Hebreg 9 - Maktub Ta Kumkajir

Kadkarig kɨ kaglo kõn kunkɔt

¹ Kam kunkɔt kɨdasa, mberkɨndag ĩn tit nõ, kad de ɗan kɨla ndub Luwah kɨ goɗobat aw kɨ lo kɨjaɓat kɨ kɔsɨdɔn kɨta Luwah.

² Kɨtɔ maɗi nu ɗan kuj kub londɨ kam gaj lot kɨ a kunɨna lokɨjaɓat. Lamba kɨ tabɨl kɨ bɨna kɨ lɔi kɨ ndah nõ Luwaht, ndɨnt.

³ Kamla, gid kubganglot, kama kɨkõjoo i nõ, ĩn a kunɨna lo kɨjaɓat kɨ tɔitɔi.

⁴ Nõbe, dɨngɨr lɔr kɨta la horr dukan, kɨ sund kunkɔ'n gida i kɨ kut kɨtaagbe kɨ lɔr ndɨnt, kam sundt'n non jo lɔr i tit ho, na maan i kam jo lɔrt'n non. Kagtɔsɨ lo Aarõ kɨ ɓa hutɨn i kam sundt ho kɨ barmbalg kɨ joo'n Luwah ndang mberkɨndag dɔt ĩn kamt ho.

⁵ Dɔ sundt'n non, malaikag kɨ kunjd ɗangereng ɗant, bɔgd ut dɔ lon lan kadkari kɨjamosɨt kɨta kut dɔ majalg lo deg. Tajigla i kaglo kelta dɔ nyagt'n non kɨɗa kɨɗa al.

⁶ Nyag'n non taa, ɗan god titbe: Kujkub kama i joo ngéjamosɨ kadkarig a andɨn kamat kɨdasa kɨ ndɔg tube kad ɗan kɨlaɓer ndub Luwah.

⁷ Na kamat kɨkõjoo, bɨra ngejanyamosɨkadkari kɨ kɨɗanbe la, a andt ye, i nja kɨɗabe kam ɓalt. Lot'n non maj kad andt kɨ mosɨ dã kad la kadkarit ad Luwah kɨta ron dasa, kamtã la kɨtɔ majal lo koosɨdeg.

⁸ Nya'n Ndil Kɨkunjɗang ɗa ndooj laten: Ta ɗob kand kam lot kɨjaɓat kɨ tɔitɔi tee al ɓaitɔ, kɨta kam kuj kub kɨdasa ɗa ɓaitɔ.

⁹ Nyag 'nten ɔjɨn go nyag kɨ ndɨ ɗan nya dɔkaglot kɨ tajigla ad i nyakadg, kɨ kadkarig kɨ la kad Luwah a asɨ telɨn ngarkam de ad asɨnatap kad ndub Luwah al.

¹⁰ Nyag'n non, ĩn mberkɨndag'n ndɨ ndoon deg go nyasa kɨ nyakãi kɨgo ɗob kar ro dɔ yerrt. Ĩn mberkɨndag kɨ ɔj go nyag kɨ dɔ dãrot tã kɨɗabe. Mberkɨndag'n non ĩn kɨ nda kɨtakad deg ɗan goot mbã kaglot'n hã Luwah a mbel'n nyag tube kad ĩn kɨdenesew.

Kadkari lo Krist

¹¹ Na tajigla Krist ɗe, i Bɨra ngejanyamosɨkadkari lo nyag kɨ majmaj kɨ tajigla. Krist nda kam kujkub kɨbo tɔi, kɨ kɨ kasɨnatap gang. Kujkub'n non, i de hã ɗa kɨ jin al, i nyandah kɨ dɔningt'n ɗan al tɔ.

¹² Krist and kam lot kɨjaɓat kɨtɔitɔi nja kɨɗabe mbãkɨnõt kɨtakul mosɨ bĩãg, ke mosɨ ngan mand mangg al, na i kɨtakul mosɨn kɨ kɔsɨdɔn la Krist taanyàjɨn dõ mbãkɨnõt ye.

¹³ Kɨtɔ maɗi kɨgo nyabelɓet lo Juipg a tudɨn mosɨ bĩãg kɨ bɔw mangg, kɨ bu ngan mangg kɨ lan horrt gid ɓet dɔ degt kɨyerr kɨgo nyabelɓet lod, ad telɨn dãro kɨ tɨga kɨ kar nyang dɔ yerrt'n non.

