkɨnda kɨtakul Moij, na kamkẽ kɨ rota ɗen kɨtakul Jeju Krist.

¹⁸ De mad kɨ oo Luwah nja kɨɗa goto bat, na ngon kɨ kooj kɨɗabe'n i Luwah, ĩn i kad bɔwt la ad deg gerɨna ye.

Manaj lo Jã ngeɗa deg baptem

¹⁹ Juipg kɨ ɓebo Jerusalemt lan ngéjamosɨ kadkarig kɨ Lebiag kad ndɨjen Jã anan: Ĩ nõ a?

²⁰ Najkɨma lo Jã la ten: Jã maj ta al, na tɔ tant an: Mĩ Krist al.

²¹ Deg'n non ndɨjena anan: I titbãi a? Ĩ Eli a? Jã tur an: Mĩ Eli al. Ndɨjena anan: Ĩ ngekelta kɨ ta Luwaht'n non a? Jã tur an: Ãã.

²² Ndɨjena tɔ anan: Ta ye, ĩ nõ a? Kad kɨ tel kɨ ta mad kɨ tur jad ngélaj. Ĩ kɨbe ye, ta ɗi i ndɨ el dɔ roit?

²³ El an: Mĩ ndɨ de kɨ ngeko kam dɨlalot kan: I ɗan go ɗob lo Bɨraɓe ad asɨna jerɨr. Tit'n Ejai ngekelta kɨ ta Luwaht elɨn.

²⁴ Parisɨg ĩn ku degt'n hã land.

²⁵ Ɗa ndɨjena ta ɓaitɔ anan: Ĩla ĩ Krist al, ke Eli, ke ngekelta kɨ ta Luwah'n non al, a ne kɨtɔɗi i ɗa i ɗan deg baptem a?

²⁶ Jã turd an: Mĩ taa, m'ɗa deg baptem kam mant, na de mad ɗa densɨt ne, ĩn i gerɨna al;

²⁷ de'n non ndɨ ɗe gomt, na mĩ m'asɨ kad m'tut kɨla sanja loa al.

²⁸ Nyag'n non ɗan nya Betanit, gid bah Jurdẽt, lot'n Jã ɗa ɗa deg baptemt.

Jeju i ngon bat lo Luwah

²⁹ Loti got Jã oo Jeju a ɗe kɨ dɔnt, na el an: Oon ngon bat lo Luwah kɨ Nge kun majal lo deg kɨ dɔningt kɔ.

³⁰ Ĩla i de'n m'elta loa kete m'an: De mad a ɗe gomt nõ, na tɔim kɨta i kete nõ koojɨmt.

³¹ Mĩ kɨɓe kaa m'gera kete al, na i kɨtakad Israel geran la m'ɗe m'ɗan deg baptem kam mant ye.

³² Jã manaj 'nten: M'oo Ndil ɗisɨ ko dɔrãt tit derr be, na ndɨ dɔat.

³³ M'gera kete al, na Luwah'n lam ɗa deg baptem kam mant la elɨm an de'n a oo Ndil ɗisɨ na ndɨ dɔat nõ la i de'n a ɗa deg baptem kam Ndil kɨkunjɗangt ye.

³⁴ M'oo, na m'manaja kad i Ngon Luwah.

Ngéndoog kɨdasa lo Jeju

³⁵ Loti got Jã i nõbe ɓaitɔ, nat kɨ ngéndoog lon joo

³⁶ na lon oo Jeju a tɔi ye, el an: Oon ngon bat lo Luwah.

³⁷ Ngéndoog kɨjoo lo Jã oon dɔ ta'n el, na ndulon go Jeju.

³⁸ Jeju mbel kɨ gog, na ood a ndulon gon, eld an: A i sahn ɗi a? Turɨna anan: Rabi, ad i ngendoodeg, i ndɨ ɗen a?

³⁹ Eld an: I ɗe oon. Awɨn oon londia, na ndɨn sia ndɔt'n non mbã lo kɨsɔle.

⁴⁰ Kɨ kɨɗa ku kɨ joogt'n oon dɔta lo Jã, na ndulon go Jeju ye, tɔa i Andre ngon kõ Simõ Pierr.

⁴¹ Dasabang, Andre ngah ngonkõ Simõ, ela an: Kɨ ngah Mesi ad i Krist.

⁴² Ɗe sia ro Jejut, Jeju ooa, na ela an: ĩ Simõ, ngon Jonas; a kuniɨn Kepas (ad i mbal).

Jeju kun Pilip kɨ Natanael

⁴³ Loti got Jeju ndig kɨ n'aw Galilet, na ngah Pilip: Ela an: I ndulo gom.

⁴⁴ Pilip i de kɨ Besaidat; Besaida i ɓe lo Andre kɨ Pierr.

⁴⁵ Pilip ngah Natanael, ela an: Kɨ ngah de kan Moij ndang ta loa kam Mberkɨndat, ngékelta kɨ ta Luwaht ndangɨn ta loa kam maktubgt ho ad i Jeju kɨ Najaret't, i ngon Jojep.

⁴⁶ Natanael el Pilip an: Nya mad kɨmaj asɨ tee ko kam ɓet kɨ Najaret't e? Pilip tura an: I ɗe oo.

⁴⁷ Lon Jeju oo Natanael a ɗe kɨ roat ye elta loa an: Oon Israel kɨ rota, kɨ ndando goto roat.

⁴⁸ Natanael ela an: I gerɨm ko ɗa? Jeju tura an: kete lon Pilip kuni al ɓaitɔ, lon i ndɨn ndil kag mbaiɓoodt la m'ooi ye.

⁴⁹ Natanael tura an: Rabi, ĩ ngon Luwah, ĩ Ngar lo Israel.

⁵⁰ Jeju tura an: Girra kel'n m'eli m'an m'ooi ndil kag mbaiɓoodt la admɨn kami yo? A oo nyag kɨbo tɔi ĩgɨn non.

⁵¹ Jeju ela tɔ an: Rota, rota la m'ndɨ m'elsɨ ye, a oon dɔrã ɗa tag, na malaikag lo Luwah a alɨn kɨ dõ ho, a ɗisɨn kɨ ber ho kɨ dɔ Ngon det.