Hebreg 8 - Maktub Ta Kumkajir

Jeju i Bɨra ngejanyamosɨkadkari loj

¹ Ta kɨbo tɔi kam tagt'n j'el kete laten: J'aw kɨ bɨra ngejanyamosɨkadkari'n non, ĩn ndɨ dɔ jikõ Luwaht kɨ Ngetɔitɔi kam dɔrãt.

² Ndɨ ɗa kɨlaɓer lon ndubɨn Luwah kam lot kɨjaɓat kɨ kam kujkub londɨt kɨ jeje'n Bɨraɓe ɗa, na i de hã ɗa al.

³ Bɨra ngejanyamosɨkadkari ye, i kɨndah kɨtakad kɨ la nyag kadkarit ad Luwah ho, kad ja mosɨ dãg ad Luwah ho tɔ. Titbe tɔ la, sumba kad Jeju bɨra ngejanyamosɨkadkari loj aw kɨ nya mad jint kɨ kad la ad Luwah.

⁴ Ĩla ni Krist i dɔningt la a ne, ni a i ngejanyamosɨkadkari al. Kɨtɔ ngéjamosɨ kadkarig ndin nõ woi, ĩgɨn ndɨ lan kadkarig adɨn Luwah kɨgo mberkɨndat lo Moij.

⁵ Ngéjamosɨ kadkarig'n non ndɨ ɗan kɨlaɓer kam kuj ndub Luwaht. Na kɨla'n ndɨ ɗan ye, i nyakɔj kɨ ɔj go nyag kɨ ndɨ ɗan nya kam dɔrãt dõ, i ndil nyag'n non tɔ. Kɨtɔ lon Moij ndɨ ɗa lo ɗa kujkub ye, Luwah ela an: Kɨ oo maj kad i ɗa nyag'n non tube kɨgo nyandajt'n m'dai dɔ mbalt.

⁶ Na tajigla Luwah ad Jeju kɨla ndub kɨmaj tɔi lo ngéjamosɨ kadkarig tube. Kɨtɔ oo Jeju i ngeɗambɨna degt kɨ Luwah, i ngekad kunkɔ kɨmaj tɔi kunkɔ kɨ maɗi, ĩn hã ndahn girra ɔjɨn ne dɔ nyag kɨmaj tɔi.

⁷ Ĩla kunkɔ kɨdasa ta goto dɔt a ne, ni a sahn lo kɨta ndah kunkɔ kɨkõjoo al ta.

⁸ Na j'oo kad asɨnatap al, ad Luwah aw kɨ ta kɨ Israelag ad eld an: Oon ndɔg ndɨ ɗen nõ, kel Bɨraɓe m'a m'un kɔm kun kɨ kij mad ngékɨɓe lo Israel kɨ ngékɨɓe lo Juda.

⁹ Maɗi m'un kɔm mad bɔwdg, ndɔt'n m'hɔ jid kad m'teen sed kam dɔning Ejipt't kɨ tɨga. Na kunkɔ lom kɨ kij'n m'a m'un ye, a i tit kunkɔ kɨdasa'n telɨn rod goot al nõ al. Kɨtɔ 'nten la m'telɨn gidɨm m'ad'd, kɨta hɔ kɨ hɔn rod bá kam kunkɔt lom al, kel Bɨraɓe.

¹⁰ Kunkɔ'n m'a m'un mad ngékɨɓe lo Israel go ndɔgt'n non laten kel Bɨraɓe, m'a mad mberkɨndag lom i kam tagahdt. M'a m'ndang mberkɨndag lom ngarkamdt tɔ. M'a mĩ Luwah lod, ĩn tɔ a ĩn girrdeg lom.

¹¹ De mad kɨ a ndoo nya de kam ɓet lon ke ngonkõ an: Maj kad i ger Bɨraɓe. Goto. Kɨtɔ deg tube a germɨn, ɓai dɔ de kɨdut mbã teen dɔ kɨbot.

¹² M'a m'oo kumtondo lod dɔ ɗagootalgt lod, m'a m'gakam dɔ majalgt lod gog al parkɨnõt.

¹³ Lon Luwah elta dɔ kunkɔt kɨ kij ye, Luwah tel kunkɔ kɨ maɗi kunkɔt kɨ kõn ta. Na nya kɨkõn taa ne, lon to kɔkɨ kɔkɨ ye, goot a tɔi kɔ.