¹⁴ Ĩla ta'n non i ta kɨ jeje a ne, rota mosɨ Krist a aw kɨ tɔg tɔi mosɨ dãg ngãibe. Krist la ron kadkarit kɨ asɨnatap ad Luwah kɨtakul Ndil Kɨkunjɗang. Mosɨ Krist tugo kamj ad ar dɔ kɨlagt kɨ koi ad kamj hɔj kɨ ta al kɨta 'nten j'asɨ ɗan kɨla ndub Luwah kɨ Ngekumkajɨr.

¹⁵ Kɨtɔ 'nten la Krist ĩn ngeɗambɨna Luwaht kɨ deg kad la deg nooj nat kɨ Luwah kad ɗago kunkɔ kɨ kij, kɨta Krist oi kad'n badɔ deg dɔ nyaɗat kɨmajal kaglot'n hã ĩn ne girr kunkɔt kɨ maɗi, kɨtakad deg'n Luwah kund ye, kɨ ngahn nyamajg kɨ tokɨnõt'n Luwah un kɔn an n'a n'ad'd.

¹⁶ Ĩla de mad ndang maktub kɔjnyanduba lon a ne, maj kad de'n non oi ad deg gerɨn ta koia ɓet kamtã la ɔjɨn nyamajg loa ye.

¹⁷ Kɨtɔ lon ngeɗa maktub kɔjnyanduba ndɨ kɨdɔn dõ ye ndaa goto ɓaitɔ. Go koi det'n non tã la maktub kɔjnyanduba a aw kɨ tɔg ye.

¹⁸ Kɨtɔ 'nten, ke kunkɔ kɨdasa kaa, Luwah ndɨje kad tɔlɨn dã ad mosa ãi.

¹⁹ Kaglot kɨ maɗi, Moij ɔrr girr mberkɨndag'n Luwah nda ad deg gerɨn kete. Kamla un mosɨ ngan mangg kɨ mosɨ bĩãg nat kɨ man tud dɔ maktub mberkɨndat kɨ deg tube, kɨ bĩ bat kɨ kɨrre ta kɔn kag hisopt el an:

²⁰ 'Nten i mosɨ kunkɔ kɨ Luwah ndasɨ mbera kad i ngomɨn go.

²¹ Tit be la Moij tudɨn mosɨ dɔ kuj kub londɨt kɨ nyag tube'n ɗan ne kɨlaɓer lo Luwah.

²² Kɨgo Mberkɨndat lo Moij, i kɨ mosɨ la ndɨ arɨn ne nyag tube ye, na majalg'n deg ɗan ye, Luwah a nyàgo kɔ al, ĩla mosɨ dã kɨ kũ kɔ goto. Ĩla mosɨ dã kɨ kũ kɔ goto a ne, majal kɨ deg ɗan ye, Luwah a nyàgo kɔ al.

Kadkari lo Krist kagdosɨt ndɨ ɔrr majalg kɔ

²³ Kɨtɔ 'nten kari na kɨ arɨn nyag kɨ ɗan ɓakumta nyag kɨ jeje kɨ kam dɔrãt dõ titbe. Na ro nyag kɨ jeje ĩn kɨɓeg kɨdɔd kɨ kam dɔrãt dõ ye, kari na kɨ arɨnd kɨ kadkarig kɨjamosɨ kɨmaj tɔi nge kɨ kete.

²⁴ Kɨtɔ Krist and kam lot kɨjaɓat ĩn deg ɗan kɨ jid ndajɨn ne ro nya kɨ jeje al. Na kam dɔrãt dõ la Krist andt kam lot'n Luwah i tit. Tajigla ɗa nõ Luwaht ɗa kɔ kɨtatɔj.

²⁵ Bɨra ngejanyamosɨkadkari lo Juipg ndɨ and kam lot kɨjaɓat kɨtɔitɔi, kɨ ɓal kɨɗen kɨ mosɨ dãg. Na Krist taa ne, and kam dɔrãt kad ad ron kɨ nja nat nat be al.

²⁶ Ĩla ad ron kadkarit Luwah kɨ nja natnatbe a ne, ni a dai yon kɨ kõ kɨ nja natnatbe lo lagɨr duniat mbã ɓone. Na tajigila Krist ɗe nja kɨɗabe do, dɔngoi kohgt kɨtakad n'ɔrr majalg'n deg ɗan, kɨ ɗob la ron kadkari kɨjamosɨt ad Luwah.

²⁷ Kari na deg a oin nja kɨɗa be, kamla got gog a ne, takɨgang lo Luwah a ɗe dɔdt ye.

²⁸ I titbe tɔ la Krist ad ron kadkarit nja kɨɗabe do, kɨtakad ɔrr majalg lo koosɨdeg ngãibe kɔ. Kamla a tel ɗe kɨkõjoo kɨta kɔrr majalg al ta, na kɨta kaj deg'n ndɨ ngoona keɗeng.