Hebreg 7 - Maktub Ta Kumkajir

¹ Melkisedek'n non maɗi i Ngar kɨ ɓebot kɨ tɔa i Salem. I bɨra ngejanyamosɨkadkari kɨ nõ Luwaht kɨ Ngetɔitɔi. Lon Abraham tel lot'n tetɗɔɔ ngargt ye, Melkisedek aw ndɔda na njang dɔa.

² Abraham ada gaj kɨ kɨɗa ku kɨ kɨlaht kam nyagt tube'n hɔ ta ɗɔɔt. Dasabang girr tɔ Melkisedek i titbe: i ngar kɨ ngeɗanya kɨdenesew. Kamla i ngar kɨ Salem, ad i ngar kɨ nge lapia tɔ.

³ De ger kõa kɨ bɔwa al ho, ke girrkooja kaa goto kam Maktubt lo Luwah. De ger ndɔ kooja al ho, ndɔ koia al tɔ. Na telɨna ad titɨn na kɨ Ngon Luwah, i ngejanyamosɨkadkari mbãkɨnõt.

⁴ Oon titbãi de'n non ĩn kɨbo. Abraham kɨ bɨrabɔw ada gaj kɨɗa ku kɨ kɨlaht kam nyagt tube'n telɨn ta ɗɔɔt.

⁵ Na ĩgɨn ĩn ngan Lebi'n ndɨ ɗan kɨla jamosɨkadkari ye, mberkɨnda lo Moij, ndad mber kad taan gaj kɨ kɨɗa ku kɨ kɨlaht ji ngankõdgt, ke neni ĩn ngaka Abraham.

⁶ Na Melkisedek taa ne, i girrkooj Lebi al, titbe kaa ne, Abraham ada gaj kɨ kɨɗa ku kɨ kɨlaht. I Melkisedek la njang dɔ Abraham'n Luwah un kɔn ada ye.

⁷ Kɨ ger maj kad de'n i kɨbo tɔi nõ la a njang dɔ de'n ĩ kɨdu ye.

⁸ Nẽbe j'oo kad deg'n hã ĩn girrdeg lo Lebi'n ndɨ taa'n gaj kɨ kɨɗa ku kɨ kɨlaht ji ngankõdgt ye, ndɨ oin. Na Melkisedek'n taa gaj kɨ kɨɗa ku kɨ kɨlaht ji Abrahamt ye oi al, ndɨ kɨ dɔn dõ, tit'n ndangɨn ne kam maktubt lo Luwah.

⁹ J'oo tit Lebi ngétaa gaj kɨ kɨɗa ku kɨ kɨlaht ye, ĩ kɨɓe kɨ dɔn ad gaj kɨ kɨɗa ku kɨ kɨlaht Melkisedek tit'n bɔwa Abraham adɨn Melkisedek.

¹⁰ Kɨtɔ lon Melkisedek ndɔd Abraham ye, oojɨn Lebi al ɓaitɔ.

¹¹ Ɗa kɨlaɓer jamosɨkadkari lo ngan Lebi girra i dɔ mberkɨndat'n Luwah ad Israel. Na ĩla kɨlaɓer jamosɨkadkari lod asɨnatap a ne, ni a geen kad bɨra ngejanyamosɨkadkari mad kɨɗang kɨ tit Melkisedek kad ɗe al ta. Bɨra ngejanyamosɨkadkari ɓai ku ngaka Aarõt al.

¹² Tit'n kɨlaɓer jamosɨkadkari mbel'n ye, kari na maj kad mberkɨnda kɨ dɔt kaa ne, mbel ho.

¹³ Tag 'nten ye, elɨn dan ne dɔ Bɨraɓe loj'n i girrkoojt mad kɨɗang'n de loa mad kɨ ɗa kɨlaɓer jamosɨkadkari kete goto.

¹⁴ Kɨtɔ to kɨ tɨga wakɨsɨ kɨ ro degt tube. Bɨraɓe i girrkooj Juda, na Moij elta kɨlaɓer jamosɨkadkari dan dɔ girrdeg kɨ Judat nja kɨɗa al.

