Hebreg 6 - Maktub Ta Kumkajir

¹ Kɨtɔ 'nten, ad j'awɨn kɨ ketekete kad kɨ ndoon nyandoo lo deg kɨ tɔg gangg na kɨ ndɨn kɨ ta man dɔ nyandoot kɨdasa kɨ ɔj dɔ Krist al. Ja kɨ ndah girr nyandoo mad kɨ kij gog al: Ad i nyandoo kad deg tɔrrɨn ndid dɔ majalt, kɨ nyan kɨlaɗag kɨ a teen koi, na kɨ adɨn kamd Luwah,

² kɨ ndoo man dɔ nyandoo kɨdasa tit baptemg, kɨ ji kɨ ndah dɔ degt, kɨ ɓai ngékoig, kɨ takɨgang kɨ tokɨnõt lo Luwah.

³ Ad kɨ j'awɨn kɨ kete. Tajigla, ĩla Luwah ndig a ne, j'a kɨ ɗa titbe.

⁴ Kɨtɔ 'nten deg'n son kam majalt ye ta lod titbãi? Ĩgɨn non adɨn kunj lo Luwah unj dɔdt nja kɨɗa woi, ɔdɨn kadkari kɨ dɔrãt tadt, na telɨnd ngégana dɔ Ndil kɨkunjɗangt ho,

⁵ ɔdɨn ta lo Luwah tadt oon maja, gerɨn tɔgg kɨ kaglot'n a ɗe.

⁶ Kamla gog got tuson kam nyaɗat kɨ majal ye. I rot al kad tel tɔrrɨn ndid gog tɔ. Kɨtɔ ndɨ gan Ngon Luwah kagdosɨt ga kɨ kij, adɨn Ngon Luwah tel nya rosɔl kɨ to kɨ tɨga wakɨsɨ takum degt tube.

⁷ Lon ndii ed dɔningt kɨ nja nat nat be, ad dɔning ãi man maj, na nyako ndu tit maj ad ngéndɔɔg a ne, Luwah a njang dɔ dɔning'n non,

⁸ na ĩla dɔning'n non ɓa kong kɨ ngarg a ne, maja goto, ad Luwah a ndɔla, dɔngoia i laa horr.

⁹ Na ngétar, j'elta titbe kaa ne, j'aw kɨ kam kɨsokɨber dɔsɨt kɨta kɨ ger kad i ndulon go ɗob kɨmaj, ĩn hã ndɨ tee sesɨ kajt.

¹⁰ Kɨtɔ Luwah i ngeɗanya kɨro, kama a oi dɔ kɔrt'n i ndɨ ɔrɨn kam kɨlat loa al, kɨ tarɨn i ndɨ ɔjɨn kɨtatɔa, kɨ ɗa'n i ndɨ i ɗan kɨ deg kɨjaɓat lo Luwah, na i ndɨ i ɗan sed kɨ ketekete ɓaitɔ ye kam Luwah a oi dɔ al bat.

¹¹ Jĩ kɨ ndig ngãibe kad dekɨɗen kusɨt tĩron kat mbã dɔboia kɨtakad nya'n i ndahn kamsɨ dɔt ye, i ngahn.

¹² Maj kad ĩn ngérokoi siw al, na kɨ ĩn ngéndaj deg'n adɨn kamd Luwah ho, ĩn ngendɨdɔt kɨ ngãi ho. Deg kɨ titbe la a ngahn nyag'n Luwah un kɔ'n kɨ n'ad'd ye.

Kunkɔ lo Luwah'n un ad deg ye, to kɨ ɗubag

¹³ I gerɨn maɗi lon Luwah un kɔ'n ad Abraham ye, un kɔ'n kɨ yokɨnda. De mad kɨbo tɔi Luwah kad Luwah nda yo nõat goto. Na Luwah un kɔn kɨ yokɨnda dan dɔn ĩ kɨɓe.

¹⁴ El an: M'a m'njang dɔi kɨ rotag, m'a mad ngakaig bɨlan kɨ dɔtdɔt.

¹⁵ Titbe tɔ la Abraham hɔn tɔgɨnbá kɨ ndɨdɔt kɨngãi, ad ngah nya'n Luwah un kɔn an n'a n'ada nõ.

¹⁶ Lon deg unɨn kɔd kɨ yokɨnda a ne, a ndan yo kam tɔ det'n i kɨbo tɔid. Yokɨnda lod'n non la, ndɨ ɔsɨ go kunkɔ lod, kad gangɨn ne ta kɨmaj lod kɨɗen

¹⁷ Kɨ Abraham kaa ne, Luwah ɗa titbe. Girrdeg loa a ngahn nya'n Luwah unɨn kɔn ad'd. Luwah ndig kad gerɨn ɓet kɨta takɔjg lon i kɨ dum mbel. Kɨtɔ 'nten la unɨn kɔn dasa, kamla nda yo got ye.

¹⁸ Kunkɔ kɨ yokɨnda ĩn nyag kɨ dum mbel. Kunkɔ kɨ yokɨnda lo Luwah takɨbal goto kamt. Kɨtɔ jĩ kɨ ngah lo yaro kam Luwaht, kɨ ngah tɔg kad kɨ hɔn roj bá kad kɨ ngah nya'n Luwah unɨn kɔn adj.

¹⁹ Ndahkamdɔt a hɔj jɔgum kad kɨ ɗa bijir nõ Luwaht, tit'n gɔltoo a hɔn too lo kɨɗabe. Kɨtɔ 'nten la, kub ganglo kɨjaɓat teen tan nõjt, kad j'and lot kɨ keme ĩn hã Luwah i tit.

²⁰ Jeju and kam lot'n non kete nojt kɨta tel bɨra ngejanyamosɨkadkari kɨ mbãkɨnõt kɨgo ɗobt lo Melkisedek.