Bɨraɓe Jeju i Ngejanyamosɨkadkari tit Melkisedek be

¹⁵ Nya 'nten to kɨ tɨga wakɨsɨ, ngejanyamosɨkadkari mad kɨɗang kɨ i girrkoojt lo Lebi al, na i tit Melkisedek ɓai.

¹⁶ De'n non ndana bɨra ngejanyamosɨkadkari kɨgo nyabelɓet lo deg al. Na i bɨra ngejanyamosɨkadkari kɨgo tɔg kumkajirt kɨ mbãkɨnõt.

¹⁷ Kɨtɔ man naj dɔat kam Maktubt titbe: A i ngejanyamosɨkadkari mbãkɨnõt tit Melkisedek.

¹⁸ Kɨtɔ mberkɨnda kɨ maɗi ye, tɔga asɨ kad ɗa kɨ deg al, ad Luwah ɔrra kɔ.

¹⁹ Mberkɨnda lo Moij ɗa nya mad kɨ asɨnatap nõ Luwaht al. Na tajigla nya ndahkamdɔt kɨmaj tɔi ɗe woi, j'asɨ ndɔt kɨ ro Luwaht kɨtakula.

²⁰ Nya mad to nõ: Lon Luwah ndahn Jeju Bɨra ngejanyamosɨkadkari ye, nda yo. Na lon ndahn ngan Lebi ngéjanyamosɨkadkari ye, ndand kanj yokɨnda kɨtakul ta'n el an:

²¹ Mĩ Bɨraɓe Luwah, ĩla m'un kɔm kɨ yokɨnda a ne, m'a m'tel m'mbel go ndim al, m'el m'an: A i ngejanyamosɨkadkari kɨ mbãkɨnõt.

²² Kɨtɔ 'nten la, kɨtakul Jeju, Luwah adj'n kunkɔ kɨmajtɔi kɨ to kɨɗubagt.

²³ Nya mad to nõ ɓaitɔ. Maɗi ngéjanyamosɨkadkari kɨ girrkoojt lo Lebi ĩn ngãi, ndɨ gan goot na kam kɨlaɓert, na koi ɔgid ndɨt mbãkɨnõt.

²⁴ Na Jeju taa, loa i titbe al, kɨta ndɨ kɨ dɔn dõ mbãkɨnõt, de kɨ asɨ ga goota kam kɨlaɓer jamosɨkadkarit goto.

²⁵ Kɨtɔ 'nten la, Jeju asɨ kaj'n ĩgɨn ndɨ ndɔt'n kɨ ro Luwaht kɨtakula, kɨta Jeju ndɨ kumkajir mbãkɨnõt ho, ndɨ kɔ Luwah kɨndɔgndɔg kad ɗa sed ho.

²⁶ Jeju la i Bɨra ngejanyamosɨkadkari kɨ sumbaj sew ye, unjɗang, ta goto dɔat, ɗa majal mad al bat, i kɨkanj yerr, ja ron ɓat kad ngéɗamajalgt, i kɨ tɔi kɨ dõ tɔi dɔrã.

²⁷ Jeju i tit ndeg ngéjamosɨ kadkarig al. Ĩgɨn non a lan kadkarig kɨndɔgndɔg adɨn Luwah, a lan kadkarig adɨn Luwah kɨta majalg lod dasa, kamtã la a lan kɨtɔ majal lo deg ye. Na Jeju taa ne, la kadkari kɨjakɔ, ad Luwah kɨta majalg nja kɨɗabe do, lon lan ron ad Luwah.

²⁸ Kɨtɔ mberkɨnda lo Moij taa ne, ndah deg kɨ asɨn na tap al bɨra ngejamosɨkadkarit. Na yokɨnda lo Luwah ĩn ut go mberkɨnda ye, ndah Ngon Luwah Bɨra ngejamosɨkadkarit kɨ kasɨnatap mbãkɨnõt.